ལི་ཆང་གིས་རྒྱལ་སྤྱིའི་དཔལ་འབྱོར་རྩ་འཛུགས་ཀྱི་འགན་འཁུར་པ་གཙོ་བོ་དང་མཉམ་དུ"1+10"ཡི་གླེང་མོལ་ཚོགས་འདུ་བསྡུས་པ།

ཞིན་ཧྭ་གསར་འགྱུར་འགྱུར་ཁང་གི་གློག་འཕྲིན་ལྟར། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆང་གིས་ཚེས8དང9ཉིན་པེ་ཅིན་དུ་ཀྲུང་གོར་ཀྲུང་གོ་དང་རྒྱལ་སྤྱིའི་དཔལ་འབྱོར་རྩ་འཛུགས་བཅུའི་གླེང་མོལ་ཚོགས་འདུར་ཞུགས་པའི་གསར་སྤེལ་དངུལ་ཁང་གསར་པའི་མགོ་གཙོ་ལུའོ་སའེ་ཧྥུའུ་དང་འཛམ་གླིང་དངུལ་ཁང་གི་མགོ་གཙོ་ཕིན་ཨན་ཅེ། འཛམ་གླིང་ཚོང་དོན་རྩ་འཛུགས་ཀྱི་སྤྱི་ཁྱབ་ལས་འཛིན་དབྱི་ཝེ་ལཱ། རྒྱལ་སྤྱིའི་དངུལ་ལོར་ཐེབས་རྩ་རྩ་འཛུགས་ཀྱི་སྤྱི་འདོམས་པ་ཀི་ཨོར་ཅི་ཡེ་ཝ་བཅས་ལ་སོ་སོར་ཐུག་འཕྲད་གནང་། 

ལི་ཆང་གིས་ད་ལོར་ཀྲུང་གོའི་དཔལ་འབྱོར་འཁོར་སྐྱོད་སྤྱིའི་ཆ་ནས་བརྟན་པོ་དང་བརྟན་པོའི་ཁྲོད་འཕེལ་རྒྱས་བྱུང་ཡོད། ཉེ་དུས་ང་ཚོས་བསྟུད་མར་འཕར་འབོར་གྱི་སྲིད་ཇུས་རབ་དང་རིམ་པ་བཏོན་པས། དཔལ་འབྱོར་བསྐྱར་འཕེལ་དང་བཟང་ཕྱོགས་སུ་འཕེལ་ཚུལ་སྔར་ལས་མངོན་གསལ་ཡིན་པ་དང་། སྒུལ་ནུས་གསར་པ་འཕེལ་རྒྱས་སྟོབས་ཆེར་འགྲོ་བཞིན་ཡོད། ང་ཚོས་དུས་འཁོར་ལས་ལྡོག་པའི་སྙོམས་སྒྲིག་བྱེད་ཤུགས་མུ་མཐུད་དུ་ཆེ་རུ་གཏོང་བ་དང་། ནང་མཁོ་རྒྱ་ཆེར་གཏོང་བ་དང་འཛད་སྤྱོད་ལ་སྐུལ་འདེད་གཏོང་བ་སོགས་ཀྱི་ཐད་འབད་བརྩོན་སྔར་ལས་ཆེན་པོ་བྱེད་པ། ཀྲུང་གོའི་དཔལ་འབྱོར་རྒྱུན་མཐུད་ངང་ཇེ་ལེགས་སུ་འགྲོ་རྒྱུར་སྐུལ་འདེད་བཏང་ནས་འཛམ་གླིང་གི་དཔལ་འབྱོར་སླར་གསོ་ཡོང་ཆེད་སྒུལ་ཤུགས་སྔར་ལས་མང་པོ་སྣོན་དགོས་ཞེས་བསྟན།

ལི་ཆང་གིས་ཀྲུང་གོ་ཕྱོགས་ཀྱིས་གསར་སྤེལ་དངུལ་ཁང་གི་མི་སྣ་རྒྱུན་མཐུད་ངང་ཇེ་མང་དུ་གཏོང་རྒྱུར་རྒྱབ་སྐྱོར་བྱས་ཏེ་ཕྱོགས་གཉིས་ཀྱི་རྣམ་གྲངས་དང་མ་དངུལ་བསྡུ་སྒྲིལ་གྱི་མཉམ་ལས་རྒྱ་ཆེར་གཏོང་འདོད་ཡོད། ཀྲུང་གོ་ཕྱོགས་ཀྱིས་འཛམ་གླིང་དངུལ་ཁང་དང་མཉམ་དུ་རྒྱལ་སྤྱིའི་འཕེལ་རྒྱས་དང་། དངུལ་བུན། ཤེས་བྱ་སོགས་ཁྱབ་ཁོངས་ཀྱི་མཉམ་ལས་ལ་ཤུགས་སྣོན་བརྒྱབ་ནས་མཉམ་ལས་ཀྱི་སྤུས་ཚད་མཐོར་འདེགས་གཏོང་བ་དང་ཕན་འབྲས་ཆེ་རུ་གཏོང་རྒྱུར་སྐུལ་འདེད་གཏོང་འདོད་ཡོད། ཀྲུང་གོ་ཕྱོགས་ཀྱིས་འཛམ་གླིང་ཚོང་དོན་རྩ་འཛུགས་ལ་དགོས་ངེས་ཀྱི་སྒྱུར་བཅོས་བྱ་རྒྱུར་རྒྱབ་སྐྱོར་བྱས་ནས་དཔལ་འབྱོར་གོ་ལ་ཅན་དང་རང་མོས་ཚོང་དོན་སྲུང་སྐྱོང་བྱ་རྒྱུ་ཡིན། ཀྲུང་གོ་ཕྱོགས་ཀྱིས་རྒྱལ་སྤྱིའི་དངུལ་ལོར་ཐེབས་རྩ་རྩ་འཛུགས་དང་མཉམ་ལས་གཏིང་ཟབ་བྱས་ཏེ་གོ་ལ་ཧྲིལ་པོའི་དངུལ་རྩ་བརྟན་པོ་ཡོང་རྒྱུར་སྲུང་སྐྱོང་བྱེད་པ་དང་། མཉམ་དུ་འཕེལ་རྒྱས་འགྲོ་རྒྱུར་སྐུལ་འདེད་གཏོང་བ། གནམ་གཤིས་འགྱུར་ལྡོག་ལ་ཁ་གཏད་གཅོག་པ་སོགས་ཀྱི་ཁྱབ་ཁོངས་ནང་ལེགས་སྐྱེས་སྔར་ལས་ཆེ་བ་འབུལ་འདོད་ཡོད་ཅེས་བསྟན། 

གསར་སྤེལ་དངུལ་ཁང་གསར་པ་དང་འཛམ་གླིང་དངུལ་ཁང་། འཛམ་གླིང་ཚོང་དོན་རྩ་འཛུགས། ཐེབས་རྩ་རྩ་འཛུགས་བཅས་ཀྱི་འགན་འཁུར་པས་ཀྲུང་གོས་དཔལ་འབྱོར་འཕར་རྒྱུར་སྐུལ་འདེད་གཏོང་བ་དང་། ཚོང་གཉེར་ཁོར་ཡུག་ཇེ་ལེགས་སུ་གཏོང་བ། ཕྱི་ཕྱོགས་སུ་སྒོ་མོ་འབྱེད་རྒྱ་ཆེ་རུ་གཏོང་བ་བཅས་ཀྱི་ཐད་བྱེད་ཐབས་ནུས་ལྡན་སྤྱད་པར་ཕན་འབྲས་མངོན་གསལ་བླངས་ནས་གོ་ལ་ཧྲིལ་པོའི་དཔལ་འབྱོར་འཕར་རྒྱུར་སྒུལ་ཤུགས་དང་ཡིད་ཆེས་བསྣན་ཡོད། ཀྲུང་གོས་དུས་ཡུན་རིང་པོའི་ནང་རྒྱལ་སྤྱིའི་དཔལ་འབྱོར་རྩ་འཛུགས་བྱ་བར་རྒྱབ་སྐྱོར་བྱས་ནས་སྔར་ལས་ཤུགས་ཡོད་དང་ཕྱོགས་ཡོངས་ཀྱི་ཀྲུང་གོ་དང་མཉམ་ལས་བྱེད་པའི་འབྲེལ་བ་འཕེལ་རྒྱས་གཏོང་རྒྱུར་འབད་བརྩོན་བྱེད་པ་དང་། ཕྱོགས་མང་རིང་ལུགས་དང་རང་མོས་ཚོང་དོན་སྲུང་སྐྱོང་བྱེད་པ། འཕེལ་རྒྱས་མཉམ་སྤྱོད་དང་དར་རྒྱས་ལ་མཉམ་དུ་སྐུལ་འདེད་གཏོང་བ་བཅས་བྱས་པར་ཐུགས་རྗེ་ཆེ་ཞུ་རྒྱུ་ཡིན་ཞེས་བསྟན། 

ཝུའུ་ཀྲིན་ལུང་གོང་གསལ་གྱི་ཐུག་འཕྲད་ལ་ཞུགས།  །