རང་རྒྱལ་དུ་ཁྱོན་དགེ་རྒན་ཁྲི1891.8ཟིན་འདུག

མིག་སྔར། རང་རྒྱལ་དུ་རིགས་མི་འདྲ་བའི་དགེ་རྒན་ཁྱོན་ཁྲི1891.8ཡོད་པ་དེས་འཛམ་གླིང་ཐོག་གཞི་ཁྱོན་ཆེ་ཤོས་ཀྱི་སློབ་གསོའི་མ་ལག་དེར་འདེགས་སྐྱོར་བྱེད་བཞིན་ཡོད། ཆེད་ལས་སློབ་ཁྲིད་དགེ་རྒན་གྱི་སློབ་གནས་རྒྱུན་མཐུད་མཐོ་རུ་སོང་ཞིང་། སྤྱི་ལོ2023ལོར། སློབ་ཆུང་གི་སློབ་ཁྲིད་དགེ་རྒན་ཁྲོད་དངོས་གཞིའི་ཚན་ཁག་གི་སློབ་གནས་ཡན་གྱིས78.03%ཟིན་པ་དེ་སྤྱི་ལོ2012ལོ་དང་བསྡུར་ན་བརྒྱ་ཆའི་གནས45འཕར་བ་དང་། དམའ་རིམ་སློབ་འབྲིང་གི་དགེ་རྒན་ཁྲོད། དངོས་གཞིའི་ཚན་ཁག་གི་སློབ་གནས་ཡན་གྱིས93.09%ཟིན་ནས་སྤྱི་ལོ2012ལོ་དང་བསྡུར་ན་བརྒྱ་ཆའི་གནས22འཕར་ཡོད་པ་རེད།

དགེ་རྒན་དཔུང་ཁག་གི་ལས་ཀའི་གོ་མིང་གི་གྲུབ་གཞི་སྔར་བས་ལེགས་སུ་བཏང་བ་དང་ལས་ཀའི་གོ་མིང་མཐོ་བའི་དགེ་རྒན་གྱི་བསྡུར་ཚད་མངོན་གསལ་དོད་པོས་མང་དུ་ཕྱིན་ཡོད། ལྷག་པར་དུ་སློབ་གྲྭ་འབྲིང་ཆུང་དུ་མཐོ་རིམ་དགེ་རྒན་བཀོད་སྒྲིག་བྱས་པ་དེས་དགེ་རྒན་གྱི་ཆེད་ལས་རང་བཞིན་ལ་ཤུགས་སྣོན་གང་ལེགས་ཐེབས་ཡོད། མིག་སྔར་རང་རྒྱལ་གྱི་སློབ་གྲྭ་འབྲིང་ཆུང་དུ་མཐོ་རིམ་དགེ་རྒན་ཁྱོན28125ཡོད་པ་རེད།

སྤྱི་ལོ2023ལོའི་རྒྱལ་ཁབ་ཚན་རྩལ་བྱ་དགའི་ཁྲོད། མཐོ་རིམ་སློབ་གྲྭའི་དགེ་རྒན་གྱིས་སྣེ་ཁྲིད་པའི་བྱ་དགའི་སྤྱི་འབོར་གྱིས་གསུམ་ཆ་གཉིས་ཙམ་ཟིན་པ་དང་། མཐོ་རིམ་སློབ་གྲྭའི་དགེ་རྒན་དེ་རང་རྒྱལ་གྱི་ཆུ་ཚད་མཐོ་བའི་ཚན་རྩལ་གསར་གཏོད་གྱི་རྐང་འཛིན་སྟོབས་ཤུགས་སུ་གྱུར་ཡོད།

དགེ་རྒན་དང་སློབ་གསོའི་མ་ལག་རྒྱུན་ཆད་མེད་པར་འཐུས་ཚང་དུ་བཏང་བ་དང་། རྒྱལ་ཁབ་ཀྱིས་གསོ་སྦྱོང་འཆར་གཞི་ལག་བསྟར་བྱས་ཏེ། ལོ་ལྔར་དུས་འཁོར་རེ་བྱས་པའི་དགེ་རྒན་གྱི་སྦྱོང་བརྡར་ལམ་ལུགས་བཙུགས་པས་དགེ་རྒན་ལ་གསོ་སྦྱོང་བྱེད་པའི་མ་ལག་རྒྱུན་ཆད་མེད་པར་འཐུས་ཚང་དུ་བཏང་ཡོད།

དགེ་རྒན་གྱི་དོ་དམ་ལ་སྒྱུར་བཅོས་བྱེད་པར་སྐུལ་འདེད་གཏིང་ཟབ་བཏང་བ་དང་། དགེ་རྒན་གྱི་ཐོབ་ཐང་ཡིག་རྒྱུགས་ཁྱོན་ཡོངས་ནས་ལག་བསྟར་བྱས་ཏེ་དགེ་རྒན་གྱི་དཔུང་ཁག་ནང་ཞུགས་པའི་ཚད་གཞི་མཐོ་རུ་བཏང་བ། རྫོང་གིས་དོ་དམ་དང་སློབ་གྲྭས་གདན་ཞུ་བྱེད་པའི་ལམ་ལུགས་སྒྱུར་བཅོས་བྱས་ཏེ། གྲོང་ཁྱེར་དང་གྲོང་གསེབ་གཅིག་གྱུར་དང་། གཞུང་དྲང་། ཚད་ལྡན་དང་གོ་རིམ་ལྡན་པ་བཅས་ཀྱི་དགེ་རྒན་བཀོད་སྒྲིག་ལམ་ལུགས་ལག་བསྟར་བྱས་ཡོད།

དགེ་རྒན་གྱི་གནས་བབ་དང་ཐོབ་ཐང་མངོན་གསལ་དོད་པོས་མཐོ་རུ་བཏང་བ། འོས་འགན་སློབ་གསོའི་དུས་རིམ་གྱི་དགེ་རྒན་གྱི་ཆ་སྙོམས་གླ་ཕོགས་དེ་ས་གནས་དེ་གའི་གཞུང་ཞབས་པའི་ཆ་སྙོམས་གླ་ཕོགས་ཀྱི་ཆུ་ཚད་ལས་མི་དམའ་བ་བྱ་རྒྱུ་རིམ་བཞིན་མངོན་འགྱུར་བྱུང་བ་དང་གྲུབ་འབྲས་ཟམ་མི་ཆད་པར་ཐོབ་ཡོད།