ཟླ1པོ་ནས་ཟླ11པའི་བར་རྒྱལ་ཡོངས་སུ་དངོས་སུ་སྤྱད་པའི་ཕྱི་རྒྱལ་གྱི་མ་དངུལ་སྒོར་དུང་ཕྱུར7497ལ་སླེབས་པ།

ཟླ1པོ་ནས་ཟླ11པའི་བར་རྒྱལ་ཡོངས་སུ་དངོས་སུ་སྤྱད་པའི་ཕྱི་རྒྱལ་གྱི་མ་དངུལ་སྒོར་དུང་ཕྱུར7497ལ་སླེབས་པ།

ཚེས14ཉིན་ཚོང་དོན་པུས་ཁྱབ་བསྒྲགས་བྱས་པའི་གཞི་གྲངས་ལྟར་ན། ད་ལོའི་ཟླ1པོ་ནས་ཟླ11པའི་བར་རྒྱལ་ཡོངས་སུ་དངོས་སུ་སྤྱད་པའི་ཕྱི་རྒྱལ་གྱི་མ་དངུལ་སྒོར་དུང་ཕྱུར7497ལ་སླེབས་པ་དང་། ཟླ11པར་དངོས་སུ་སྤྱད་པའི་ཕྱི་རྒྱལ་གྱི་མ་དངུལ་དུས་མཉམ་ལས6%འཕར་ཡོད།

གཞི་གྲངས་ལྟར་ན། ཟླ1པོ་ནས་ཟླ11པའི་བར་རྒྱལ་ཡོངས་སུ་གསར་དུ་བཙུགས་པའི་ཕྱི་རྒྱལ་ཚོང་པའི་དངུལ་གཏོང་ཁེ་ལས52379ཡོད་པ་དེ་དུས་མཉམ་ལས8.9%འཕར་ནས། ལོ་རྒྱུས་ཀྱི་དུས་མཚུངས་ལས་མཐོ་ཤོས་སུ་སླེབས་ཡོད།

མ་དངུལ་ནང་འདྲེན་གྱི་གྲུབ་ཆ་རྒྱུན་མཐུད་ངང་ཇེ་ལེགས་སུ་འགྲོ་བའི་རྣམ་པ་མངོན་ཞིང་། ལག་རྩལ་མཐོ་བའི་བཟོ་སྐྲུན་ལས་རིགས་ཀྱིས་དངོས་སུ་སྤྱད་པའི་ཕྱི་རྒྱལ་མ་དངུལ་གྱིས་ན་ནིང་གི་དུས་མཚུངས་ལས་བརྒྱ་ཆའི་ཚེག0.3འཕར་བ་དང་། སྨན་བཅོས་ཡོ་བྱད་སྒྲིག་ཆས་དང་དེ་བཞིན་ཡོ་བྱད་དང་དཔྱད་ཆས་བཟོ་སྐྲུན་ལས་རིགས་དང་། རྩིས་རྒྱག་འཕྲུལ་འཁོར་དང་དེ་བཞིན་གཞུང་ལས་སྒྲིག་ཆས་བཟོ་སྐྲུན་ལས་རིགས། ཆེད་ལས་ལག་རྩལ་ཞབས་ཞུའི་ལས་རིགས་བཅས་ཀྱིས་དངོས་སུ་སྤྱད་པའི་ཕྱི་རྒྱལ་གྱི་མ་དངུལ་དུས་མཉམ་ལས་སོ་སོར53.4%དང9.1%། 19%བཅས་འཕར་ཡོད།

མ་དངུལ་ནང་འདྲེན་གྱི་ཡོང་ཁུངས་ཀྱང་སྔར་ལས་སྣ་མང་ཅན་དུ་གྱུར་ཡོད། དར་རྒྱས་ཆེ་བའི་དཔལ་འབྱོར་དངོས་ཚན་སྐོར་ཞིག་གིས་ཀྲུང་གོར་དངུལ་གཏོང་བྱེད་ཚད་རྒྱུན་མཐུད་ངང་འཕར་བ་དཔེར་ན། འཇར་མན་དང་སིང་ཀ་ཕོར། སུའེ་ཙེར་བཅས་ཀྱིས་དངོས་སུ་ཀྲུང་གོར་དངུལ་གཏོང་བྱེད་ཚད་དུས་མཉས་ལས10.9%དང4.8%། 4%བཅས་སོ་སོར་འཕར་བ་དང་། ཨེ་ཤེ་ཡ་ཤར་ལྷོའི་མནའ་འབྲེལ་གྱིས་ཀྲུང་གོར་དངུལ་གཏོང་བྱེད་ཚད་དུས་མཉམ་ལས6.4%འཕར།

ཉེ་དུས་ཀྲུང་གོའི་དབྱིན་ཇིའི་ཚོང་ཚོགས་ཀྱིས《2024ལོ་ནས2025ལོའི་བར་གྱི་ཀྲུང་གོར་ཡོད་པའི་དབྱིན་ཇིའི་ཁེ་ལས་ཏེ་ཚོང་ལས་ཀྱི་ཡིད་ཆེས་བརྟག་དཔྱད་སྙན་ཞུ》ཡོངས་བསྒྲགས་བྱས་པ་ལྟར་ན། བཅར་འདྲི་དང་ལེན་བྱེད་པའི་ཁེ་ལས76%གིས་མིག་སྔའི་དངུལ་གཏོང་ཆུ་ཚད་རྒྱུན་འཁྱོངས་བྱེད་པའམ་ཡང་ན་དངུལ་གཏོང་ཇེ་མང་དུ་གཏོང་རྒྱུ་ཡིན་པ་དང་། ཀྲུང་གོ་འཇར་མན་ཚོང་ཚོགས་ཀྱིས་ཁྱབ་བསྒྲགས་བྱས་པའི2024/25ལོ་འཁོར་གྱི་ཚོང་ལས་ཡིད་ཆེས་ཀྱི་བརྟག་དཔྱད་སྙན་ཞུ་ལས་མངོན་པར། བཅར་འདྲི་དང་ལེན་བྱེད་པའི་ཁེ་ལས92%ཀྱིས་མུ་མཐུད་ཀྲུང་གོར་གཉེར་སྐྱོང་བྱ་རྒྱུ་དང་། ཕྱེད་ཀ་ལྷག་ཙམ་འཆར་གཞི་དེ་ལས་འབྱུང་འགྱུར་ལོ་གཉིས་ནང་དངུལ་གཏོང་ཇེ་མང་དུ་གཏོང་རྒྱུ་རེད། དེ་ལས་ཕྱི་རྒྱལ་གྱི་དངུལ་གཏོང་བྱེད་མཁན་གྱིས་ཀྲུང་གོར་རྒྱུན་མཐུད་ངང་དངུལ་གཏོང་དང་ཀྲུང་གོར་རྒྱུས་མངའ་ཆེན་པོ་ཡོད་པའི་ཡིད་ཆེས་མཚོན་ཡོད།