ཞི་ཅིན་ཕིང་གིས་ལི་ཅ་ཁྲའོ་ཡི་འགན་སྒྲུབ་གནས་ཚུལ་སྙན་ཞུར་གསན།
ཚེས13ཉིན་གྱི་ཕྱི་དྲོར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཀྲུང་ནན་ཧའེ་དབྱིན་ཐའེ་རུ་པེ་ཅིན་དུ་འགན་སྒྲུབ་གནས་ཚུལ་སྙན་ཞུ་བྱེད་པར་ཡོང་བའི་ཞང་ཀང་དམིགས་བསལ་སྲིད་འཛིན་ཁུལ་གྱི་སྲིད་འཛིན་དཔོན་ལི་ཅ་ཁྲའོ་ལ་ཐུག་འཕྲད་གནང་བ་དང་། ཁོས་ཞང་ཀང་གི་མིག་སྔའི་གནས་བབ་དང་དམིགས་བསལ་སྲིད་འཛིན་ཁུལ་གྱི་སྲིད་གཞུང་གི་བྱ་བའི་གནས་ཚུལ་སྐོར་སྙན་ཞུ་ཕུལ་བར་གསན།
ཞི་ཅིན་ཕིང་གིས་ལོ་གཅིག་གི་རིང་ལ། སྲིད་འཛིན་དཔོན་ལི་ཅ་ཁྲའོ་ཡིས་དམིགས་བསལ་སྲིད་འཛིན་ཁུལ་གྱི་སྲིད་གཞུང་གི་སྣེ་ཁྲིད་དེ་ཁག་ཁུར་དངོས་སྒྲུབ་དང་ཡར་རྒྱས་བརྩོན་ལེན་བྱས་ནས། གཞི་རྩའི་བཅའ་ཁྲིམས་ཀྱི་དོན་ཚན23པའི་ཁྲིམས་འཛུགས་བྱ་བ་ལོ་རྒྱུས་རང་བཞིན་ལྡན་པའི་སྒོ་ནས་ཡོངས་འགྲུབ་བྱས་པ་དང་། སྟོབས་ཤུགས་གཅིག་སྡུད་ཀྱིས་དཔལ་འབྱོར་དང་འཕེལ་རྒྱས་དོན་གཉེར་བྱས་ཏེ། སྡོད་ཁང་དང་སྨན་བཅོས་སོགས་དམངས་འཚོའི་དཀའ་གནད་ཐག་གཅོད་བྱེད་པར་སྐུལ་འདེད་བཏང་བ་དང་། ཕྱི་ཕྱོགས་དང་བརྗེ་རེས་དང་མཉམ་ལས་བྱེད་ཤུགས་ཆེ་རུ་བཏང་ཞིང་། རྒྱལ་སྤྱིའི་ཐོག་གི་ཤུགས་རྐྱེན་མུ་མཐུད་དུ་ཇེ་ཆེར་བཏང་ནས། ཞང་ཀང་བརྟན་བརླིང་ངང་འཕེལ་རྒྱས་འགྲོ་བའི་གནས་བབ་བཟང་པོ་སྔར་ལས་སྲ་བརྟན་དུ་བཏང་ཡོད། ཀྲུང་དབྱང་གིས་སྲིད་འཛིན་དཔོན་ལི་ཅ་ཁྲའོ་དང་དམིགས་བསལ་སྲིད་འཛིན་ས་ཁུལ་སྲིད་གཞུང་གི་བྱ་བར་གདེང་འཇོག་གང་ལེགས་བྱེད་བཞིན་ཡོད་ཅེས་བསྟན།
ཞི་ཅིན་ཕིང་གིས་ཀྲུང་གོ་གུང་ཁྲན་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པས་བཅོས་སྒྱུར་ཕྱོགས་ཡོངས་ནས་ཟབ་སྤེལ་དང་ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བའི་ཐད་རྒྱུད་རིམ་ལྡན་པའི་བཀོད་སྒྲིག་བྱས་པ་དང་། “རྒྱལ་ཁབ་གཅིག་ལ་ལམ་ལུགས་གཉིས”ཀྱི་ལམ་ལུགས་ཀྱི་དགེ་མཚན་འདོན་སྤེལ་བྱེད་དགོས་པ་དང་། ཞང་ཀང་འཕེལ་རྒྱས་གཏོང་བར་ལོ་རྒྱུས་ཀྱི་གོ་སྐབས་གསར་པར་འཕྲད་ཡོད་པ་ནན་གྱིས་བསྟན་ཡོད། ཀྲུང་དབྱང་གིས་མུ་མཐུད་དུ“རྒྱལ་ཁབ་གཅིག་ལ་ལམ་ལུགས་གཉིས”ཀྱི་བྱེད་ཕྱོགས་ཕྱོགས་ཡོངས་དང་གནད་ལ་འཁེལ་བ། བློ་བརྟན་འགྱུར་མེད་བཅས་ཀྱི་སྒོ་ནས་ལག་ལེན་མཐར་ཕྱིན་བྱེད་པ་དང་། སྲིད་འཛིན་དཔོན་དང་དམིགས་བསལ་སྲིད་འཛིན་ཁུལ་སྲིད་གཞུང་གིས་སྤྱི་ཚོགས་ཀྱི་ལས་རིགས་ཁག་ལ་མཐུན་སྒྲིལ་དང་སྣེ་ཁྲིད་བྱེད་པར་རྒྱབ་སྐྱོར་ཆེན་པོ་བྱས་ཏེ། བློ་རྩ་བརྟན་པོས་བཅོས་སྒྱུར་དང་སྙིང་སྟོབས་ཆེར་སྐྱེད་ཀྱིས་རྒྱལ་ཁབ་ཀྱི་འཐབ་ཇུས་དང་འབྲེལ་མཐུད་ལེགས་པོ་བྱེད་པ་དང་། དཔལ་འབྱོར་འཕེལ་རྒྱས་གཏོང་བའི་སྒུལ་ནུས་གསར་པ་དང་དགེ་མཚན་གསར་པ་གཏོད་པ། གསར་གཏོད་དང་གསར་སྐྲུན་བྱེད་པའི་ཁྲོད་ཞང་ཀང་བཅོས་སྐྱོང་དང་དར་རྒྱས་ཡོང་བར་སྐུལ་འདེད་གཏོང་བ་བཅས་བྱས་ཏེ། ཞང་ཀང་དར་རྒྱས་དང་བརྟན་བརླིང་ཡོང་བར་བྱས་རྗེས་སྔར་ལས་ཆེན་པོ་འཇོག་དགོས་ཞེས་བསྟན།
ལི་ཆང་དང་ཚའེ་ཆི། ཏེན་ཞུའེ་ཞང་། ཧྲི་ཐའེ་ཧྥིན། ཁྲིན་ཝུན་ཆིན། ཞ་པའོ་ལུང་སོགས་ཐུག་འཕྲད་ལ་ཞུགས།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注