རང་ཞིང་གིས་ཐབས་མང་མཉམ་སྤྱོད་བྱས་ནས་དཀའ་ཁག་ཅན་གྱི་མང་ཚོགས་ཀྱིས་དྲོད་ཁོལ་ལྡན་པའི་དགུན་ཁ་ཞིག་རོལ་བར་འགན་སྲུང་བྱས།

རང་ཞིང་གིས་ཐབས་མང་མཉམ་སྤྱོད་བྱས་ནས་དཀའ་ཁག་ཅན་གྱི་མང་ཚོགས་ཀྱིས་དྲོད་ཁོལ་ལྡན་པའི་དགུན་ཁ་ཞིག་རོལ་བར་འགན་སྲུང་བྱས།

ཞིང་ཆེན་དམངས་སྲིད་ཐིན་གྱིས་ཀྲུང་དབྱང་དང་ཞིང་ཆེན་ཏང་ཨུ། ཞིང་ཆེན་སྲིད་གཞུང་དང་དམངས་སྲིད་པུའུ་ཡི་དཀའ་ཁག་ཅན་གྱི་མང་ཚོགས་ཀྱིས་དྲོད་ཁོལ་ལྡན་པའི་དགུན་ཁ་ཞིག་རོལ་བའི་སྐོར་གྱི་བཀོད་སྒྲིག་རེ་བ་ཕྱོགས་ཡོངས་ནས་ལག་བསྟར་བྱས་པ་དང་། དཀའ་ཁག་ཅན་གྱི་མང་ཚོགས་ལ་དྲོད་ཁོལ་ལྡན་ཞིང་བདེ་འཇགས་ཀྱི་དགུན་ཁ་ཞིག་རོལ་དུ་འཇུག་པའི་ཆབ་སྲིད་ཀྱི་འགན་འཁྲི་ཕྲག་ཏུ་བླངས་ལ། ཚད་མཐའི་བསམ་བློ་ཇེ་བརྟན་དུ་བཏང་བ་དང་ཇུས་འགོད་བཀོད་སྒྲིག་བཟང་བོ་བྱས་ནས། སྤྱི་ཚོགས་རོགས་སྐྱོར་བྱ་བའི་སྤུས་འབྲས་ཇེ་མཐོར་གཏོང་བའི་སྟེང་ཤུགས་བཏོན་པ་དང་། སྔར་ལས་ཤུགས་ལྡན་པ་དང་སྔར་ལས་དྲོད་ཁོལ་ལྡན་པའི་རོགས་སྐྱོར་བྱེད་ཐབས་བརྒྱུད་དེ། ཞིང་ཆེན་ཡོངས་ཀྱི་དཀའ་ཁག་ཅན་གྱི་མང་ཚོགས་ཀྱིས་དྲོད་ཁོལ་ལྡན་པའི་དགུན་ཁ་ཞིག་རོལ་བར་ཁག་ཐེག་བྱས།

ཕྱོགས་ཡོངས་ནས་མཐིལ་རྟོགས་གྲལ་བཤེར་བྱེད་པའི་སྟེང་ཤུགས་བཏོན། ཞིང་ཆེན་ཡོངས་ཀྱི་དམངས་སྲིད་སྡེ་ཁག་གིས་གྲོང་གསེབ་དར་སྤེལ་དང་སྨན་བཅོས་འགན་སྲུང་། སློབ་གསོ་སོགས་སྡེ་ཁག་གིས་འདོན་སྤྲོད་བྱས་པའི་དོགས་གནས་གཞི་གྲངས་གཙིགས་སུ་བཟུང་ནས། ཡོང་སྒོ་དམའ་བའི་མི་ཚོགས་ཀྱི་དྲ་ཐོག་ཡུལ་དངོས་ཀྱི་ཕྱོགས་ཡོངས་ཀྱི་མཐིལ་རྟོགས་གྲལ་བཤེར་སྤེལ་བ་དང་། གཙོ་བོར་མ་མཐའི་འཚོ་བའི་འགན་སྲུང་ཁྲོད་བཞག་མེད་པའི་ཁྱིམ་ཚང་དང་འགྲོ་འོང་ཅན་གྱི་དབུལ་ཕོངས་ཁྱིམ་ཚང་། ཉེ་བའི་ལོ་གཉིས་རིང་ལ་རོགས་སྐྱོར་རེ་ཞུ་བྱས་ཀྱང་ཆོག་མཆན་མ་ཐོབ་པའི་ཁྱིམ་ཚང་སོགས་དཀའ་ཁག་ཅན་གྱི་མང་ཚོགས་ལ་ཞིབ་བཤེར་བྱས་ཏེ། ཆ་རྐྱེན་དང་མཐུན་པའི་ཁྱིམ་ཚང་དང་མི་སྣ་དུས་ཐོག་ཏུ་རོགས་སྐྱོར་ཁྱབ་ཁོངས་ཁྲོད་བཞག དགུན་ཁའི་ཚུན་དུ། ས་ཆ་སོ་སོས་གཞི་གྲངས་ཆེན་པོ་དང་ཟུང་འབྲེལ་བྱས་པའི་རྐྱེན་སྲོལ་བརྒྱུད་དེ་མི་གྲངས་འབུམ་གསུམ་དང་ཁྲི་དྲུག་སྟོང་ལྔ་ལྔ་བརྒྱར་མཐིལ་རྟོགས་གྲལ་བཤེར་བྱས་པ་དང་། གྲལ་བཤེར་བརྒྱུད་དེ་དུས་ཐོག་ཏུ་དཀའ་ཁག་ཅན་གྱི་མང་ཚོགས་ཁྲི་བརྒྱད་དང་སྟོང་བཞི་སུམ་བརྒྱ་མ་མཐའི་འཚོ་བའི་འགན་སྲུང་དང་ཧ་ཅང་དཀའ་ཁག་ཆེ་བའི་མི་སྣ་སོགས་ཀྱི་རོགས་སྐྱོར་ཁྱབ་ཁོངས་ཁྲོད་བཞག

སྲིད་ཇུས་ལག་བསྟར་བཟང་བོ་བྱེད་པའི་སྟེང་ཤུགས་བཏོན། ཞིང་ཆེན་ཡོངས་ཀྱི་དམངས་སྲིད་སྡེ་ཁག་གིས་བྱ་བ་གཅིག་ལ་གྲོས་སྡུར་ཐེངས་གཅིག་བྱེད་པ་དང་རྫོང་རིམ་པའི་དཀའ་ཁག་ཅན་གྱི་མང་ཚོགས་ཀྱི་གཞུང་དོན་གྲོས་སྡུར་མཐུན་སྦྱོར་རྐྱེན་སྲོལ་ལག་བསྟར་བཟང་བོ་བྱས་པ་དང་། རེ་ཞུ་མ་བྱས་པ་དང་རོགས་སྐྱོར་མ་བྱས་པའི་གནད་དོན་གྲལ་བཤེར་བྱེད་ཤུགས་སྔར་ལས་ཇེ་ཆེར་བཏང་ལ། ནད་དང་གནོད་འཚེ་སོགས་གློ་བུར་བྱུང་བའི་དོན་རྐྱེན་གནས་སྐབས་སུ་རོགས་སྐྱོར་ཁྱབ་ཁོངས་ཁྲོད་མ་ཚུད་པའི་དཀའ་ཁག་མང་ཚོགས་དུས་ཐོག་ཏུ་འགན་སྲུང་ཁྱབ་ཁོངས་ཁྲོད་བཞག་སྟེ། གཞི་རྩའི་འཚོ་བར་འགན་སྲུང་བཟང་བོ་བྱས། ཟླ་བཅུ་གཅིག་པའི་ཟླ་མཇུག་བར་དུ། ཞིང་ཆེན་ཡོངས་སུ་བསྡོམས་པས་ཡོང་སྒོ་དམའ་བའི་འགུལ་རྣམ་ལྟ་ཞིབ་མི་གྲངས་ས་ཡ་གཅིག་དང་ཁྲི་བཞི་སྟོང་གཅིག་དྲུག་བརྒྱ་ཡོད་པ་དང་། དེའི་ནང་གྲོང་གསེབ་ཀྱི་མ་མཐའི་འཚོ་བའི་འགན་སྲུང་ཁྲོད་ཚུད་པའི་མི་འབུམ་གསུམ་དང་ཁྲི་བཞི་སྟོང་དགུ་བཞི་བརྒྱ་ཡོད་ལ། ཧ་ཅང་དཀའ་ཁག་ཆེ་བའི་འཚོ་སྐྱོང་མི་གྲངས་ཁྲི་གཅིག་དང་སྟོང་བརྒྱད་བཞི་བརྒྱ་ཡོད་པ་དང་། མ་མཐའི་འཚོ་བའི་འགན་སྲུང་ཁྲོད་མ་ཚུད་ཀྱང་འཚོ་བར་དཀའ་ཁག་ཡོད་པའི་མི་གྲངས་འབུམ་གཅིག་དང་ཁྲི་དགུ་སྟོང་གསུམ་དགུ་བརྒྱ་ཡོད་ལ། འགྱུར་མེད་གཏོང་སྒོའི་དཀའ་ཁག་མི་གྲངས་ཁྲི་གཅིག་དང་སྟོང་དྲུག་བརྒྱད་བརྒྱ་ཡོད་པ་དང་། ཕྱིར་དབུལ་བོར་འགྱུར་བར་བཀག་འགོག་བྱེད་པའི་ལྟ་ཞིབ་བྱེད་ཡུལ་མི་གྲངས་ཁྲི་གཉིས་དང་སྟོང་གཉིས་བརྒྱད་བརྒྱ་ཡོད་ལ། དེ་ལས་གཞན་པའི་དཀའ་ཁག་མི་སྣ་འབུམ་བཞི་དང་ཁྲི་བཞི་བཞི་བརྒྱད་ཡོད་པ་དང་། བསྡོམས་པས་མི་ཁྲི་དགུ་དང་སྟོང་གཉིས་ཉིས་བརྒྱར་གནས་སྐབས་རོགས་སྐྱོར་བྱས་ལ། རོགས་སྐྱོར་མ་དངུལ་ཐེར་འབུམ་གཉིས་དང་དུང་ཕྱུར་བཞི་བྱེ་བ་བདུན་ས་ཡ་བཞི་ཡིས་འགྲོ་སོང་བཏང་།

དྲོད་འདོན་རོགས་སྐྱོར་བྱེད་པའི་སྟེང་ཤུགས་བཏོན། ཞིང་ཆེན་ཡོངས་ཀྱི་དམངས་སྲིད་སྡེ་ཁག་གིས་གྲོང་ཁྱེར་གྱི་མ་མཐའི་འཚོ་བའི་འགན་སྲུང་བྱེད་ཡུལ་དང་གྲོང་ཁྱེར་གྱི་ཧ་ཅང་དཀའ་ཁག་ཆེ་བའི་གསོ་སྐྱོང་བྱེད་ཡུལ་ཁྱིམ་ཚང་རེར་ལོ་རེར་སྒོར་སྟོང་གཅིག་དང་ཞིང་སྡེའི་མ་མཐའི་འགན་སྲུང་བྱེད་ཡུལ་དང་ཞིང་སྡེའི་ཧ་ཅང་དཀའ་ཁག་ཆེ་བའི་གསོ་སྐྱོང་བྱེད་ཡུལ་ཁྱིམ་ཚང་རེར་ལོ་རེར་སྒོར་བརྒྱད་བརྒྱ་སྟེར་བའི་ཚད་གཞི་ལྟ། གྲོང་གསེབ་ཀྱི་དཀའ་ཁག་མང་ཚོགས་ལ2024ལོའི་དགུན་དུས་ཀྱི་དྲོད་འདོན་རོགས་སྐྱོར་འདོན་སྤྲོད་བྱས། དུས་མཚུངས་སུ། ས་ཆ་སོ་སོའི་དམངས་སྲིད་སྡེ་ཁག་གིས་དཀའ་ཁག་མི་ཚོགས་གཞན་པའི་དགུན་དུས་ཀྱི་དྲོད་འདོན་དགོས་མཁོའི་གནས་བབ་ལ་ཧ་ཅང་མཐོང་ཆེན་བྱེད་པ་དང་། དགུན་དུས་ཀྱི་དྲོད་འདོན་ཐད་ནས་དཀའ་ཁག་ཡོད་པའི་ཁྱིམ་ཚང་ལ་དུས་ཐོག་ཏུ་གནས་སྐབས་ཀྱི་རོགས་སྐྱོར་ བྱེད་པ་སོགས་ཀྱི་བྱེད་ཐབས་བརྒྱུད་དེ་རོགས་སྐྱོར་འདོན་སྤྲོད་བྱས་ནས། རིགས་མི་འདྲ་བའི་འཚོ་བར་དཀའ་ཁག་ཡོད་པའི་མང་ཚོགས་ཀྱིས་དྲོད་ཁོལ་ལྡན་པའི་དགུན་ཁ་ཞིག་དང་བདེ་འཇགས་ཀྱི་དགུན་ཁ་ཞིག་རོལ་བར་ཁག་ཐེག་བྱེད་དགོས་པའི་རེ་བ་བཏོན། མིག་སྔའི་བར་དུ། བསྡོམས་པས་ཞིང་ཆེན་ཡོངས་ཀྱི་གྲོང་གསེབ་ཀྱི་འཚོ་བར་དཀའ་ཁག་ཡོད་པའི་ཁྱིམ་ཚང་འབུམ་གཅིག་དང་ཁྲི་དྲུག་སྟོང་གཅིག་ལྔ་བརྒྱར་དྲོད་འདོན་རོགས་སྐྱོར་མ་དངུལ་སྒོར་དུང་ཕྱུར་གཅིག་དང་བྱེ་བ་གསུམ་ས་ཡ་བདུན་བྱིན།

བྱ་བའི་ཕན་འབྲས་ཇེ་མཐོར་གཏོང་བའི་སྟེང་ཤུགས་བཏོན། ཟླ10པའི་ཚེས15ཉིན་ནས་བཟུང་། ཞིང་ཆེན་ཡོངས་ཀྱི་ཁྱབ་ཁོངས་ནས་དགུན་དུས་དྲོད་ཁོལ་སྐྱེལ་བའི་ཆེད་དོན་རོགས་སྐྱོར་འགུལ་སྐྱོད་སྤེལ་བ་དང་། རོགས་སྐྱོར་དོ་དམ་སྡེ་ཁག་གིས་དུས་ཚོད་ཉེར་བཞིའི་རིང་གི་སྣེ་ལེན་ཞབས་ཞུ་ལག་བསྟར་བྱས་ལ། དུས་ཚོད་ཉེར་བཞིའི་རིང་གི་ཞབས་ཞུ་རོགས་སྐྱོར་ཁ་པར་བཙུགས། ཆེད་དོན་རོགས་སྐྱོར་སྤེལ་བའི་ཚུན་དུ། བསྡོམས་པས་སློང་མོ་བ་སྟོང་གཅིག་དང་ལྔ་བརྒྱ་ཞེ་བཞི་ལ་རོགས་སྐྱོར་བྱས་པ་དང་། ཟས་རིགས་དང་གྱོན་ཆས། འགོག་སྲུང་དངོས་རྫས་སོགས་སྟོང་གཅིག་དང་རེ་གཅིག་བྱིན།