མཉམ་འབྲེལ་རྒྱལ་ཚོགས་ཀྱི་དྲུང་ཡིག་ཆེན་མོས་ཅཱ་ཧྲ་ས་ཁུལ་གྱི་འཁྲུག་རྩོད་མཚམས་འཇོག་པའི་གྲོས་མཐུན་དངོས་འབེབས་བྱེད་པར་ཁག་ཐེག་བྱེད་དགོས་པའི་འབོད་སྐུལ་བཏང་།

མཉམ་འབྲེལ་རྒྱལ་ཚོགས་ཀྱི་དྲུང་ཡིག་ཆེན་མོ་ཀུའུ་ཐི་ལོས་སི་ཡིས་ཚེས15ཉིན་གསལ་སྒྲོག་སྤེལ་ཏེ། དབྱི་སི་རལ་དང་ཕཱ་ལེ་སི་ཐན་གྱི་དབྱི་སི་ལན་འགོག་རྒོལ་རྩ་འཛུགས་ཧཱ་མཱ་སི་ཡིས་ཅཱ་ཧྲ་ས་ཁུལ་གྱི་འཁྲུག་རྩོད་མཚམས་འཇོག་པ་དང་བཀག་འཇུག་ཐེབས་པའི་མི་སྣ་ཕྱིར་གཏོང་བའི་གྲོས་མཐུན་བཀོད་པར་དགའ་བསུ་ཞུས་པ་དང་། འབྲེལ་ཡོད་ཕྱོགས་སོ་སོས་དམ་བཅའ་ལག་བསྟར་བྱས་ཏེ། གྲོས་མཐུན་དེ་ཕྱོགས་ཡོངས་ནས་དངོས་འབེབས་བྱེད་པར་ཁག་ཐེག་བྱེད་དགོས་པའི་འབོད་སྐུལ་བཏང་།

ཀུའུ་ཐི་ལོས་སི་ཡིས་བསྟན་དོན། མིག་སྔའི་ཁ་ཚ་དགོས་གཏུག་གི་གནད་དོན་ནི་ཅཱ་ཧྲའི་འཁྲུག་རྩོད་ལས་བཟོས་པའི་མི་ཆོས་རིང་ལུགས་ཀྱི་ཉམས་ཉེན་རེད། མཉམ་འབྲེལ་རྒྱལ་ཚོགས་ཀྱིས་དུས་ངེས་མེད་དུ་འཁྲུག་རྩོད་མཚམས་འཇོག་པའི་གྲོས་མཐུན་ལག་བསྟར་བྱེད་པར་རྒྱབ་སྐྱོར་བྱེད་བཞིན་ཡོད་པར་མ་ཟད། ཕཱ་ལེ་སི་ཐན་མི་དམངས་ཀྱི་མི་ཆོས་རིང་ལུགས་ཀྱི་རོགས་སྐྱོར་ཤུགས་ཚད་ཇེ་ཆེར་གཏོང་རྒྱུ་ཡིན། འཁྲུག་རྩོད་མཚམས་འཇོག་པའི་གྲོས་མཐུན་དེས་ངེས་པར་དུ་ཅཱ་ཧྲ་ས་ཁུལ་གྱི་མི་ཆོས་རིང་ལུགས་ཀྱི་རོགས་སྐྱོར་འདོན་སྤྲོད་བྱེད་པའི་ཐད་གནས་པའི་བདེ་འཇགས་དང་ཆབ་སྲིད་ཀྱི་བཀག་རྒྱ་མེད་པར་གཏོང་དགོས་ཟེར།

ཀུའུ་ཐི་ལོས་སི་ཡིས་བཤད་རྒྱུར། འཁྲུག་རྩོད་མཚམས་འཇོག་པའི་གྲོས་མཐུན་ནི་ཞི་བདེའི་ཕྱོགས་སུ་བསྐྱོད་པའི་གོ་རིམ་གལ་ཆེན་ཞིག་ཡིན་པ་དང་། མ་འོངས་པར་སྔར་བཞིན་སྟོབས་ཤུགས་ཡོད་ཚད་སྐུལ་སློང་བྱས་ནས་སྔར་ལས་ཁྱབ་རྒྱ་ཆེ་བའི་དམིགས་འབེན་མངོན་འགྱུར་བྱེད་པར་སྐུལ་འདེད་གཏོང་དགོས། ཕཱ་ལེ་སི་ཐན་གྱི་ནང་ཁུལ་མཐུན་སྒྲིལ་ནི་ཡུན་རིང་ཞི་བདེ་དང་གཏན་འཇགས་མངོན་འགྱུར་བྱེད་པའི་གནད་འགག་ཡིན་པས། གཅིག་གྱུར་གྱི་ཕཱ་ལེ་སི་ཐན་བཅོས་སྐྱོང་ལས་ཁུངས་འཛུགས་པ་དེ་ཐོག་མའི་ལས་འགན་ཡིན། ཕྱོགས་སོ་སོས་གོ་སྐབས་དམ་འཛིན་བྱས་ཤིང་། ཡིད་རྟོན་རུང་བའི་ཆབ་སྲིད་ཐབས་ལམ་འཛུགས་པར་སྐུལ་འདེད་བཏང་སྟེ། ཕཱ་ལེ་སི་ཐན་དང་དབྱི་སི་རལ། སྔར་ལས་རྒྱ་ཆེ་བི་ས་ཁོངས་སུ་ཞི་བདེ་དང་རེ་བ་ཡོད་པའི་མ་འོངས་པ་བསྐྲུན་དགོས་ཟེར།

ཀུའུ་ཐི་ལོས་སི་ཡིས་བསྟན་དོན། བཙན་བཟུང་མཇུག་སྒྲིལ་བ་དང་གྲོས་མོལ་ལ་བརྟེན་ནས་རྒྱལ་ཁབ་གཉིས་ཀྱི་ཇུས་གཞི་མངོན་འགྱུར་བྱས་ཏེ། ཕཱ་ལེ་སི་ཐན་དང་དབྱི་སི་རལ་གཉིས་རྒྱལ་སྤྱིའི་བཅའ་ཁྲིམས་དང་མཉམ་འབྲེལ་རྒྱལ་ཚོགས་ཀྱི་འབྲེལ་ཡོད་གྲོས་ཆོད། སྔོན་ཆད་ཀྱི་གྲོས་མཐུན་བཅས་ཀྱི་སྒྲོམ་གཞིའི་ནང་ཞི་བདེ་མཉམ་གནས་བྱེད་དུ་འཇུག་རྒྱུ་ནི་དགོས་གལ་ཆེ་བའི་ལས་འགན་ཞིག་ཡིན་པ་དང་། ལག་བསྟར་བྱེད་ཆོག་པའི་རྒྱལ་ཁབ་གཉིས་ཀྱི་ཇུས་གཞི་ལ་བརྟེན་ན། ད་གཟོད་རྒྱལ་ཁབ་གཉིས་ཀྱི་མི་དམངས་ཀྱི་ཐུན་མོང་རེ་འདུན་བསྐངས་ཐུབ་ཟེར།