ལིས་ཆང་གིས་རྒྱལ་སྲིད་སྤྱི་ཁྱབ་ཁང་གི་བཀའ་རྒྱར་མཚན་བཀོད།

རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཆང་གིས་ཉིན་འགའི་སྔོན་རྒྱལ་སྲིད་སྤྱི་ཁྱབ་ཁང་གི་བཀའ་རྒྱར་མཚན་བཀོད་ནས། བཟོ་བཅོས་བྱས་ཟིན་པའི《རྒྱལ་ཁབ་རང་བྱུང་ཚན་རིག་ཐེབས་རྩའི་སྲོལ་ཡིག》སྤྱི་བསྒྲགས་བྱས་པ་དང་། 2025ལོའི་ཟླ1ཚེས1ཉིན་ནས་བཟུང་ལག་བསྟར་བྱ་རྒྱུ་རེད། 《སྲོལ་ཡིག》དེར་ཁྱོན་སྡོམ་ལེའུ7དང་དོན་ཚན45ཡོད་པ་དང་བཟོ་བཅོས་བྱས་པའི་ནང་དོན་གཙོ་བོ་གཤམ་གསལ་ལྟར།

གཅིག་ནི་ཏང་ཀྲུང་དབྱང་གི་གཅིག་སྡུད་གཅིག་གྱུར་གྱི་འགོ་ཁྲིད་རྒྱུན་འཁྱོངས་བྱས་ནས་བྱ་བའི་རྩ་དོན་གསལ་བོར་བཟོས་པ།     རྒྱལ་ཁབ་ཀྱི་རང་བྱུང་ཚན་རིག་ཐེབས་རྩའི་བྱ་བའི་ཐད་ཏང་ཀྲུང་དབྱང་གི་གཅིག་སྡུད་གཅིག་གྱུར་གྱི་འགོ་ཁྲིད་རྒྱུན་འཁྱོངས་བྱེད་པར་འཛམ་གླིང་ཚན་རྩལ་གྱི་མདུན་གྲལ་ལ་ཕྱོགས་པ་དང་།    དཔལ་འབྱོར་གྱི་གཡུལ་ས་གཙོ་བོར་ཕྱོགས་པ།    རྒྱལ་ཁབ་ཀྱི་དགོས་མཁོ་གལ་ཆེན་ལ་ཕྱོགས་པ།    མི་དམངས་ཀྱི་ཚེ་སྲོག་བདེ་ཐང་ལ་ཕྱོགས་པ་བཅས་བྱེད་དགོས་པ་དང་།     རྒྱལ་ཁབ་རང་བྱུང་ཚན་རིག་ཐེབས་རྩ་ནི་རྨང་གཞིའི་ཞིབ་འཇུག་ལ་རོགས་དངུལ་སྤྲོད་པར་སྤྱོད་པ་དང་།    ཤེས་ལྡན་མི་སྣ་གསོ་སྐྱོང་དང་དཔུང་ཁག་འཛུགས་པར་རྒྱབ་སྐྱོར་བྱེད་པ།    སྤྱི་བསྒྲགས་དང་དྲང་བདེན། དྲང་གཞག་བཅས་ཀྱི་རྩ་དོན་བརྩི་སྲུང་བྱེད་པ་བཅས་གསལ་བོར་བཏོན།    ཐེབས་རྩའི་རོགས་དངུལ་ལས་གཞི་གཏན་འཁེལ་བྱེད་སྐབས་རང་དབང་གིས་འཚོལ་ཞིབ་བྱེད་པར་སྐུལ་མ་གཏོང་དགོས་ལ་དམིགས་འབེན་གྱི་ཁྲིད་ཕྱོགས་རྒྱུན་འཁྱོངས་ཀྱང་བྱེད་དགོས་པ་གཏན་ལ་ཕབ།

གཉིས་ནི་དོ་དམ་ལམ་ལུགས་འཐུས་ཚང་དུ་བཏང་ནས་ཚན་རྩལ་གསར་སྐྲུན་གྱི་འཕེལ་རྒྱས་དང་ཁ་ཕྱོགས། བླང་བྱ་གསར་པ་དང་འཚམ་པར་བྱས།     ཐེབས་རྩའི་དོ་དམ་ལས་ཁུངས་དང་འབྲེལ་ཡོད་སྡེ་ཁག དེ་མིན་རྒྱབ་རྟེན་ལས་ཁུངས་བཅས་ཀྱི་བྱ་བའི་འགན་འཁྲི་གཏན་འབེབས་བྱས།   ཐེབས་རྩའི་ཡོང་ཁུངས་གཙོ་བོ་ནི་ཀྲུང་དབྱང་གི་སྔོན་རྩིས་ཀྱིས་གྲོན་དངུལ་གཏོང་བ་དེ་ཡིན། དེ་དང་ཆབས་ཅིག་སྣ་མང་ཅན་གྱི་དངུལ་གཏོང་ལ་སྐུལ་ལྕག་བྱེད་པ་དང་།    སྤྱི་ཚོགས་ཀྱི་སྟོབས་ཤུགས་སྔར་ལས་མང་པོ་རྨང་གཞིའི་ཞིབ་འཇུག་ཁྲོད་ཞུགས་རྒྱུར་རྒྱབ་སྐྱོར་བྱེད་པ།    ཁེ་ལས་དང་རྩ་འཛུགས་གཞན་དག་གིས་མ་དངུལ་བཏང་ནས་མཉམ་འབྲེལ་རོགས་སྐྱོར་བྱ་རྒྱུར་སྐུལ་ལྕག་གཏོང་བ་བཅས་བྱས་ནས། ཚན་རྩལ་གསར་གཏོད་མཉམ་ལས་ལམ་སྲོལ་འཛུགས་རྒྱུ་ཡིན་པ་གསལ་བོ་བཏོན་ཡོད།     ཆ་འཕྲིན་ཅན་འཛུགས་སྐྲུན་ལ་ཤུགས་སྣོན་པ་དང་།    ཚན་ཞིབ་ཡིད་རྟོན་དོ་དམ་གྱི་ཆ་འཕྲིན་མཉམ་སྤྱོད་དང་ཐེབས་རྩའི་རོགས་དངུལ་ལས་གཞིའི་གྲུབ་འབྲས་མཉམ་སྤྱོད་སོགས་ཀྱི་ལམ་སྲོལ་འཐུས་ཚང་དུ་བཏང་།

གསུམ་ནི་རོགས་དངུལ་སྟེར་པའི་ལམ་ལུགས་འཐུས་ཚང་དུ་བཏང་ནས་ཐེབས་རྩས་རྨང་གཞིའི་ཞིབ་འཇུག་དང་འཕེལ་རྒྱས་ལ་སྐུལ་འདེད་གཏོང་བའི་ནུས་པ་འདོན་སྤེལ་བྱས།  རྒྱབ་རྟེན་ལས་ཁུངས་ཀྱི་ཁྱབ་ཁོངས་ཇེ་ཆེར་གཏོང་བ་དང་། མཐོ་རིམ་སློབ་གྲྭ་དང་ཚན་ཞིབ་ལས་ཁུངས། སྤྱི་ཕན་རང་བཞིན་གྱི་ལས་ཁུངས་དང་འབྲེལ་བ་ཡོད་པ་ཕུད། རྒྱལ་ཁབ་ཀྱི་གཏན་འབེབས་དང་མཐུན་པའི་ལས་ཁུངས་ཀྱིས་རྒྱབ་རྟེན་ལས་ཁུངས་སུ་ཐོ་འགོད་བྱས་ཆོག  ཆེད་སྤྱོད་མ་དངུལ་བཏང་ནས་གཞོན་ནུའི་ཚན་རིག་ལག་རྩལ་འཇོན་མི་གསོ་སྐྱོང་བྱ་རྒྱུར་སྤྱད་དེ། ཚན་རིག་ལག་རྩལ་ཁྱབ་ཁོངས་སུ་གྲུབ་འབྲས་འབུར་དུ་ཐོན་པ་བླངས་པར་མ་ཟད་གསར་གཏོད་ཀྱི་སྦས་ཤུགས་མངོན་གསལ་ལྡན་པའི་གཞོན་ནུ་འཇོན་མིར་རྒྱབ་སྐྱོར་བྱ་དགོས།  ཐོག་མའི་གསར་གཏོད་རང་བཞིན་གལ་ཆེན་དང་སྣོལ་སྡེབ་རིག་གཞུང་ཚན་ཁག་གསར་གཏོད་སོགས་ཀྱི་ཐེབས་རྩའི་རོགས་དངུལ་ལས་གཞིའི་རེ་ཞུ་དང་ཞིབ་དཔྱད་གོ་རིམ་ཇེ་ལེགས་སུ་གཏོང་བ་དང་།    ཐེབས་རྩའི་གྲུབ་འབྲས་གདེང་འཇོག་ལམ་ལུགས་འཐུས་ཚང་དུ་གཏོང་བ།    དུས་བཅད་ལྟར་གདེང་འཇོག་བྱེད་པའི་བླང་བྱ་འདོན་པ།    གདེང་འཇོག་བྱས་འབྲས་ལ་གཞིགས་ནས་སྲིད་ཇུས་ལེགས་སྒྲིག་དང་འཐུས་ཚང་དུ་གཏོང་བ།    དོ་དམ་ལེགས་བཅོས།    སྔོན་རྩིས་བཀོད་སྒྲིག་ལེགས་སྒྱུར་བཅས་བྱས།

བཞི་ནི་ཚན་རིག་ཞིབ་འཇུག་གི་ཡིད་རྟོན་ལམ་ལུགས་འཛུགས་པར་ཤུགས་བསྣན་ཏེ་གསར་གཏོད་ཀྱི་ཁོར་ཡུག་བཟང་པོ་བསྐྲུན།     ཐེབས་རྩའི་རོགས་དངུལ་ལས་གཞི་རེ་ཞུ་དང་ཞིབ་དཔྱད་དུས་མཚམས་སུ་ཚན་ཞིབ་ཡིད་རྟོན་ཞིབ་དཔྱད་བྱེད་ཤུགས་ཆེ་རུ་གཏོང་བ་དང་། ཚན་ཞིབ་ཡིད་རྟོན་ཁས་ལེན་གྱི་བླང་བྱ་དོན་འཁྱོལ་བྱས་ཏེ། རེ་ཞུ་བྱེད་མཁན་དང་ཟབ་ཞུགས་བྱེད་མཁན།   རྒྱབ་རྟེན་ལས་ཁུངས་དེ་མིན་ཐེབས་རྩའི་དོ་དམ་ལས་ཁུངས་ཀྱི་ལས་བྱེད་མི་སྣ།    ཞིབ་དཔྱད་ཆེད་མཁས་པ་སོགས་ཚང་མས་ཚན་ཞིབ་ཡིད་རྟོན་ཁས་ལེན་ཡི་གེ་འགོད་དགོས་པ་མ་ཟད། ཚན་ཞིབ་ཡིད་རྟོན་ཤོར་བའི་བྱ་སྤྱོད་ཚབས་ཆེན་ཡོད་པའི་མི་སྒེར་དང་རྩ་འཛུགས་ལ་རྒྱལ་ཁབ་ཀྱི་འབྲེལ་ཡོད་གཏན་འབེབས་གཞིར་བཟུང་ནས་མཉམ་དུ་ཆད་པ་གཅོད་དགོས་པའི་གཏན་འབེབས་བྱས་ཡོད།