2024ལོའི་མཚོ་འགག་ངོགས་གཉིས་ཀྱི་ཁེ་ལས་པའི་རྩེ་ཚོགས་ལོ་ཚོགས་བསྡུས་པ།

ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། 2024ལོའི་མཚོ་འགག་ངོགས་གཉིས་ཀྱི་ཁེ་ལས་པའི་རྩེ་ཚོགས་ལོ་ཚོགས་ཚེས9ཉིན་ཞ་མོན་གྲོང་ཁྱེར་དུ་བསྡུས། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ལས་ཨུ་ཡོན་ནམ། རྒྱལ་ཡོངས་སྲིད་གྲོས་ཀྱི་ཀྲུའུ་ཞི་ཝང་ཧུའུ་ཉིང་གིས་འགྲམ་ངོགས་གཉིས་ཀྱི་ཁེ་ལས་པའི་རྩེ་ཚོགས་ལས་འཛིན་ལྷན་ཚོགས་ལ་རྟེན་འབྲེལ་འཕྲིན་ཡིག་སྤྲིངས་པ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་དང་ཀྲུང་གུང་ཀྲུང་དབྱང་གི་ཚབ་བྱས་ཏེ་ལོ་ཚོགས་འཚོགས་པར་རྟེན་འབྲེལ་ཞུས་པར་མ་ཟད། རྩེ་ཚོགས་ཀྱི་ཁོངས་མི་ཡོངས་དང་ཚོགས་ཞུགས་སྐུ་མགྲོན་རྣམས་ལ་འཚམས་འདྲི་གནང་།

ཝང་ཧུའུ་ཉིང་གིས་ལོ་ངོ་མང་པོའི་རིང་ལ། མཚོ་འགག་ངོགས་གཉིས་ཀྱི་ཁེ་ལས་པའི་རྩེ་ཚོགས་ཀྱིས་མཚོ་འགག་ངོགས་གཉིས་ཀྱི་ཁེ་ལས་དང་བཟོ་ཚོང་ལས་རིགས་ཀྱི་མི་སྣར་རྒྱ་ཁྱབ་ངང་མཐུན་སྒྲིལ་བྱས་ནས་མཚོ་འགག་ངོགས་གཉིས་ཀྱི་འབྲེལ་བ་ཞི་བའི་འཕེལ་རྒྱས་དང་མཉམ་འདྲེས་འཕེལ་རྒྱས་ཡོང་བར་སྐུལ་འདེད་གཏོང་ཆེད་ལེགས་སྐྱེས་གལ་ཆེན་ཕུལ་ཡོད། དུས་རབས་གསར་པའི་སྐྱོད་ལམ་གསར་པའི་སྟེང་མཚོ་འགག་ངོགས་གཉིས་ཀྱི་ཁེ་ལས་པའི་རྩེ་ཚོགས་ཀྱིས་འབྲེལ་ཟམ་དང་འབྲེལ་ཐག་གི་ནུས་པ་མུ་མཐུད་དུ་འདོན་སྤེལ་བྱས་ནས། མཚོ་འགག་ངོགས་གཉིས་ཀྱི་བརྗེ་རེས་དང་འགྲོ་འོང་གཏིང་ཟབ་ཏུ་གཏོང་བ་དང་། མཚོ་འགག་ངོགས་གཉིས་ཀྱི་དཔལ་འབྱོར་མཉམ་ལས་སྤུས་ཚད་མཐོ་བའི་ངང་འཕེལ་རྒྱས་འགྲོ་བར་སྐུལ་འདེད་གཏོང་བ། ཀྲུང་ཧྭ་མི་རིགས་ཀྱི་དཔལ་འབྱོར་སྟོབས་ཆེར་བཏང་ཡོད་ཅེས་བསྟན།

ཝང་ཧུའུ་ཉིང་གིས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་སྟེང་བཅོས་སྒྱུར་ཁྱོན་ཡོངས་ནས་གཏིང་ཟབ་ཏུ་གཏོང་བ་དང་། ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་རྒྱུའི་ཐད་བརྒྱུད་རིམ་ལྡན་པའི་བཀོད་སྒྲིག་བྱས་ནས་མཚོ་འགག་ངོགས་གཉིས་ཀྱི་བརྗེ་རེས་མཉམ་ལས་དང་། ཐུན་མོང་འཕེལ་རྒྱས། གཉིས་ཕན་མཉམ་རྒྱལ་བཅས་ལ་སྒུལ་ནུས་གསར་པ་དང་གོ་སྐབས་གསར་པ་མཁོ་འདོན་བྱས་ཡོད། ང་ཚོས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་ལག་བསྟར་གཏིང་ཟབ་བྱེད་པ་དང་། ཀྲུང་གོ་གཅིག་གི་རྩ་དོན་དང“གོ་གཉིས་ལོའི་ཐུན་མོང་ངོས་འཛིན”རྒྱུན་འཁྱོངས། “ཐའེ་ཝན་རང་བཙན”གྱི་ཁ་བྲལ་དང་ཕྱི་ཕྱོགས་ཀྱི་ཐེ་གཏོགས་ལ་ངོ་རྒོལ་མཐའ་གཅིག་ཏུ་བྱེད་པ། མཚོ་འགག་ངོགས་གཉིས་ཀྱི་དཔལ་འབྱོར་དང་རིག་གནས་བརྗེ་རེས་མཉམ་ལས་ལ་སྐུལ་འདེད་གཏོང་བ། མཚོ་འགག་ངོགས་གཉིས་ཀྱི་ཁྱབ་ཁོངས་སོ་སོའི་མཉམ་འདྲེས་འཕེལ་རྒྱས་གཏིང་ཟབ་ཏུ་གཏོང་བ། ཐའེ་ཝན་སྤུན་ཟླ་དང་ཐའེ་ཝན་ཁེ་ལས་ཀྲུང་གོའི་ལུགས་ཀྱི་དེང་རབས་ཅན་གྱི་འཛུགས་སྐྲུན་ནང་ཞུགས་རྒྱུར་རྒྱབ་སྐྱོར་བྱེད་པ། མེས་རྒྱལ་སྐམ་ས་ཆེན་མོའི་འཕེལ་རྒྱས་ཡར་ཐོན་གྱི་གྲུབ་འབྲས་མཉམ་སྤྱོད་བྱེད་པ། མཚོ་འགག་ངོགས་གཉིས་ཀྱི་སྤུན་ཟླའི་མཛའ་བརྩེ་དང་བདེ་སྐྱིད་ཆེ་རུ་གཏོང་བ་བཅས་བྱེད་དགོས་ཞེས་བསྟན།

ཝང་ཧུའུ་ཉིང་གིས་མཚོ་འགག་ངོགས་གཉིས་ཀྱི་སྤུན་ཟླ་དང་མཚོ་འགག་ངོགས་གཉིས་ཀྱི་ཁེ་ལས་པས་མི་རིགས་ཀྱི་བདེན་དོན་རྒྱུན་འཁྱོངས་དང་། དུས་རབས་ཀྱི་རླབས་རྒྱུན་དང་བསྟུན་པ། མཚོ་འགག་ངོགས་གཉིས་ཀྱི་འབྲེལ་བའི་འཕེལ་རྒྱས་ཀྱི་ཡང་དག་པའི་ཁ་ཕྱོགས་སྟངས་འཛིན་བཅས་བྱས་ཏེ་ཀྲུང་ཧྭ་མི་རིགས་ཀྱི་ལས་དབང་དེ་ཀྲུང་གོ་བ་རང་ཉིད་ཀྱི་ལག་ཏུ་དམ་པོར་བཟུང་ནས་མེས་རྒྱལ་གཅིག་གྱུར་དང་མི་རིགས་བསྐྱར་དར་གྱི་འོད་སྟོང་འཕྲོ་བའི་ལེའུ་མཉམ་དུ་རྩོམ་པའི་རེ་བ་ཡོད་ཅེས་བསྟན། 

རྩེ་ཚོགས་ཀྱི་སྐམ་ས་ཆེན་མོའི་ཕྱོགས་ཀྱི་ལས་འཛིན་མགོ་གཙོ་ཀའོ་ཅིན་ལུང་དང་ཐའེ་ཝན་ཕྱོགས་ཀྱི་ལས་འཛིན་མགོ་གཙོ་ལིའུ་ཀྲའོ་ཞན་སོགས་ལོ་ཚོགས་ལ་ཞུགས། ཐེངས་འདིའི་རྩེ་ཚོགས་ལོ་ཚོགས་ཀྱི་བརྗོད་དོན་ནི“འགྲམ་ངོགས་གཉིས་ཀྱི་དུས་རབས་གསར་པའི་ཐོན་ལས་ཕྲེང་འབྲེལ་བཏོད་དེ་མཚོ་འགག་ངོགས་གཉིས་ཀྱི་དཔལ་འབྱོར་མཉམ་འདྲེས་འཕེལ་རྒྱས་ལ་སྐུལ་འདེད་གཏོང་དགོས”ཞེས་པ་དེ་ཡིན་ཞིང་། དེའི་ཁྲོད་མགོ་རྩོམ་མཛད་སྒོ་དང་བརྗོད་དོན་གཏམ་བཤད། རྩེ་ཚོགས་ཀྱི་ཐོན་ལས་མཉམ་ལས་སོ་སོའི་སྐུལ་འདེད་ཚན་ཆུང་གི་ཆེད་དོན་གླེང་སྟེགས་དང་ལོ་ཚོགས་སྤྱི་སྡོམ་སོགས་ཀྱི་བྱེད་སྒོ་ཚུད་ཡོད་ལ། མཚོ་འགག་ངོགས་གཉིས་ཀྱི་བཟོ་ཚོང་ལས་རིགས་ཀྱི་མི་སྣ700ལྷག་ཙམ་ལོ་ཚོགས་ལ་ཞུགས་ཡོད།།