ང་ཚོས་མཉམ་དུ《དམངས་དོན་ཁྲིམས་གཞུང》སློབ།

དོན་ཚན་བརྒྱ་དང་ང་གསུམ་པ། བཅའ་ཁྲིམས་དང་སྲིད་འཛིན་ཁྲིམས་སྲོལ་གྱི་བཙན་ཤེད་རང་བཞིན་གྱི་གཏན་འབེབས་དང་འགལ་བའི་དམངས་དོན་བཅའ་ཁྲིམས་བྱ་སྤྱོད་ལ་ནུས་པ་མི་ལྡན་པ་ཡིན། ཡིན་ན་ཡང་བཙན་ཤེད་རང་བཞིན་གྱི་གཏན་འབེབས་དེས་དམངས་དོན་བཅའ་ཁྲིམས་བྱ་སྤྱོད་དེ་ནུས་པ་མེད་པར་མི་བཟོ་བ་ཡིན་ན་འདིའི་ཁོངས་སུ་མི་ཚུད།

སྤྱི་སྒྲིག་སྲོལ་བཟང་དང་འགལ་བའི་དམངས་དོན་བཅའ་ཁྲིམས་བྱ་སྤྱོད་ལ་ནུས་པ་མི་ལྡན་པ་ཡིན།

དོན་ཚན་བརྒྱ་དང་ང་བཞི་པ། བྱ་སྤྱོད་སྤེལ་མཁན་དང་བལྟོས་བཅས་མིས་ལྐོག་འབྲེལ་བྱས་ནས་མི་གཞན་གྱི་ཁྲིམས་མཐུན་ཁེ་དབང་ལ་གནོད་རྐྱེན་བཟོས་པའི་དམངས་དོན་བཅའ་ཁྲིམས་བྱ་སྤྱོད་ལ་ནུས་པ་མི་ལྡན་པ་ཡིན། །

དོན་ཚན་བརྒྱ་དང་ང་ལྔ་པ། ནུས་པ་མེད་པའམ་ཕྱིར་འཐེན་བྱས་པའི་དམངས་དོན་བཅའ་ཁྲིམས་བྱ་སྤྱོད་ལ་ཐོག་མ་ཉིད་ནས་བཅའ་ཁྲིམས་ཀྱི་འཆིང་ནུས་མེད།

དོན་ཚན་བརྒྱ་དང་ང་དྲུག་པ། དམངས་དོན་བཅའ་ཁྲིམས་བྱ་སྤྱོད་ཀྱི་ཆ་ཤས་ཤིག་ལ་ནུས་པ་མི་ལྡན་པ་དེས་ཆ་ཤས་གཞན་དག་ལ་ནུས་པ་ལྡན་པར་ཤུགས་རྐྱེན་མི་ཐེབས་པ་ཡིན། ཆ་ཤས་གཞན་དག་ལ་སྔར་བཞིན་ནུས་པ་ལྡན་པ་ཡིན།

དོན་ཚན་བརྒྱ་དང་ང་བདུན་པ། དམངས་དོན་བཅའ་ཁྲིམས་བྱ་སྤྱོད་ལ་ནུས་པ་མི་ལྡན་པ་དང་ཕྱིར་འཐེན་བྱས་པའམ་ནུས་པ་མི་ཐོན་པར་གཏན་འཁེལ་བྱས་རྗེས། བྱ་སྤྱོད་སྤེལ་མཁན་ལ་བྱ་སྤྱོད་དེའི་དབང་གིས་ཐོབ་པའི་རྒྱུ་ནོར་ནི་ཕྱིར་བསློག་དགོས། ཕྱིར་བསློག་མི་ཐུབ་པའམ་ཕྱིར་བསློག་པའི་དགོས་པ་མེད་པ་ཡིན་ན། རིན་གོང་བཅག་ནས་གུན་གསབ་བྱེད་དགོས། ནོར་འཁྲུལ་ཡོད་མཁན་ཕྱོགས་ཀྱིས་ཕ་རོལ་པོའི་ཕྱོགས་ལ་དེའི་རྐྱེན་གྱིས་བཟོས་པའི་གྱོང་གུན་ལ་སྐྱིན་གསབ་འཇལ་དགོས། ཕྱོགས་ཚང་མར་ནོར་འཁྲུལ་ཡོད་ན་རང་རང་སོ་སོས་གང་འོས་ཀྱི་འགན་འཁྲི་འཁུར་དགོས། བཅའ་ཁྲིམས་ཀྱིས་ལོགས་སུ་གཏན་འབེབས་བྱས་ཡོད་པ་ཡིན་ན། གཏན་འབེབས་དེ་ག་གཞིར་འཛིན་དགོས།

ས་བཅད་བཞི་པ། དམངས་དོན་བཅའ་ཁྲིམས་བྱ་སྤྱོད་ཀྱི་ཟུར་སྣོན་ཆ་རྐྱེན་དང་ཟུར་སྣོན་དུས་བཅད།

དོན་ཚན་བརྒྱ་དང་ང་བརྒྱད་པ། དམངས་དོན་བཅའ་ཁྲིམས་བྱ་སྤྱོད་ལ་ཆ་རྐྱེན་ཟུར་སྣོན་བྱས་ཆོག ཡིན་ནའང་དེའི་ངོ་བོ་ལྟར་ན་ཆ་རྐྱེན་ཟུར་སྣོན་བྱེད་མི་རུང་བ་འདིའི་ཁོངས་སུ་མི་ཚུད། ནུས་པ་ཐོན་པའི་ཆ་རྐྱེན་ཟུར་སྣོན་བྱས་པའི་དམངས་དོན་བཅའ་ཁྲིམས་བྱ་སྤྱོད་ཡིན་ན། ཆ་རྐྱེན་གྲུབ་པའི་དུས་ནས་ནུས་པ་ཐོན་པ་ཡིན། གྲོལ་འཐེན་ཆ་རྐྱེན་ཟུར་སྣོན་བྱས་པའི་དམངས་དོན་བཅའ་ཁྲིམས་བྱ་སྤྱོད་ཡིན་ན། ཆ་རྐྱེན་གྲུབ་པའི་དུས་ནས་བཟུང་ནུས་པ་ཐོན་པ་ཡིན།

དོན་ཚན་བརྒྱ་དང་ང་དགུ་པ། ཆ་རྐྱེན་ཟུར་སྣོན་བྱས་པའི་དམངས་དོན་བཅའ་ཁྲིམས་བྱ་སྤྱོད་ལ་དོ་བདག་གིས་རང་ཉིད་ཀྱི་ཁེ་ཕན་གྱི་ཆེད་དུ་ཚུལ་མིན་གྱི་སྒོ་ནས་ཆ་རྐྱེན་འགྲུབ་ཏུ་མ་བཅུག་པ་ཡིན་ན། ཆ་རྐྱེན་གྲུབ་པར་བརྩི་དགོས། ཚུལ་མིན་གྱི་སྒོ་ནས་ཆ་རྐྱེན་འགྲུབ་ཏུ་བཅུག་པ་ཡིན་ན། ཆ་རྐྱེན་མ་གྲུབ་པར་བརྩི་དགོས།

དོན་ཚན་བརྒྱ་དང་དྲུག་ཅུ་པ། དམངས་དོན་བཅའ་ཁྲིམས་བྱ་སྤྱོད་ལ་དུས་བཅད་ཟུར་སྣོན་བྱས་ཆོག ཡིན་ན་ཡང་དེའི་ངོ་བོ་ལྟར་ན་དུས་བཅད་ཟུར་སྣོན་བྱེད་མི་རུང་བ་འདིའི་ཁོངས་སུ་མི་ཚུད། ནུས་པ་ཐོན་པའི་དུས་བཅད་ཟུར་སྣོན་བྱས་པའི་དམངས་དོན་བཅའ་ཁྲིམས་བྱ་སྤྱོད་ཡིན་ན། དུས་བཅད་ལ་སླེབས་པ་ནས་ནུས་པ་ཐོན་པ་ཡིན། མཇུག་སྒྲིལ་བའི་དུས་བཅད་ཟུར་སྣོན་བྱས་པའི་དམངས་དོན་བཅའ་ཁྲིམས་བྱ་སྤྱོད་ཡིན་ན། དུས་བཅད་ལོངས་པའི་དུས་ནས་བཟུང་ནུས་པ་ཤོར་བ་ཡིན།

                                               (མུ་འགོད།)