ཧན་ཀྲིན་གྱིས་ཀྲུང་གོ་དང་ཧྥ་རན་སིའི་བརྒྱུད་ལམ་གཉིས་པའི་མཐོ་རིམ་གྲོས་མོལ་ཚོགས་འདུ་སྐབས་དྲུག་པའི་ཧྥ་རན་སི་ཕྱོགས་ཀྱི་འཐུས་ཚབ་ཚོགས་པར་མཇལ་འཕྲད་གནང་།

ཟླ12པའི་ཚེས11ཉིན། རྒྱལ་ཁབ་ཀྱི་ཀྲུའུ་ཞི་གཞོན་པ་ཧན་ཀྲིན་གྱིས་པེ་ཅིང་དུ། ཀྲུང་གོ་དང་ཧྥ་རན་སིའི་བརྒྱུད་ལམ་གཉིས་པའི་མཐོ་རིམ་གྲོས་མོལ་ཚོགས་འདུ་སྐབས་དྲུག་པའི་ཧྥ་རན་སི་ཕྱོགས་ཀྱི་འཐུས་ཚབ་ཚོགས་པར་མཇལ་འཕྲད་གནང་།

ཧན་ཀྲིན་གྱིས་ཀྲུའུ་ཞི་ཞི་ཅིན་ཕིང་དང་ཙུང་ཐུང་མ་ཁི་ལུང་ལོ་འདིའི་ནང་དུ་ཐེངས་གཉིས་ལ་མཇལ་འཕྲད་གནང་ནས། ཕན་ཚུན་བར་ཐུན་མོང་གི་ངོས་འཛིན་གལ་ཆེན་མང་པོ་བྱུང་སྟེ། རྒྱལ་ཁབ་གཉིས་ཀའི་འབྲེལ་བ་འཕེལ་རྒྱས་འགྲོ་རྒྱུར་སྣེ་ཁྲིད་བྱེད་ཀྱིན་ཡོད། ཀྲུང་གོ་དང་ཧྥ་རན་སི་གཉིས་ཀ་འཛམ་གླིང་སྟེང་ཤུགས་རྐྱེན་ཆེ་བའི་རྒྱལ་ཁབ་ཆེན་པོ་གཉིས་ཡིན་པ་དང་། རྒྱལ་ཁབ་གཉིས་ཀྱི་འབྲེལ་བར་ཕྱོགས་གཉིས་ལས་བརྒལ་བའི་འཐབ་ཇུས་ཀྱི་དོན་སྙིང་ཆེན་པོ་ལྡན། ད་ལོ་ནི་ཀྲུང་གོ་དང་ཧྥ་རན་སི་རྒྱལ་ཁབ་གཉིས་བར་འབྲེལ་བ་བཙུགས་ནས་ལོ60འཁོར་བའི་ལོ་ཡིན་པས། ཀྲུང་གོ་ཕྱོགས་ཀྱིས་ཧྥ་རན་སི་ཕྱོགས་དང་མཉམ་དུ། རྒྱལ་ཁབ་གཉིས་ཀའི་གཙོ་འཛིན་བར་བྱུང་བའི་ཐུན་མོང་གི་ངོས་འཛིན་གལ་ཆེན་དོན་འཁྱོལ་ཡག་པོ་བྱས་ནས། ཕན་ཚུན་བར་ཡིད་ཆེས་དང་མཉམ་ལས་ཟབ་སྤེལ་གཏོང་བ་དང་གནམ་གཤིས་འགྱུར་ལྡོག་སོགས་འཛམ་གླིང་ཧྲིལ་པོའི་རང་བཞིན་གྱི་འགྲན་སློང་ལ་མཉམ་དུ་ཁ་གཏད་འཇལ་ཏེ། རྒྱལ་ཁབ་གཉིས་ཀའི་ཁྱོན་ཡོངས་འཐབ་ཇུས་རོགས་རེས་འབྲེལ་བར་གྲུབ་འབྲས་གསར་པ་སྔར་ལས་གང་མང་ཐོབ་རྒྱུར་སྐུལ་འདེད་གཏོང་འདོད་ཡོད་ཅེས་གསུངས།

ཧྥ་རན་སི་ཕྱོགས་ཀྱི་འཐུས་ཚབ་ཚོགས་པའི་ཀྲུའུ་ཞི་པོ་ནཱ་ཨར་གྱིས་རྒྱལ་ཁབ་གཉིས་ཀའི་བར་གྱི་འབྲེལ་བར་ལོ་རྒྱུས་ཡུན་རིང་ལྡན་པ་དང་མཉམ་ལས་ལ་ཕན་འབྲས་ཆེན་པོ་ལྡན། ཕྱོགས་གཉིས་ཀས་དགེ་མཚན་ལྡན་པའི་གྲོས་མོལ་བྱས་པ་བརྒྱུད་དེ། ཕན་ཚུན་རྒྱུས་ལོན་ཟབ་མོ་བྱེད་པ་དང་ལེགས་ཆ་གསབ་རེས་བྱས་ནས་མཉམ་དུ་འགྲན་སློང་བསུས་ནས། ཧྥ་རན་སི་དང་ཀྲུང་གོ་དང་ཡོ་རོབ་དང་ཀྲུང་གོའི་འབྲེལ་བ་བདེ་ཐང་དང་བརྟན་པོའི་ངང་འཕེལ་རྒྱས་འགྲོ་རྒྱུར་སྐུལ་འདེད་གཏོང་འདོད་ཡོད་ཅེས་བསྟན།