ཧི་ལུའུ་ཁྲུན་གྱིས་ཟི་ལིང་ཞིན་ཧྭ་ལེན་བྱིས་པའི་སྤྲོ་གླིང་གི་བདེ་འཇགས་ཐོན་སྐྱེད་དང་སྤྱི་ཚོགས་བརྟན་འཇགས་བྱ་བར་རྟོག་ཞིབ་བྱས།

ཟླ12པའི་ཚེས7ཉིན། ཞིང་ཆེན་ཏང་ཨུའི་རྒྱུན་ལས་ཨུ་ཡོན། ཞིང་ཆེན་ཏང་ཨུའི་སྲིད་ཁྲིམས་ཨུ་ཡོན་ལྷན་ཁང་གི་ཧྲུའུ་ཅི་ཧི་ལུའུ་ཁྲུན་ཟི་ལིང་གྲོང་ཁྱེར་ཞིན་ཧྭ་ལེན་བྱིས་པའི་སྤྲོ་གླིང་དུ་སོང་ནས་བདེ་འཇགས་ཐོན་སྐྱེད་དང་སྤྱི་ཚོགས་གཏན་འཇགས་བྱ་བར་རྟོག་ཞིབ་བྱས། 

ཧི་ལུའུ་ཁྲུན་སྔ་གཞུག་ཏུ་རྒྱ་མཚོའི་སྤྱི་གླིང་དང་སེ་འབྲུ་ར་བ། རྒྱ་མཚོའི་མགྲོན་ཁང་གི་ཡུལ་དངོས་སུ་སོང་ནས་བདེ་འཇགས་ཐོན་སྐྱེད་དང་སྤྱི་ཚོགས་གཏན་འཇགས་ཀྱི་གནས་ཚུལ་ལ་ལྟ་ཞིབ་བྱས། ཁོས་ནན་གྱིས་བསྟན་དོན། སྤྱི་ཐུན་བདེ་འཇགས་ནི་དཔལ་འབྱོར་སྤྱི་ཚོགས་འཕེལ་རྒྱས་ཀྱི་རྨང་རྡོ་ལྟ་བུ་ཡིན་པ་དང་། ཞིན་ཧྭ་ལེན་བྱིས་པའི་སྤྲོ་གླིང་ནི་ཟི་ལིང་གྲོང་ཁྱེར་གྱི་མི་ཚོགས་ཆེ་ས་དང་རྩེད་འཇོ་བྱེད་ས་ཡིན་པའི་ཆ་ནས། སྤྱི་ཚོགས་བདེ་འཇགས་གཏན་འཇགས་བྱ་བ་བཟང་བོར་བསྒྲུབ་པར་དོན་སྙིང་གལ་ཆེན་ལྡན་པས། རིམ་པ་སོ་སོ་དང་སྡེ་ཁག་སོ་སོས་ཞིང་ཆེན་ཡོངས་ཀྱི་བདེ་འཇགས་ཐོན་སྐྱེད་དང་སྤྱི་ཚོགས་གཏན་འཇགས་བྱ་བའི་གྲོས་ཚོགས་ཀྱི་བཀོད་སྒྲིག་ལག་བསྟར་ནན་མོ་བྱེད་པ་དང་། འཕེལ་རྒྱས་དང་བདེ་འཇགས་ལ་གཅིག་འདོམས་བྱེད་པ། ནམ་ཡང་ཉེན་ཟོན་བྱེད་པ་དང་དམ་འཛིན་བྱས་ཏེ། སྟོབས་ཤུགས་ཡོད་རྒུས་བདེ་འཇགས་ཐོན་སྐྱེད་དང་སྤྱི་ཚོགས་གཏན་འཇགས་ཀྱི་བྱ་བ་སྣ་ཚོགས་དམ་འཛིན་བྱེད་དགོས། འགོག་སྒོ་སྔོན་སྣུར་བྱེད་པ་དང་འགོ་ཁུངས་ནས་འགོག་ཟོན་བྱེད་པ། མ་ལག་སྒོས་སྲིད་ཇུས་སྤྱོད་པ་རྒྱུན་འཁྱོངས་བྱེད་པ་དང་། ཁྲིམས་འབྲེལ་ཞུ་གཏུག་དང་ཞིང་པ་ཞོར་ལས་པའི་ཟླ་ཕོགས་ཆད་འཇོག ཁང་ཁོངས་སྡེ་ལས་སོགས་ཕྱོགས་ཀྱི་འགལ་རྩོད་གྲལ་བཤེར་བྱས་ནས། ཉེན་ཁ་འགོ་ཁུངས་ནས་འགོག་ཟོན་བྱེད་པ་དང་འགལ་རྩོད་དུས་ཐོག་ཏུ་ཐག་གཅོད་པར་སྐུལ་འདེད་གཏོང་དགོས། བདེ་འཇགས་འགན་སྲུང་བྱེད་ཐབས་སྣ་ཚོགས་ལག་བསྟར་ནན་མོ་བྱེད་པ་དང་། སྒྲིག་ཆས་བདེ་འཇགས་དང་མེ་གསོད་བདེ་འཇགས། ཟས་རིགས་བདེ་འཇགས། སྤྱི་ཐུན་ཡུལ་གནས་ཀྱི་བདེ་འཇགས་སོགས་བྱ་བ་གོ་གནས་སྔར་ལས་གཙོ་བོར་འཇོག་པ། དམིགས་བསལ་སྒྲིག་ཆས་ཀྱི་གསོ་སྐྱོང་ཞིབ་བཤེར་ལ་ཤུགས་སྣོན་པ། ཉིན་རྒྱུན་གྱི་སྐོར་ཞིབ་དང་ཉེན་ཁ་གྲལ་བཤེར་བཅོས་སྐྱོང་བྱེད་པའི་བྱ་བ་བཟང་བོར་བསྒྲུབ་པ། གློ་བུར་བྱུང་བའི་དོན་རྐྱེན་གྱི་འཕྲལ་བསྟུན་ཇུས་གཞི་འཐུས་ཚང་དུ་བཏང་སྟེ། སྟོབས་ཤུགས་ཡོད་རྒུས་སྤྱི་ཚོགས་བདེ་འཇགས་དང་གཏན་འཇགས་ལ་སྲུང་སྐྱོབ་བྱེད་དགོས། འགན་བསྟར་ནན་མོ་བྱེད་པ་དང་འགན་འཛོལ་བྱས་ན་འགན་འཁྲི་རྩད་གཅོད་བྱེད་རྒྱ་རྒྱུན་འཁྱོངས་བྱེད་པ་དང་། ཕྱོགས་སོ་སོའི་འགན་འཁྲི་གཏན་ཁེལ་གསལ་བོ་བྱེད་པ། བདེ་འཇགས་ཉེན་ཁའི་གནད་དོན་གྱི་གསལ་ཁྲ་དང་འགན་འཁྲི་གསལ་ཁྲ་འཛུགས་པ། ཐོ་བསུབ་དོ་དམ་ལག་བསྟར་བྱེད་པ། མཉམ་ལས་གཞོགས་འདེགས་ལ་ཤུགས་སྣོན་པ། བདེ་འཇགས་ལ་འགན་སྲུང་བྱེད་པ་དང་གཏན་འཇགས་ལ་སྐུལ་འདེད་གཏོང་བའི་མཉམ་ཤུགས་ཆེན་པོ་གཅིག་ཏུ་བསྡུས་ནས། ཞིང་ཆེན་ཡོངས་ཀྱི་དཔལ་འབྱོར་སྤྱི་ཚོགས་འཕེལ་རྒྱས་སུ་གཏོང་བའི་ཐད་ཁོར་ཡུག་བཟང་བོ་བསྐྲུན་དགོས།