ཧྥ་རན་སིའི་ཙུང་ལི་ཡིས་རྒྱལ་ཁབ་ཀྱི་ཆབ་སྲིད་གཏན་འཇགས་སླར་གསོ་བྱེད་དགོས་པའི་འབོད་སྐུལ་བཏང་།

པེ་ལུའུ་ཡིས་བཤད་རྒྱུར། ཧྥ་རན་སིའི་དཔལ་འབྱོར་དཀའ་ཁག་ལ་འཕྲད་ཡོད་པ་དང་། ནོར་སྲིད་འགྲོ་སོང་ཇེ་མང་དུ་སོང་སྟེ2024ལོར་རྒྱལ་ནང་སྤྱིའི་ཐོན་རིན་གྱི་བརྒྱ་ཆའི་དྲུག་ཡན་ལ་བསླེབས་ཡོད་ཅིང་། སྲིད་གཞུང་གིས2025ལོའི་དཔལ་འབྱོར་འཕར་ཚད་དེ་སྔོན་གྱི་བརྒྱ་ཆའི་གཅིག་དང་གྲངས་ཆུང་གཅིག་ནས་བརྒྱ་ཆའི་ཐིག་དང་གྲངས་ཆུང་དགུ་མར་བཅགས་ཡོད་ཟེར། ཁོས་གྲོས་ཁང་གིས་སྐབས་སྔོན་མའི་སྲིད་གཞུང་ལ་སྐྱོན་འཛུགས་ཐོབ་རྗེས་བསྐྱུར་བའི2025ལོའི་རྒྱལ་ཁབ་ཀྱི་ནོར་སྲིད་སྔོན་རྩིས་དང་སྤྱི་ཚོགས་འགན་སྲུང་སྔོན་རྩིས་ལ་གྲོས་མཐུན་འགོད་དགོས་པའི་འབོད་སྐུལ་བཏང་།

པེ་ལུའུ་ཡིས་བསྟན་དོན། ཧྥ་རན་སི་ཆབ་སྲིད་ཀྱི་དཀའ་ཁག་ལ་འཕྲད་པའི་གནས་ཚུལ་འོག ཕྱོགས་སོ་སོས་མཐུན་སྦྱོར་བྱས་ཏེ་རྒྱལ་ཁབ་ཀྱི་གཏན་འཇགས་སླར་གསོ་བྱེད་དགོས་ཟེར། ཁོས་སྤྱི་ཚོགས་ལས་རིགས་སོ་སོ་དང་མཉམ་དུ། དུས་ཡུན་ཐུང་ངུའི་ནང་ལས་ཁྱུར་ངལ་གསོའི་ལམ་ལུགས་ཀྱི་བཅོས་བསྒྱུར་དེ་རྒྱུན་ལྡན་དུ་འགྲོ་བར་སྐུལ་འདེད་གཏོང་རྒྱུ་ཡིན་ཟེར། ཁོས་གནས་སྤོར་སྡོད་དམངས་ཀྱི་གནད་དོན་གླེང་སྐབས། སྲིད་གཞུང་གིས་ཚོད་འཛིན་དང་ལྟ་རྟོག་དོ་དམ། ཕྱིར་ལྡོག་བཅས་ཀྱི་མི་གྲངས་ཀྱི་འཇིགས་ཉེན་ནས་རྒྱལ་ཁབ་ཀྱི་གོང་བུར་འདྲིལ་ཤུགས་སྐོར་གྱི་གནས་སྤོར་སྡོད་དམངས་སྲིད་ཇུས་ཤིག་ལག་བསྟར་བྱེད་པའི་འགན་འཁྲི་ཡོད་པར་མ་ཟད། གནས་སྤོར་སྡོད་དམངས་ཚོད་འཛིན་བྱེད་པའི་ལས་ཁུངས་བརྒལ་བའི་མཐུན་སྦྱོར་ཨུ་ཡོན་ལྷན་ཁང་སླར་གསོ་བྱེད་རྒྱུ་ཡིན། དེ་ལས་གཞན་ཉིང་རྡུལ་ནུས་པ་དེ་སྐྱེ་ཁམས་ཚུལ་བསྒྱུར་ཐད་ལ་གལ་འགངས་ཧ་ཅང་ཆེ་བ་དང་། རྒྱལ་ཡོངས་གྲོས་ཚོགས་སྤེལ་ནས་ཧྥ་རན་སིའི་ཆུའི་ཐོན་ཁུངས་ཀྱི་བེད་སྤྱོད་གནད་དོན་ལ་གྲོས་བསྡུར་བྱེད་རྒྱུ་ཡིན་ཟེར།