དབྱི་སི་རལ་དང་ཧཱ་མཱ་སི་ཡིས་ཅཱ་ཧྲ་ས་ཁུལ་གྱི་འཁྲུག་རྩོད་མཚམས་འཇོག་པའི་གྲོས་མཐུན་བཀོད།

ཁཱ་ཐར་གྱི་དབུ་བཞུགས་བློན་ཆེན་ནམ་ཕྱི་འབྲེལ་བློན་ཆེན་མུའུ་ཧན་མའོ་ཏི་ཡིས་ཚེས15ཉིན་གྱི་དགོང་མོར་ཁཱ་ཐར་གྱི་རྒྱལ་ས་ཏའོ་ཧཱ་ནས་ཁྱབ་བསྒྲགས་བྱས་དོན། དབྱི་སི་རལ་དང་ཕཱ་ལེ་སི་ཐན་གྱི་དབྱི་སི་རལ་འགོག་རྒོལ་རྩ་འཛུགས་ཧཱ་མཱ་སི་ཡིས་ཅཱ་ཧྲ་ས་ཁུལ་གྱི་འཁྲུག་རྩོད་མཚམས་འཇོག་པའི་གྲོས་མཐུན་བཀོད་ཡོད་ཟེར།

མུའུ་ཧན་མའོ་ཏི་ཡིས་ཉིན་དེའི་དགོང་མོར་ཐེངས་འགར་རྗེས་སུ་སྣུར་བའི་གསར་འགོད་པའི་སྣེ་ལེན་ཚོགས་འདུའི་སྟེང་བཤད་རྒྱུར། ཁཱ་ཐར་དང་ཨེ་ཅིབ། ཨ་མེ་རི་ཁ་བཅས་ཀྱི་མཉམ་འབྲེལ་འདུམ་འགྲིག་བྱ་བར་ལེགས་འགྲུབ་བྱུང་བ་དང་། ཅཱ་ཧྲའི་འཁྲུག་རྩོད་ཕྱོགས་ཁག་སོ་སོས་འཁྲུག་རྩོད་མཚམས་འཇོག་པ་དང་བཀག་འཇུག་ཐེབས་པའི་མི་སྣའི་བརྗེ་སྤོར་ཐད་ནས་གྲོས་མཐུན་བཀོད་ཟེར། གྲོས་མཐུན་དེ་འི་དུས་རིམ་དང་པོ་ནི་ཟླ་དང་པོའི་ཚེས19ཉིན་ནས་ལག་བསྟར་བྱེད་རྒྱུ་ཡིན་པ་དང་། ཧཱ་མཱ་སི་ཡིས་བཀག་འཇུག་ཐེབས་པའི་མི་སྣ33ཕྱིར་གཏོང་རྒྱུ་ཡིན་ལ། དབྱི་སི་རལ་གྱིས་ཕཱ་ལེ་སི་ཐན་གྱི་བཀག་འཇུག་མི་སྣ་ཕྱིར་གཏོང་རྒྱུ་རེད། གྲོས་མཐུན་གྱི་དུས་རིམ་གཉིས་པ་དང་དུས་རིམ་གསུམ་པའི་བྱེ་བྲག་གི་ནང་དོན་དེ་དུས་རིམ་དང་པོ་ཡོངས་འགྲུབ་བྱས་རྗེས་ཁྱབ་སྒྲོག་བྱེད་རྒྱུ་ཡིན་ཟེར།

མུའུ་ཧན་མའོ་ཏི་ཡིས་བསྟན་དོན། བར་འདུམ་ཕྱོགས་ཀྱིས་ཧཱ་མཱ་སི་དང་དབྱི་སི་རལ་བར་མཉམ་ལས་བྱས་ཏེ་འཁྲུག་རྩོད་མཚམས་འཇོག་པའི་གྲོས་མཐུན་དངོས་འབེབས་བྱེད་པར་སྐུལ་འདེད་གཏོང་རྒྱུ་ཡིན། གྲོས་མཐུན་དེ་ནི་ས་ཁུལ་གྱི་རྒྱུན་མཐུད་ཞི་བདེ་མངོན་འགྱུར་བྱེད་པའི་གོ་རིམ་གལ་ཆེན་ཞིག་ཡིན་ལ། བར་འདུམ་ཕྱོགས་ཀྱི་ལྟ་རྟོག་ཚོགས་ཁག་གིས་གྲོས་མཐུན་དེར་བརྩི་འཇོག་ཐོབ་པར་འགན་སྲུང་བྱེད་རྒྱུ་ཡིན་ཟེར།

དབྱི་སི་རལ་གྱི་ཕྱི་འབྲེལ་བློན་ཆེན་སཱ་ཨར་གྱིས་ཚེས15ཉིན་གསལ་སྒྲོག་སྤེལ་ཏེ་བཤད་རྒྱུར། དབྱི་སི་རལ་གྱི་བདེ་འཇགས་ནེ་ཀི་ཡིས་ཚེས16ཉིན་གྲོས་ཚོགས་བསྡུས་ཏེ། ཧཱ་མཱ་སིའི་བར་བཀོད་པའི་འཁྲུག་རྩོད་མཚམས་འཇོག་པ་དང་བཀག་འཇུག་ཐེབས་པའི་མི་སྣ་ཕྱིར་གཏོང་བའི་གྲོས་མཐུན་ལ་བརྡས་ཐག་གཅོད་རྒྱུ་ཡིན་ཟེར། དབྱི་སི་རལ་གྱི་ཙུང་ཐུང་ཧི་ཨར་ཙོ་ཀི་ཡིས་ཉིན་དེར་བརྙན་འཕྲིན་གཏམ་བཤད་སྤེལ་ཏེ། སྲིད་གཞུང་གིས་གྲོས་མཐུན་དེར་ཆོག་མཆན་འགོད་དགོས་པའི་འབོད་སྐུལ་བཏང་།

ཧཱ་མཱ་སིའི་མཐོ་རིམ་དཔོན་པོ་ཧཱ་ཡཱ་ཡིས་ཚེས15ཉིན་གྱི་དགོང་མོར་བརྙན་འཕྲིན་གཏམ་བཤད་སྤེལ་ཏེ་བསྟན་དོན། ཅཱ་ཧྲ་ས་ཁུལ་གྱི་འཁྲུག་རྩོད་མཚམས་འཇོག་པའི་གྲོས་མཐུན་བཀོད་པ་ནི་ཕཱ་ལེ་སི་ཐན་མི་དམངས་ཀྱི་འཐབ་འཁྲུག་ཁྲོད་ཀྱི་ལོ་རྒྱུས་རང་བཞིན་ལྡན་པའི་དུས་ཤིག་ཡིན། ཅཱ་ཧྲ་ས་ཁུལ་དེ་བསྐྱར་འཛུགས་དང་འཐབ་འཁྲུག་གི་ཤུགས་རྐྱེན་མེད་པའི་དུས་རིམ་གསར་བར་བསླེབས་སྲིད་ལ། ཕཱ་ལེ་སི་ཐན་མི་དམངས་ལ་ཅཱ་ཧྲ་ས་ཁུལ་བསྐྱར་འཛུགས་བྱེད་པའི་ནུས་པ་ལྡན་པར་ཡིད་ཆེས་ཡོད་ཟེར།