ཉ་གྲུ་ཞིག་ཧན་གོའི་ཅི་ཀྲོའུ་གླིང་ཕྲན་ཉེ་འགྲམ་དུ་ཆུར་ནུབ་ནས་མི12གར་སོང་ཆ་མེད་དུ་གྱུར།

ཧན་གོ་མཉམ་འབྲེལ་གསར་འགྱུར་ཁང་གིས་གནས་ཚུལ་སྤེལ་བ་ལྟར་ན།  ཉ་གྲུ་ཞིག་ཚེས8ཉིན་ཧན་གོའི་ལྷོ་རྒྱུད་ཅི་ཀྲོའུ་གླིང་ཕྲན་གྱི་ཉེ་འགྲམ་དུ་ཆུར་ནུབ་པ་དང་།  མིག་སྔར་གྲུ་པ15བསྐྱབས་པ་དང་གཞན་ཡང་མི12གར་སོང་ཆ་མེད་དུ་གྱུར།

ཧན་གོ་མཉམ་འབྲེལ་གསར་འགྱུར་ཁང་གིས་ཧན་གོའི་མཚོ་ཐོག་ཉེན་རྟོག་ཕྱོགས་ཀྱི་ཆ་འཕྲིན་དྲངས་ནས།  ཉ་གྲུ་དེས་གྲུ་ཁ་ནས་འགྲོ་འོང་གི་དོ་དམ་མ་ལག་ཐོག་ཐོ་འགོད་བྱས་པའི་གྲུ་པ27ཡོད་པའི་ནང་།  ཧན་གོའི་མི16དང་ཕྱི་རྒྱལ་བ11ཡོད་པ་རེད། སྲོག་ཉེན་ལས་བསྐྱབས་པའི་གྲུ་པ15ཡི་ཁྲོད་ནས་མི2སྔར་བཞིན་བརྒྱལ་འདུག་པ་དང་། མིག་སྔར་གྲུ་གཟིངས་དེ་ཡོངས་སུ་ཆུར་ནུབ་པ་དང་མཚོ་ཐོག་ཉེན་རྟོག་པས་ཡུལ་དངོས་སུ་འཚོལ་སྐྱོབ་བྱེད་བཞིན་ཡོད་པ་རེད།

གཞན་ཡང་ཧན་གོའི་ཙུང་ཐུང་ལས་ཤག་ནས་གནས་ཚུལ་སྤེལ་བ་ལྟར་ན།  ཚེས་8ཉིན་ཧན་གོའི་ཙུང་ཐུང་དབྱིན་ཞི་ཡུའེ་ཡིས་དོན་རྐྱེན་དེའི་ཐད་མཛུབ་སྟོན་གལ་ཆེན་གནང་ནས།  རྒྱལ་སྲུང་པུའུ་དང་རྒྱ་མཚོའི་ཆུ་ཐོན་པུའུ་སོགས་འབྲེལ་ཡོད་སྡེ་ཁག་གིས་སྤྱོད་ཆོག་པའི་ཐོན་ཁུངས་དང་མི་ཤུགས་ཚང་མ་སྤྱད་དེ་ནུས་ཤུགས་ཡོད་རྒུས་འཚོལ་སྐྱོབ་བྱེད་དགོས་པའི་བླང་བྱ་བཏོན་པ་རེད།

ཧན་གོའི་རྒྱལ་དོན་ཙུང་ལི་ཧན་ཏེ་ཀྲུའུ་ཡིས་ཀྱང་དེ་ཉིན་མཛུབ་སྟོན་གལ་ཆེན་གནང་ནས་དམག་གྲུ་དང་མཐའ་འཁོར་དུ་སྐྱོད་བཞིན་པའི་གྲུ་གཟིངས་ཚང་མ་སྐུལ་སློང་བྱས་ཏེ།  གར་སོང་ཆ་མེད་དུ་གྱུར་པའི་མི་སྣ་ནུས་ཤུགས་ཡོད་རྒུས་འཚོལ་སྐྱོབ་བྱེད་དགོས་པའི་བླང་བྱ་བཏོན་པ་རེད།