ཀྲུང་གོ་དང་ཨུ་རི་སི་རྒྱལ་ཁབ་གཉིས་ཀྱི་གཙོ་འཛིན་གྱིས་ཕན་ཚུན་ལ་ལོ་གསར་པའི་རྟེན་འབྲེལ་གློག་འཕྲིན་བཏང་བ།

2024ལོའི་ཟླ12པའི་ཚེས31ཉིན།　རྒྱལ་ཁབ་ཀྱི་ཀྲུའུ་ཞི་ཅིན་ཕིང་དང་ཨུ་རུ་སིའི་ཙུང་ཐུང་ཕུའུ་ཅིན་གཉིས་ཀྱིས་ཕན་ཚུན་ལ་ལོ་གསར་པའི་རྟེན་འབྲེལ་གློག་འཕྲིན་བཏང་།

ཞི་ཅིན་ཕིང་གིས་ཀྲུང་གོ་སྲིད་གཞུང་དང་ཀྲུང་གོ་མི་དམངས་ཀྱི་ཚབ་མཛད་དེ།　ཙུང་ཐུང་ཕུའུ་ཅིན་དང་ཨུ་རུ་སིའི་མི་དམངས་ལ་ལྷག་བསམ་རྣམ་དག་གིས་རྟེན་འབྲེལ་དང་བཀྲ་ཤིས་སྨོན་འདུན་ཞུས།　ཞི་ཅིན་ཕིང་གིས་བསྟན་དོན། 2024ལོ་ནི་ཀྲུང་གོ་དང་ཨུ་རུ་སིའི་བར་འབྲེལ་བ་བཙུགས་ནས་ལོ75འཁོར་བའི་ལོ་ཡིན་ལ།　རྒྱལ་ཁབ་གཉིས་ཀྱི་འབྲེལ་བར་གསར་དུ་བཞེངས་པའི་ལམ་ཚད་རྡོ་རིང་གལ་ཆེན་ཞིག་ཡིན།　ལོ་ངོ་བདུན་ཅུ་ལྷག་གི་དཀའ་སྡུག་བརྒྱུད་མཐར།　ཀྲུང་གོ་དང་ཨུ་རུ་སིའི་འབྲེལ་བ་སྔར་ལས་བརྟན་འཇགས་སུ་གྱུར་ཡོད།　ལོ་བརྒྱའི་འཕོ་འགྱུར་གྱི་འགྲོས་ཇེ་མགྱོགས་སུ་འགྲོ་བཞིན་པ་དང་བདེ་འཇགས་མིན་པའི་རྒྱལ་སྤྱིའི་གནས་བབ་མདུན་དུ།　ཀྲུང་གོ་དང་ཨུ་རུ་སི་རྒྱལ་ཁབ་གཉིས་ཀྱིས་ཐོག་མཐའ་བར་གསུམ་དུ་ཕྱོགས་གསུམ་པར་མནའ་འབྲེལ་མི་བྱེད་པ་དང་།　ངོ་རྒོལ་མི་བྱེད་པ།　ཁ་གཏད་དུ་མི་ལངས་པའི་ཡང་དག་པའི་བགྲོད་ལམ་དེད་ནས་མཉམ་སྐྱོད་བྱས་ཡོད།　འདས་པའི་ལོ་གཅིག་གི་རིང་ལ།　ང་ཚོས་པེ་ཅིང་དང་།　ཨ་སི་ཐ་ནཱ།　ཁ་ཧྲན་བཅས་སུ་གྲོས་མོལ་བྱས་ཤིང་།　ཁ་པར་དང་འཕྲིག་ཡིག་སོགས་ཀྱི་ལམ་ནས་མཐུན་སྦྱོར་བྱས་ཏེ།　ཕྱོགས་གཉིས་ཀྱི་འབྲེལ་བ་དང་ཐུན་མོང་གིས་སེམས་ཁུར་བྱེད་པའི་རྒྱལ་སྤྱི་དང་ས་ཁུལ་གྱི་གནད་དོན་གལ་ཆེན་ལ་དམིགས་ཏེ་ལྷག་བསམ་རྣམ་དག་གིས་བརྗེ་རེས་བྱས་པར་མ་ཟད།　ངོས་འཛིན་གཅིག་མཐུན་རྒྱ་ཆེར་བྱུང་ཡོད།　ང་ཚོའི་འཐབ་ཇུས་སྣེ་ཁྲིད་འོག་ཏུ།　ཀྲུང་གོ་དང་ཨུ་རུ་སི་རྒྱལ་ཁབ་གཉིས་ཀྱི་ཆབ་སྲིད་ཡིད་རྟོན་དང་འཐབ་ཇུས་མཉམ་ལས་དེ་ཆུ་ཚད་སྔར་ལས་མཐོ་བའི་ཕྱོགས་སུ་རྒྱུན་ཆད་མེད་པར་བསྐྱོད་པ་དང་།　རྒྱལ་ཁབ་གཉིས་ཀྱི་ཤར་མཚམས་ཀྱི་རང་བྱུང་སོལ་རླངས་སྦུག་ལམ་ཡོངས་སུ་འབྲེལ་བར་བྱས་ཤིང་།　ཁྱབ་ཁོངས་སོ་སོའི་དངོས་གཉེར་མཉམ་ལས་ཐད་མིག་མཐོང་ལག་ཟིན་གྱི་གྲུབ་འབྲས་མང་པོ་གཅིག་སྡུད་བྱས་ཡོད།　ཀྲུང་གོ་དང་ཨུ་རུ་སིའི་རིག་གནས་ལོ་བདེ་བླག་ངང་སྒོ་འབྱེད་བྱས་ལ།　རྒྱལ་ཁབ་གཉིས་ཀྱི་མི་རབས་མཛའ་འབྲེལ་གྱི་དམངས་སེམས་སྒྲོག་ཐག་སྔར་ལས་ཇེ་དམ་དུ་བཏང་ཡོད།　ཕྱོགས་གཉིས་ཀྱིས་ཕྱོགས་སོ་སོའི་གསེར་གྱོམ་རྐྱེན་སྲོལ་དང་།　ཧྲང་ཧའེ་མཉམ་ལས་རྩ་འཛུགས་ཀྱི་ཀྲུའུ་ཞིའི་རྒྱལ་ཁབ་ཀྱི་འགན་ཁུར་ལས་དོན་ཐད་ནས་ཕན་ཚུན་ལ་རྒྱབ་སྐྱོར་བྱས་ཏེ།　འཛམ་གླིང་ལྷོ་ཕྱོགས་ཀྱི་མཐུན་སྒྲིལ་མཉམ་ལས་ལ་སྐུལ་འདེད་གཏོང་ཆེད་བྱས་རྗེས་གལ་ཆེན་བཞག་ཡོད།

ཞི་ཅིན་ཕིང་གིས་བསྟན་དོན། 2025ལོ་ནི་ལོ་ལྔའི་འཆར་འགོད་བཅུ་བཞི་པའི་འཆར་འགོད་ཀྱི་མཇུག་བསྡུ་བའི་ལོ་ཡིན་ཞིང་།　འཛམ་གླིང་གི་ཧྥ་ཞི་སིར་ངོ་རྒོལ་བྱེད་པའི་དམག་འཁྲུག་ལ་རྒྱལ་ཁ་བླངས་ནས་ལོ80འགོར་བའི་ལོ་ཡིན་པས།　རྒྱལ་སྤྱིའི་གནས་བབ་ལ་འགྱུར་ལྡོག་ཅི་འདྲ་ཆེ་ཡང་།　ཀྲུང་གོ་ཕྱོགས་ཀྱིས་བློ་བརྟན་འགྱུར་མེད་སྒོས་ཕྱོགས་ཡོངས་ནས་བཅོས་སྒྱུར་སྔར་ལས་ཟབ་སྤེལ་དང་།　ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་ཞིང་།　འཛམ་གླིང་ཞི་བདེ་འཕེལ་རྒྱས་ཀྱི་ལས་དོན་ལ་སྐུལ་འདེད་གཏོང་རྒྱུ་ཡིན།　ཀྲུང་གོ་དང་ཨུ་རུ་སིའི་ཁྱབ་ཁོངས་སོ་སོའི་མཉམ་ལས་ཀྱིས་འཕེལ་རྒྱས་ཀྱི་གོ་སྐབས་གསར་པ་ཆད་མེད་དུ་བསུ་ཐུབ་པའི་ཡིད་ཆེས་ཡོད།　ངས་སྐུ་ཞབས་ཙུང་ཐུང་དང་མཉམ་དུ་འབྲེལ་འདྲིས་དམ་ཟབ་མུ་མཐུད་རྒྱུན་འཁྱོངས་བྱས་ཏེ།　ཀྲུང་གོ་དང་ཨུ་རུ་སིའི་མཉམ་ལས་ཀྱི་ཁ་ཕྱོགས་ཆེན་པོ་ཁོང་དུ་ཡང་དག་པར་ཆུད་པར་བྱེད་པ་དང་།　རྒྱུན་རིང་བའི་ཁྱིམ་མཚེས་བཟང་བོའི་མཛའ་བརྩེ་དང་།　ཕྱོགས་ཡོངས་ཀྱི་འཐབ་ཇུས་མཉམ་ལས།　གཉིས་ཕན་གཉིས་རྒྱལ་གྱི་དུས་རབས་གསར་པའི་ཀྲུང་གོ་དང་ཨུ་རུ་སིའི་འབྲེལ་བ་རྒྱུན་མཐུད་ངང་སྲ་བརྟན་དང་གཏིང་ཟབ་ཏུ་བཏང་སྟེ།　རྒྱལ་ཁབ་གཉིས་ཀྱི་དར་རྒྱས་གོང་འཕེལ་དང་དེང་རབས་ཅན་གྱི་འཛུགས་སྐྲུན་ཐད་སྒུལ་ཤུགས་སྟོབས་ལྡན་སྣོན་པ་དང་།　ཀྲུང་གོ་དང་ཨུ་རུ་སི་རྒྱལ་ཁབ་གཉིས་ཀྱི་མི་དམངས་ཀྱི་བདེ་སྐྱིད་ཇེ་མང་དུ་གཏོང་བ་དང་།　རྒྱལ་སྤྱིའི་འདྲ་མཉམ་དྲང་གཞག་ལ་སྲུང་སྐྱོང་བྱེད་ཆེད་བྱས་རྗེས་གལ་ཆེན་གསར་དུ་འཇོག་འདོད་ཡོད།

ཙུང་ཐུང་ཕུའུ་ཅིན་གྱིས་ལྷག་བསམ་རྣམ་དག་གིས་ཀྲུའུ་ཞི་ཞི་ཅིན་ཕིང་ལ་ལུགས་གསར་དང་ལུགས་རྙིང་ལོ་སར་དུས་ཆེན་གྱི་རྟེན་འབྲེལ་ཞུས་པ་དང་།　ཀྲུང་གོའི་མི་དམངས་བདེ་སྐྱིད་བདེ་ཐང་ཡོང་བའི་སྨོན་འདུན་ཞུས།　ཕུའུ་ཅིན་གྱིས་བསྟན་དོན། ལོ་གཅིག་མཇུག་བསྒྲིལ་བའི་དུས་སྐབས་སུ།　ཨུ་རུ་སི་དང་ཀྲུང་གོ་རྒྱལ་ཁབ་གཉིས་ཀྱིས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ75འཁོར་བ་དང་ཨུ་རུ་སི་དང་ཀྲུང་གོའི་བར་འབྲེལ་བ་བཙུགས་ནས་ལོ75འཁོར་བར་མཉམ་དུ་རྟེན་འབྲེལ་གཟབ་རྒྱས་ཞུས་ཡོད།　ང་ཚོས་ཐེངས་གསུམ་ལ་བདེ་བླག་ངང་གྲོས་མོལ་བྱས་ཏེ།　ཨུ་རུ་སི་དང་ཀྲུང་གོའི་དུས་རབས་གསར་པའི་ཕྱོགས་ཡོངས་ཀྱི་འཐབ་ཇུས་མཉམ་ལས་གྲོགས་པོའི་འབྲེལ་བར་འཕེལ་རྒྱས་ཀྱི་གྲུབ་འབྲས་གསར་པ་ལེན་པར་སྣེ་ཁྲིད་བྱས་པ་དང་།　ཕྱོགས་གཉིས་ཀྱི་ཉོ་ཚོང་དང་།　ནུས་ཁུངས།　འགྲིམ་འགྲུལ།　ཚན་རྩལ་སོགས་ཁྱབ་ཁོངས་ཀྱི་གཉིས་ཕན་མཉམ་ལས་ཐད་གོ་རིམ་ལྡན་པའི་སྐུལ་འདེད་བཏང་ཡོད།　ཨུ་རུ་སི་དང་ཀྲུང་གོའི་རིག་གནས་ལོ་བདེ་བླག་ངང་མགོ་བརྩམས་ནས་རྒྱལ་ཁབ་གཉིས་ཀྱི་མི་ཆོས་བརྗེ་རེས་རྒྱ་བསྐྱེད་དེ་གོ་སྐབས་གསར་པ་སྔར་ལས་མང་པོ་གསར་དུ་བཏོད་ཡོད།　ལོ་གསར་པའི་རེ་འདུན་ཐད་ནས།　ངས་ཀྲུའུ་ཞི་ཞི་ཅིན་ཕིང་དང་མཉམ་དུ་འབྲེལ་གཏུག་ལས་དོན་དམ་ཟབ་ཏུ་གཏོང་བ་མུ་མཐུད་རྒྱུན་འཁྱོངས་བྱེད་པ་དང་།　ཕྱོགས་གཉིས་ཀྱི་འབྲེལ་བ་དང་ཁྱབ་ཁོངས་སོ་སོའི་མཉམ་ལས་རྒྱུན་ཆད་མེད་པར་འཕེལ་རྒྱས་འགྲོ་བར་མཉམ་དུ་སྐུལ་འདེད་གཏོང་བ།　 རྒྱལ་ཁབ་གཉིས་ཀྱི་མཉམ་འབྲེལ་རྒྱལ་ཚོགས་དང་གསེར་གྱོམ་རྒྱལ་ཁབ།　ཧྲང་ཧའེ་མཉམ་ལས་རྩ་འཛུགས།　རྒྱལ་ཁབ་ཉི་ཤུའི་སྡེ་ཚོགས་སོགས་ཕྱོགས་མང་སྟེགས་བུའི་མཐུན་སྦྱོར་གཞོགས་འདེགས་ཐད་སྔར་ལས་ཤུགས་སྣོན་འདོད་ཡོད།　འདི་ལྟར་བྱས་ཚེ་རྒྱལ་ཁབ་གཉིས་ཀྱི་མི་དམངས་ཀྱི་ཁེ་ཕན་དང་ཡོངས་སུ་མཐུན་པར་མ་ཟད།　རྒྱལ་སྤྱི་དང་ས་ཁུལ་གྱི་བདེ་འཇགས་བརྟན་འཇགས་ལ་སྲུང་སྐྱོབ་བྱེད་པར་ཕན་ཐོགས་ཡོད།

ཉིན་དེར།　རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཆང་གིས་ཨུ་རུ་སིའི་ཙུང་ལི་མཱིས་ཧྲུའུ་སི་ཅིན་ལ་ལོ་གསར་པའི་རྟེན་འབྲེལ་གློག་འཕྲིན་བཏང་།　ལི་ཆང་གིས་བསྟན་དོན། ཀྲུའུ་ཞི་ཞི་ཅིན་ཕིང་དང་ཙུང་ཐུང་ཕུའུ་ཅིན་རྣམ་གཉིས་ཀྱི་འཐབ་ཇུས་སྣེ་ཁྲིད་འོག　ཀྲུང་གོ་དང་ཨུ་རུ་སི་ཕྱོགས་གཉིས་ཀྱིས་རྒྱལ་ཁབ་གཉིས་བར་འབྲེལ་བ་བཙུགས་ནས་ལོ75འཁོར་བ་གོ་སྐབས་སུ་བརྩིས་ཏེ།　ཕྱོགས་གཉིས་ཀྱི་འབྲེལ་བས་བདེ་ཐང་བརྟན་འཇགས་ཀྱི་འཕེལ་རྒྱས་རྣམ་པ་སྲུང་འཛིན་བྱེད་པར་སྐུལ་འདེད་བཏང་ཡོད།　ཀྲུང་གོས་ཨུ་རུ་སི་ཕྱོགས་དང་མཉམ་དུ།　རྒྱལ་ཁབ་གཉིས་ཀྱི་གཙོ་འཛིན་བར་བྱུང་བའི་ཐུན་མོང་ངོས་འཛིན་གལ་ཆེན་གཞི་རྩའི་བསྲུང་བྱ་རུ་བྱས་ནས།　ཀྲུང་གོ་དང་ཨུ་རུ་སིའི་འབྲེལ་བ་དང་ཁྱབ་ཁོངས་སོ་སོའི་མཉམ་ལས་སྐས་རིམ་གསར་པ་ཞིག་ཏུ་སླེབས་པར་སྐུལ་འདེད་གཏོང་རྒྱུ་ཡིན།

མཱིས་ཧྲུའུ་སི་ཅིན་གྱིས་བསྟན་དོན། ཨུ་རུ་སིས་ཀྲུང་གོ་ཕྱོགས་དང་མཉམ་དུ་ཚད་མཐོའི་ཡིད་རྟོན་བྱེད་པའི་འཛུགས་སྐྲུན་རང་བཞིན་གྱི་བརྗེ་རེས་མུ་མཐུད་སྲུང་འཛིན་བྱེད་འདོད་ཡོད་ལ།　ཕྱོགས་གཉིས་བར་གྱི་ཐུན་མོང་ངོས་འཛིན་གྱིས་ཕྱོགས་གཉིས་ཀྱི་མཉམ་ལས་ཆུ་ཚད་སྔར་ལས་མཐོན་པོར་སླེབས་པར་རོགས་རམ་དང་སྐུལ་འདེད་གཏོང་ཐུབ་བའི་ཡིད་ཆེས་ཡོད། །