ཞི་ཅིན་ཕིང་གིས་པ་ཞི་ཡི་མཛའ་མཐུན་མི་སྣར་འཕྲིན་ལན་བསྐུར།

ཉེ་ལམ། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་པ་ཞི་ཡི་ལས་རིགས་སོ་སོའི་མཛའ་མཐུན་མི་སྣར་འཕྲིན་ལན་བསྐུར་ནས། ཁོ་ཚོར་ཀྲུང་གོ་དང་པ་ཞི་ཡི་མཛའ་བརྩེའི་ལས་དོན་ཐད་མུ་མཐུད་དུ་བྱས་རྗེས་འཇོག་དགོས་པའི་སྐུལ་ལྕག་གནང་།

ཞི་ཅིན་ཕིང་གིས་བསྟན་དོན། ཀྲུང་གོ་དང་པ་ཞི་རྒྱལ་ཁབ་གཉིས་ཀྱི་མཛའ་བརྩེའི་ལས་དོན་མི་རབས་ནས་མི་རབས་བར་རྒྱུན་འཛིན་བྱེད་མཁན་ཡོད་པ་མཐོང་སྐབས་ཧ་ཅང་དགའ་པོ་བྱུང་།   འབྲེལ་བ་བཙུགས་ནས་ལོ50ཡི་རིང་ལ། ཀྲུང་གོ་དང་པ་ཞི་རྒྱལ་ཁབ་གཉིས་ཀྱིས་ལག་གདང་སྦྲེལ་ནས་མཉམ་དུ་བསྐྱོད་པ་དང་སྐྱིད་སྡུག་མཉམ་མྱོང་བྱས་ནས་རི་བོ་དང་རྒྱ་མཚོ་བརྒལ་བའི་གྲོགས་པོ་བཟང་པོར་གྱུར་ཡོད།  ཀྲུང་གོ་ཕྱོགས་ཀྱིས་པ་ཞི་ཕྱོགས་དང་མཉམ་དུ་རྒྱལ་ཁབ་གཉིས་ཀྱི་མཛའ་བརྩེའི་དུས་རབས་ཀྱི་ནང་དོན་རྒྱུན་ཆད་མེད་པར་ཕུན་སུམ་ཇེ་ཚོགས་སུ་བཏང་སྟེ། ཀྲུང་གོ་དང་པ་ཞི་ཡི་འབྲེལ་བ་དེ་འཕེལ་རྒྱས་སུ་འགྲོ་བཞིན་པའི་རྒྱལ་ཁབ་ཆེན་པོའི་མཐུན་སྒྲིལ་མཉམ་ལས་དང་།    ཐུན་མོང་འཕེལ་རྒྱས།    གཉིས་ཕན་མཉམ་རྒྱལ་བཅས་ཀྱི་དཔེ་མཚོན་ཞིག་ཏུ་འགྱུར་བར་བྱས་ནས། མིའི་རིགས་ཀྱི་ཞི་བདེ་དང་ཡར་ཐོན་ལས་དོན་གྱི་ཆེད་དུ་བྱས་རྗེས་སྔར་ལས་ཆེན་པོ་འཇོག་འདོད་ཡོད།    པ་ཞི་ཡི་གྲོགས་པོ་མང་པོ་ཀྲུང་གོར་ལྟ་སྐོར་དུ་ཡོང་ནས། ཀྲུང་གོའི་ལུགས་ཀྱི་དེང་རབས་ཅན་གྱི་རྣམ་པ་འདྲ་མིན་སྣ་ཚོགས་དངོས་སུ་མྱོང་ཚོར་བྱེད་པར་དགའ་བསུ་ཞུ།     རྒྱལ་ཁབ་གཉིས་ཀྱི་ལས་རིགས་སོ་སོའི་མི་སྣས་ཀྲུང་གོ་དང་པ་ཞི་ཡི་འབྲེལ་བ་རྒྱུན་ཆད་མེད་པར་འཕེལ་རྒྱས་འགྲོ་རྒྱུར་སྐུལ་འདེད་གཏོང་ཆེད་ནུས་པ་འདོན་སྤེལ་གང་ལེགས་བྱས་ནས། ཀྲུང་གོ་དང་པ་ཞི་ཡི་འབྲེལ་བ་འབྲི་ཆུ་དང་ཡ་མ་སུན་ཆུ་བོ་ལྟར་རྒྱུན་མི་ཆད་པར་བྱ་རྒྱུའི་རེ་བ་ཡོད།

ཉེ་ལམ། པ་ཞི་ཡི་ཧྲིན་པའོ་ལའོ་མངའ་སྡེའི་ཁེན་ཕི་ན་སི་གྲོང་ཁྱེར་གྱི་གྲོང་གཙོ་གཞོན་པ་ཟུར་པ་ཨིན་ལི་ཁེ·ཐི་ཞེ་ལ་དང་།    པ་ཞི་ཡི་ཀྲུང་གོའི་མཛའ་མཐུན་མཐུན་ཚོགས།    པ་ཞི་ཧྲིན་པའོ་ལའོ་སློབ་ཆེན།    ཧྲིན་པའོ་ལུའོ་མངའ་སྡེས་བཙུགས་པའི་སློབ་ཆེན་གྱི་དགེ་སློབ།    ལེ་ཡུའེ་ཁི་ཕ་ཁ་པ་ན་ཡའོ་སའེ་ལི་ཚོགས་པ་སོགས་པ་ཞི་ཡི་མཛའ་མཐུན་མི་སྣ་བརྒྱ་ལྷག་གིས་ཀྲུའུ་ཞི་ཞི་ཅིན་ཕིང་ལ་ཡི་གེ་བསྐུར་ནས་ཀྲུང་གོ་སྲིད་གཞུང་དང་།    ཁེ་ལས།    མཐོ་སློབ་བཅས་ཀྱིས་པ་ཞི་དང་ཀྲུང་གོའི་མཛའ་བརྩེའི་བརྗེ་རེས་དང་ས་གནས་ཀྱི་དམངས་འཚོ་ལེགས་གཏོང་ཐད་བྱས་རྗེས་བཞག་པར་ཐུགས་རྗེ་ཆེ་ཞུས།