ཀྲའོ་ལེ་ཅི་ཡིས་ནོར་ཝེའི་དབུ་བཞུགས་བློན་ཆེན་སི་ཐེ་ལི་དང་སི་ཕེན་གྱི་དབུ་བཞུགས་བློན་ཆེན་སང་ཆེ་སི་གཉིས་ལ་ཐུག་འཕྲད་གནང་བ།

ཟླ9པའི་ཚེས9ཉིན། རྒྱལ་ཡོངས་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་ཀྲའོ་ལེ་ཅི་ཡིས་པེ་ཅིན་དུ་སོ་སོར་ནོར་ཝེའི་དབུ་བཞུགས་བློན་ཆེན་སི་ཐེ་ལི་དང་སི་ཕེན་གྱི་དབུ་བཞུགས་བློན་ཆེན་སང་ཆེ་སི་གཉིས་ལ་ཐུག་འཕྲད་གནང་།

ཟླ9པའི་ཚེས9ཉིན་གྱི་ཕྱི་དྲོར། རྒྱལ་ཡོངས་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་ཀྲའོ་ལེ་ཅི་ཡིས་པེ་ཅིན་དུ་ནོར་ཝེའི་དབུ་བཞུགས་བློན་ཆེན་སི་ཐེ་ལི་དང་ཐུག་འཕྲད་གནང་བཞིན་པ།

སི་ཐེ་ལི་དང་ཐུག་འཕྲད་གནང་སྐབས་ཀྲའོ་ལེ་ཅི་ཡིས་བསྟན་དོན།   ཀྲུའུ་ཞི་ཞི་ཅིན་ཕིང་དང་ནོར་ཝེའི་མགོ་ཁྲིད་པའི་འཐབ་ཇུས་སྣེ་ཁྲིད་འོག་ཀྲུང་གོ་དང་ནོར་ཝེའི་འབྲེལ་བ་རྒྱུན་མཐུད་བརྟན་བརླིང་ངང་ལེགས་པའི་ཕྱོགས་སུ་འཕེལ་རྒྱས་འགྲོ་བཞིན་ཡོད། ད་ལོ་ནི་ཀྲུང་གོ་དང་ནོར་ཝེའི་དབར་ཕྱི་འབྲེལ་གྱི་འབྲེལ་བ་བཙུགས་ནས་ལོ་ངོ70འཁོར་བའི་ལོ་ཡིན། ཀྲུང་གོའི་ཕྱོགས་ཀྱིས་ནོར་ཝེ་ཕྱོགས་དང་འཐབ་ཇུས་ཐད་ཕན་ཚུན་ཡིད་ཆེས་བྱེད་ཤུགས་ཆེ་རུ་གཏོང་བ་དང་།ཕན་ཚུན་དབར་གྱི་འཕེལ་རྒྱས་ཀྱི་ལམ་བུ་དང་ལྟེ་བའི་ཁེ་ཕན། དོ་ཁུར་གལ་ཆེན་བཅས་ལ་བརྩི་འཇོག་བྱེད་པ། ལྗང་མདོག་ཐཱན་ཉུང་དང་རིག་གནས། ཡུལ་སྐོར་སོགས་ཁྱབ་ཁོངས་ཀྱི་སྤེལ་རེས་མཉམ་ལས་ལ་ཤུགས་སྣོན་པ་བཅས་བྱས་ཏེ། རྒྱལ་ཁབ་གཉིས་ཀྱི་འབྲེལ་བ་བརྟན་པོའི་ངང་ཡུན་རིང་འཕེལ་རྒྱས་འགྲོ་བར་སྐུལ་འདེད་གཏོང་འདོད་ཡོད། ཀྲུང་གོའི་རྒྱལ་ཡོངས་དམངས་ཆེན་གྱིས་ནོར་ཝེའི་དབྱི་ཧུའེ་གྲོས་ཚོགས་དང་སྤེལ་རེས་མཉམ་ལས་ལ་ཤུགས་སྣོན་པ་དང་། ཁྲིམས་འཛུགས་སྒྲིག་གཞིའི་འགན་ནུས་འདོན་སྤེལ་བྱེད་པ། ཁྲིམས་འཛུགས་དང་ལྟ་སྐུལ་སོགས་ཀྱི་ལས་ཀའི་ཉམས་མྱོང་ཕན་ཚུན་སློབ་སྦྱོང་དང་དཔྱད་གཞིར་འཛིན་པ་བཅས་བྱས་ཏེ། རྒྱལ་ཁབ་གཉིས་པོའི་དངོས་སྒྲུབ་མཉམ་ལས་ལ་བཅའ་ཁྲིམས་ཀྱི་འགན་ལེན་འདོན་སྤྲོད་བྱེད་འདོད་ཡོད།

སི་ཐེ་ལི་ཡིས་བསྟན་དོན། ནོར་ཝེ་ཕྱོགས་ཀྱིས་ཀྲུང་གོ་གཅིག་གི་སྲིད་ཇུས་མཐའ་འཁྱོངས་བྱས་ཏེ། ཀྲུང་གོའི་ཕྱོགས་དང་མཉམ་དུ་དཔལ་འབྱོར་ཚོང་དོན་དང་ལྗང་མདོག་རིགས་སྒྱུར།རྒྱ་མཚོ་སོགས་ཁྱབ་ཁོངས་ཀྱི་དངོས་སྒྲུབ་མཉམ་ལས་གཏིང་ཟབ་ཏུ་བཏང་ནས་གོ་ལ་ཧྲིལ་པོའི་འགྲན་སློང་ལ་མཉམ་དུ་ཁ་གཏད་འཇལ་འདོད་ཡོད། ནོར་ཝེ་ཕྱོགས་ཀྱིས་ཀྲུང་གོ་ཕྱོགས་དང་ཁྲིམས་འཛུགས་སྒྲིག་གཞིའི་འགྲོ་འོང་ལ་ཤུགས་བསྣན་ནས་རྒྱལ་ཁབ་གཉིས་ཀྱི་འབྲེལ་བ་འཕེལ་རྒྱས་འགྲོ་བར་སྐུལ་འདེད་གཏོང་འདོད་ཡོད།

ཟླ9པའི་ཚེས9ཉིན་གྱི་ཕྱི་དྲོར། རྒྱལ་ཡོངས་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་ཀྲའོ་ལེ་ཅི་ཡིས་པེ་ཅིན་དུ་སི་ཕེན་གྱི་དབུ་བཞུགས་བློན་ཆེན་སང་ཆེ་སི་དང་ཐུག་འཕྲད་གནང་བཞིན་པ།

སང་ཆེ་སི་དང་ཐུག་འཕྲད་གནང་སྐབས་ཀྲའོ་ལེ་ཅི་ཡིས་བསྟན་དོན། ཀྲུང་གོ་དང་སི་ཕེན་ནི་ཤེས་དཔལ་ལྡན་པའི་གནའ་བོའི་རྒྱལ་ཁབ་དང་རིག་གནས་ཀྱི་རྒྱལ་ཁབ་ཆེན་པོ་ཞིག་ཡིན། ཕྱོགས་གཉིས་པོས་ལྷག་བསམ་ཟོལ་མེད་ངང་གཉིས་ཕན་མཉམ་ལས་ལ་སྐུལ་འདེད་བཏང་བས་ཀྲུང་གོ་དང་སི་ཕེན་གྱི་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བར་གསོན་ཤུགས་དབྱར་མཚོ་རྒྱས་པ་ལྟར་འཕེལ་ཡོད། ཀྲུང་གོའི་ཕྱོགས་ཀྱིས་སི་ཕེན་དང་མཉམ་དུ་ཀྲུའུ་ཞི་ཞི་ཅིན་ཕིང་དང་སྐུ་ཉིད་རྒྱལ་ཁབ་ཀྱི་མགོ་ཁྲིད་པའི་དབར་གྱི་ཐུན་མོང་ངོས་འཛིན་གལ་ཆེན་དོན་འཁྱོལ་ཡག་པོ་བྱེད་པ་དང་། ཁྱབ་ཁོངས་སོ་སོའི་སྤེལ་རེས་མཉམ་ལས་གཏིང་ཟབ་ཏུ་བཏང་ནས། རྒྱལ་ཁབ་གཉིས་ཀྱི་མི་དམངས་ལ་སྔར་ལས་ལེགས་པའི་བདེ་སྐྱིད་བསྐྲུན་འདོད་ཡོད། ཀྲུང་གུང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་ཐོག་བཅོས་བསྒྱུར་ཁྱོན་ཡོངས་ནས་གཏིང་ཟབ་ཏུ་གཏོང་བར་བཀོད་སྒྲིག་རབ་དང་རིམ་པ་བྱས་པ་དེས། ཀྲུང་གོ་དང་ནུབ་རྒྱུད་དབར་དང་ཀྲུང་གོ་དང་ཡོ་རོབ་དབར་གྱི་མཉམ་ལས་ལ་གོ་སྐབས་གསར་པ་འཁྱེར་ཡོང་བ་རེད། ཀྲུང་གོའི་རྒྱལ་ཡོངས་དམངས་ཆེན་གྱིས་སི་ཕེན་གྱི་གྲོས་ཁང་གོང་མ་དང་གྲོས་ཁང་འོག་མའི་མཛའ་གྲོགས་འགྲོ་འོང་ལ་ཤུགས་བསྣན་ནས། ཕྱོགས་མང་གྲོས་ཚོགས་ཀྱི་མཐུན་སྦྱོར་གཞོགས་འདེགས་ཇེ་ཟབ་ཏུ་གཏོང་འདོད་ཡོད།

སང་ཆེ་སི་ཡིས་བསྟན་དོན། སི་ཕེན་གྱིས་ཀྲུང་གོ་གཅིག་གི་རྩ་དོན་བརྩི་སྲུང་བྱས་ཏེ། ཀྲུང་གོའི་ཕྱོགས་དང་ཕན་ཚུན་ཡིད་ཆེས་རྒྱུན་ཆད་མེད་པར་ཇེ་ཟབ་ཏུ་གཏོང་བ་དང་།དཔལ་འབྱོར་ཚོང་དོན་དང་ཚན་རྩལ།རིག་གནས་སོགས་ཁྱབ་ཁོངས་ཀྱི་གཉིས་ཕན་མཉམ་ལས་ཇེ་ཟབ་ཏུ་གཏོང་བ།ཁྲིམས་འཛུགས་སྒྲིག་གཞིའི་སྤེལ་རེས་ལ་ཤུགས་སྣོན་པ་བཅས་བྱས་ཏེ། སི་ཕེན་དང་ཀྲུང་གོའི་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བ་དང་ཡོ་རོབ་དང་ཀྲུང་གོའི་འབྲེལ་བ་སྔར་བས་འཕེལ་རྒྱས་འགྲོ་བར་སྐུལ་འདེད་གཏོང་འདོད་ཡོད།

ཚའེ་ཏ་ཧྥེང་ཐུག་འཕྲད་ལ་ཞུགས།