པེད་ཏིན་གྱིས་དབྱི་སི་རལ་དང་ཧཱ་མཱ་སི་ཡིས་དུས་གཏན་དུ་འཁྲུག་རྩོད་མཚམས་འཇོག་པའི་གྲོས་མཐུན་འགོད་ངེས་ཡིན་པའི་ཚུལ་བསྟན།

ཨ་མེ་རི་ཁའི་ཙུང་ཐུང་པེད་ཏིན་གྱིས་ཚེས15ཉིན་ཕོ་བྲང་དཀར་པོ་ནས་གཏན་བཤད་སྤེལ་ཏེ། དབྱི་སི་རལ་དང་ཕཱ་ལེ་སི་ཐན་གྱི་དབྱི་སི་ལན་འགོག་རྒོལ་རྩ་འཛུགས་ཧཱ་མཱ་སི་ཡིས་ཅཱ་ཧྲ་ས་ཁུལ་གྱི་འཁྲུག་རྩོད་མཚམས་འཇོག་པ་དང་བཀག་འཇུག་ཐེབས་པའི་མི་སྣ་ཕྱིར་གཏོང་བའི་གྲོས་མཐུན་བཀོད་ཡོད་པ་དང་། ཕྱོགས་གཉིས་ཀྱིས་དུས་གཏན་དུ་འཁྲུག་རྩོད་མཚམས་འཇོག་པའི་གྲོས་མོལ་བྱེད་ངེས་རེད་ཟེར།

པེད་ཏིན་གྱིས་བཤད་རྒྱུར། ཕྱོགས་གཉིས་ཀྱིས་ཉིན་དེར་བཀོད་པའི་གྲོས་མཐུན་དེ་དུས་རིམ་གསུམ་དུ་བགོས་ཡོད་པ་དང་། ཡུན་ཚད་ཉིན42ཡིན་པའི་དུས་རིམ་དང་པོར། དབྱི་སི་རལ་དང་ཧཱ་མཱ་སི་ཡིས་འཁྲུག་རྩོད་རྩ་བ་ནས་མེད་པར་གཏོང་རྒྱུ་ཡིན་པ་དང་། དབྱི་སི་རལ་གྱི་དམག་དཔུང་ཅཱ་ཧྲའི་མི་གྲངས་མང་བོའི་འདུས་པའི་ས་ཁུལ་ནས་ཕྱིར་འཐེན་བྱེད་རྒྱུ་ཡིན་ལ། ཧཱ་མཱ་སི་ཡིས་ཨ་མེ་རི་ཁའི་སྤྱི་དམངས་འདུས་པའི་བཀག་འཇུག་མི་སྣ་སྐོར་ཞིག་ཕྱིར་གཏོང་རྒྱུ་ཡིན་པ་དང་། དབྱི་སི་རལ་གྱིས་ཕཱ་ལེ་སི་ཐན་གྱི་བཙོན་མ་བརྒྱ་ཕྲག་འགའ་ཕྱིར་གཏོང་རྒྱུ་ཡིན་པར་མ་ཟད། མི་ཆོས་རིང་ལུགས་ཀྱི་རོགས་སྐྱོར་དངོས་རྫས་མང་བོ་ཅཱ་ཧྲ་ས་ཁུལ་དུ་སྐྱེལ་བར་ཆོག་མཆན་འགོད་རྒྱུ་རེད། འཁྲུག་རྩོད་མཚམས་འཇོག་པའི་སྐབས་སུ་དབྱི་སི་རལ་དང་ཧཱ་མཱ་སི་ཡིས་དུས་གཏན་དུ་འཁྲུག་རྩོད་མཚམས་འཇོག་པ་མངོན་འགྱུར་བྱེད་པར་གྲོས་མོལ་བྱེད་རྒྱུ་རེད། དེ་ནི་གྲོས་མཐུན་གྱི་དུས་རིམ་གཉིས་པ་རེད། དུས་རིམ་གསུམ་པར་ཧཱ་མཱ་སི་ཡིས་རྐྱེན་ལམ་དུ་ཤོར་བའི་བཀག་འཇུག་མི་སྣའི་གདུང་རུས་ཕྱིར་སྤྲོད་རྒྱུ་ཡིན་ལ། ཅཱ་ཧྲ་ས་ཁུལ་གྱིས་གཞི་རྒྱ་ཆེ་བའི་བསྐྱར་འཛུགས་འཕེལ་རིམ་མགོ་རྩོམ་རྒྱུ་རེད་ཟེར།

པེད་ཏིན་གྱིས་ད་རུང་བཤད་རྒྱུར། གྲོས་མཐུན་དེའི་སྒྲོམ་གཞི་ནི་ཁོས་ན་ནིང་ཟླ་ལྔ་བར་བཏོན་པའི་གྲོས་གཞི་དང་གཅིག་འདྲ་ཡིན་ཟེར།

ཉིན་དེའི་སྔ་དྲོར། ཨ་མེ་རི་ཁའི་འགན་ཁུར་བར་སྒུག་པའི་ཙུང་ཐུང་ཐི་ལིང་ཕུའུ་ཡིས་དྲ་ཐོག་ཏུ་རྩོམ་ཡིག་སྤེལ་ཏེ། གྲོས་མཐུན་དེ་བཀོད་པ་ནི་རང་ཉིད་ལ2024ལོའི་ཨ་མེ་རི་ཁའི་ཙུང་ཐུང་འདེམ་བསྐོའི་ཁྲོད་རྒྱལ་ཁ་ཐོབ་པས་ཡིན་པ་དང་། རང་གི་རྒྱལ་ཁབ་བདེ་འཇགས་དམག་དཔུང་དང་དབུས་ཤར་གནད་དོན་གྱི་ཆེད་མངག་ཕོ་ཉའི་བྱས་རྗེས་ནན་བཤད་བྱས།

པེད་ཏིན་གྱིས་ཐི་ལིང་ཕུའུ་ཡི་གཏམ་བཤད་ལ་ཐད་ཀར་ལན་བཏབ་མེད། ཁོས་བཤད་རྒྱུར། སྐབས་རྗེས་མའི་ཨ་མེ་རི་ཁའི་སྲིད་གཞུང་གིས་གྲོས་མཐུན་དེ་ལག་བསྟར་བྱེད་པར་ལྟ་རྟོག་བྱེད་རྒྱུ་ཡིན་པས། ངས་རང་གི་ཚོགས་ཁག་གིས་མི་འགྱངས་པར་ལས་འགན་ཁུར་རྒྱུ་ཡིན་པའི་ཚོགས་ཁག་བར་གྲོས་མོལ་ཟབ་མོ་བྱས་ཏེ། ང་ཚོས་གཅིག་མཐུན་གྱི་འབོད་སྐུལ་གཏོང་བར་ཁག་ཐེག་བྱེད་དགོས་པའི་མཛུབ་སྟོན་བྱས་ཡོད་ཟེར།