སུའུ་ཏན་མགྱོགས་མྱུར་རོགས་སྐྱོར་དམག་དཔུང་གིས་སུའུ་ཏན་དབུས་རྒྱུད་ཀྱི་གྲོང་ཁྱེར་ཞིག་ལ་སྐོར་བཅོམ་བྱས་པ་ལས་ཉུང་མཐར་ཡང་མི79རྐྱེན་ལམ་དུ་ཤོར།

སུའུ་ཏན་དབུས་རྒྱུད་ཀྱི་ཅེ་ཅི་ལ་མངའ་སྡེའི་དམངས་ཁྲོད་རྩ་འཛུགས་ཀྱིས་ཚེས་7ཉིན་གནས་ཚུལ་སྤེལ་བ་ལྟར་ན། མངའ་སྡེ་དེའི་ཤར་རྒྱུད་ཀྱི་ཞིས་ལ་ལི་ཡེ་གྲོང་ཁྱེར་ལ་སུའུ་ཏན་མགྱོགས་མྱུར་རོགས་སྐྱོར་དམག་དཔུང་གིས་སྐོར་བཅོམ་བྱས་ནས་གཟའ་འཁོར་གཉིས་འདས་པའི་རིང་ལ་ཉུང་མཐར་ཡང་མི79རྐྱེན་ལམ་དུ་ཤོར་ ཡོད་ཟེར།

དམངས་ཁྲོད་རྩ་འཛུགས“དབུས་རྒྱུད་ཀྱི་འབོད་སྒྲ”ཞེས་པས་ཉིན་དེར་གསལ་བསྒྲགས་སྤེལ་ནས་བཤད་རྒྱུར། སུའུ་ཏན་གྱི་མགྱོགས་མྱུར་རོགས་སྐྱོར་དམག་དཔུང་གིས་ཉིན14ཡི་སྔོན་དུ་ཞིས་ལ་ལི་ཡེ་གྲོང་ཁྱེར་ལ་སྐོར་བཅོམ་བྱེད་འགོ་བརྩམས་ནས་མི་79རྐྱེན་ལམ་དུ་ཤོར་བ་རེད། ད་ལྟ་གྲོང་ཁྱེར་དེར་ནད་རིགས་སྣ་ཚོགས་ཤིག་མཆེད་ནས་མི་འབུམ་གཅིག་ཙམ་སྨན་རྫས་དང་བཟའ་ཆས་ཀྱི་དཀའ་ངལ་ལ་འཕྲད་ཡོད་པ་རེད།  གསལ་བསྒྲགས་ལས་གྲོང་ཁྱེར་གྱི་ནང་དུ་དྲག་ཆས་པའི་སྟོབས་ཤུགས་ཅི་ཡང་མེད་པར་ལག་ན་མཚོན་ཆ་མེད་པའི་མང་ཚོགས་དཀྱུས་མ་ཏག་ཏག་ཡིན་ཞེས་ནན་གྱིས་བསྟན།

དམངས་ཁྲོད་རྩ་འཛུགས“ཅེ་ཅི་ལའི་གྲོས་ཚོགས”ཀྱིས་ཉིན་དེར་གསལ་བསྒྲགས་སྤེལ་ནས་བཤད་རྒྱུར།  སུའུ་ཏན་གྱི་མགྱོགས་མྱུར་རོགས་སྐྱོར་དམག་དཔུང་གིས་ཞིས་ལ་ལི་ཡེ་གྲོང་ཁྱེར་ལ་སྐོར་བཅོམ་བྱས་པར་མི80ཙམ་རྐྱེན་ལམ་དུ་ཤོར་བ་དང་།  དེའི་ནང་མི18སུའུ་ཏན་མགྱོགས་མྱུར་རོགས་སྐྱོར་དམག་དཔུང་གིས་ཐད་ཀར་འཇབ་རྒོལ་བྱས་ནས་རྐྱེན་ལམ་དུ་ཤོར་བ་དང་།   མི62ལ་དུག་ཕོག་ནས་ཤི་བ་འདྲ་ཟེར།

སུའུ་ཏན་མགྱོགས་མྱུར་རོགས་སྐྱོར་དམག་དཔུང་གིས་དོན་རྐྱེན་དེར་ལན་ཅི་ཡང་བཏབ་མེད།

ད་ལོའི་ཟླ10ཚེས20ཉིན།  སུའུ་ཏན་གྱི་མགྱོགས་མྱུར་རོགས་སྐྱོར་དམག་དཔུང་གི་དབུས་རྒྱུད་བཀོད་འདོམས་དཔོན་ཅི་ཁི་འར་གྱིས་མངའ་འོག་གི་དམག་དཔུང་ཁྲིད་དེ་སུའུ་ཏན་གྱི་དྲག་ཆས་དཔུང་སྡེ་ལ་མགོ་བཏགས་རྗེས་སུ།  སུའུ་ཏན་གྱི་མགྱོགས་མྱུར་རོགས་སྐྱོར་དམག་དཔུང་གིས་ཅེ་ཅི་ལ་མངའ་སྡེའི་ཤར་རྒྱུད་ཀྱི་གྲོང་ཚོ་དང་གྲོང་རྡལ་མང་པོར་གཞི་ཁྱོན་ཆེ་བའི་སྒོ་ནས་འཇབ་རྒོལ་བྱས་པ་རེད།

2023ལོའི་ཟླ4ཚེས15ཉིན།  སུའུ་ཏན་གྱི་དྲག་ཆས་དམག་དཔུང་དང་སུའུ་ཏན་གྱི་མགྱོགས་མྱུར་རོགས་སྐྱོར་དམག་དཔུང་བར་རྒྱལ་ས་ཁ་ཐུའུ་མུའུ་རུ་གདོང་ཐུག་དྲག་པོ་བྱུང་བ་ནས་དམག་འཁྲུག་གི་མེ་ལྕེ་དེ་རིམ་བཞིན་ས་ཁུལ་གཞན་དུ་མཆེད་པ་རེད། ལོ་གཅིག་ལྷག་ཙམ་རྒྱུན་མཐུད་པའི་དྲག་ཆས་གདོང་ཐུག་དེ་ལས་སུའུ་ཏན་གྱི་མི་ཁྲི2.48ཙམ་རྐྱེན་ལམ་དུ་ཤོར་བ་དང་།  མི་བྱེ་བ་གཅིག་དང་འབུམ་ལྔ་ཁྲི་གསུམ་ལྷག་ཙམ་ཡུལ་འཁྱམས་པར་གྱུར།