ཡོ་ནན་དང་ཨུ་རུ་སི་ཡིས་ཉིང་རྡུལ་ནུས་པའི་མཉམ་ལས་ཀྱི་བཟོད་སྒོམ་བརྗེད་ཐོ་བཀོད།

ཡོ་ནན་འཕྲིན་གཏོང་ཁང་གིས་བསྒྲགས་པ་ལྟར་ན། ཡོ་ནན་གྱི་ཙུང་ལི་ཧྥན་མེན་ཀྲིན་གྱིས་ཚེས14ཉིན་འཚམས་འདྲིར་ཡོང་བའི་ཨུ་རུ་སིའི་ཙུང་ལི་མུས་ཧྲུའུ་སི་ཅིང་དང་མཉམ་དུ་རྒྱལ་ཁབ་གཉིས་ཀྱི་ཁེ་ལས་ཀྱིས་ཉིང་རྡུལ་ནུས་པའི་མཉམ་ལས་ཀྱི་བཟོད་སྒོམ་བརྗེད་ཐོ་བཀོད་པར་བདེན་དཔང་བྱས།

ཡོ་ནན་སྨྱན་བྱད་ཀྱིས་བསྒྲགས་པ་ལྟར་ན། མཉམ་ལས་ཀྱི་བཟོད་སྒོམ་བརྗེད་ཐོ་དེ་ཨུ་རུ་སིའི་རྒྱལ་ཁབ་རྡུལ་ཕྲན་ནུས་པའི་སྡེ་ཚོགས་དང་ཡོ་ནན་གློག་ཤུགས་སྡེ་ཚོགས་ཀྱིས་བཀོད་པ་རེད།

ཡོ་ནན་འཕྲིན་གཏོང་ཁང་གིས་ཚེས13ཉིན་བསྒྲགས་དོན། ཧྥན་མེན་ཀྲིན་གྱིས་ཉིན་དེར་ཧི་ནེ་ནས་ཨུ་རུ་སིའི་རྒྱལ་ཁབ་རྡུལ་ཕྲན་ནུས་པའི་སྡེ་ཚོགས་ཀུང་ཟིའི་དབུ་བཞུགས་ལག་བསྟར་དཔོན་པོ་ལེ་ཧཱ་ཆའོ་ཧྥུའུ་ལ་ཐུག་འཕྲད་བྱེད་སྐབས་བསྟན་དོན། ཡོ་ནན་གྱིས་ཉིང་རྡུལ་ནུས་པའི་གློག་འདོན་ལས་གཞི་སླར་གསོ་བྱས་ཏེ། ནུས་ཁུངས་བདེ་འཇགས་ལ་འགན་སྲུང་དང་། རྒྱལ་ཁབ་ཀྱི་འཕེལ་རྒྱས་ལ་ཞབས་འདེགས་ཞུ་བ། 2050ལོར་དྲོད་རླངས་ཕྱིར་གཏོང་མེད་པར་བྱེད་པའི་དམ་བཅའ་ལག་བསྟར་བྱེད་པའི་གྲོས་འགོ་བཏོན་ཡོད་པས། ཨུ་རུ་སིའི་ཕྱོགས་ཀྱིས་ཡོ་ནན་གྱིས་ཞི་བདེའི་དམིགས་ཡུལ་རྨང་གཞིར་བྱས་པའི་ཉིང་རྡུལ་ནུས་པ་དང་ཉིང་རྡུལ་ལག་རྩལ་འཕེལ་རྒྱས་སུ་གཏོང་བར་རྒྱབ་སྐྱོར་བྱེད་པར་རེ་བཞིན་ཡོད་ཟེར། ལེ་ཧཱ་ཆའོ་ཧྥུའུ་ཡིས་བསྟན་དོན། ཨུ་རུ་སིའི་རྒྱལ་ཁབ་རྡུལ་ཕྲན་ནུས་པའི་སྡེ་ཚོགས་ཀྱིས་ཡོ་ནན་ལ་རོགས་རམ་བྱས་ཏེ་ཉིང་རྡུལ་ནུས་པའི་གློག་འདོན་ས་ཚིགས་འཛུགས་སྐྲུན་བྱེད་པ་དང་། ལག་རྩལ་བོགས་གཏོང་བྱས་ནས་ཡོ་ནན་གྱི་ཉིང་རྡུལ་ནུས་པའི་ཐོན་རྫས་རང་ཐོན་ཅན་དང་ཉིང་རྡུལ་ནུས་པའི་བཟོ་ལས་ཀྱི་འཕེལ་རྒྱས་སོགས་ལ་རོགས་རམ་བྱེད་རྒྱུ་ཡིན་ཟེར།

གཞན་ཡང་ཚེས14ཉིན་བསྒྲགས་པ་ལྟར་ན། ཨུ་རུ་སིའི་རྒྱལ་ཁབ་རྡུལ་ཕྲན་ནུས་པའི་སྡེ་ཚོགས་ཀུང་ཟིའི་ཁོངས་སུ་གཏོགས་པའི་ཨུ་རུ་སིའི་རྡུལ་ཕྲན་ནུས་པའི་ནུས་ཁུངས་ལས་གཞིའི་ཀུང་ཟི་ཡིས་ཉིན་དེར་ཡོ་ནན་གློག་ཤུགས་སྡེ་ཚོགས་བར་ཉིང་རྡུལ་ནུས་པའི་ཁྱབ་ཁོངས་སུ་མཉམ་ལས་སྤེལ་བའི་བཟོད་སྒོམ་བརྗེད་ཐོ་བཀོད། བསྒྲགས་པ་ལྟར་ན། ཨུ་རུ་སིའི་ཙུང་ཐུང་ཕུའུ་ཅིན་གྱིས2024ལོའི་ཟླ6པར་ཡོ་ནན་དུ་འཚམས་འདྲི་བྱེད་སྐབས་བསྟན་དོན། ཨུ་རུ་སི་དང་ཡོ་ནན་རྒྱལ་ཁབ་གཉིས་ལ་ཞི་བའི་སྒོ་ནས་ཉིང་རྡུལ་ནུས་པ་བེད་སྤྱོད་བྱེད་པའི་ཁྱབ་ཁོངས་སུ་མཉམ་ལས་ཀྱི་མདུན་ལྗོངས་རྒྱ་ཆེན་པོ་ཡོད་ཟེར།