མཚོ་བྱང་ཁུལ་ནས་མདོ་ལ་རྫོང་གི་ཡུལ་ཁོངས་ཡོངས་ལ་སྐྱེ་ལྡན་ཁས་ལེན་གཅིག་པུ་ཐོབ།

ཉེ་ལམ། མདོ་ལ་རྫོང་ཨུ་དང་རྫོང་མི་དམངས་སྲིད་གཞུང་གིས་གཙོ་ཁྲིད་དང་། མདོ་ལ་རྫོང་ཞིང་ཕྱུགས་ཆུ་བེད་དང་ཚན་རྩལ་ཅུ་ཡིས་རེ་ཞུ་བྱས་པའི་བཙུན་མོ་གཞོང་དང་རྫ་དམར་གྱི་རྩྭ་ས་ལྟ་ཞིབ་རྒྱ་ཁྱོན་མུའུ་ཁྲི122.4དང་ནོར་ལུག་ཁ་གྲངས་ཁྲི16.48དེ། ཀྲུང་གོའི་ལྗང་མདོག་ཧྭ་ཞ་སྐྱེ་ལྡན་ཟས་རིགས་ཁས་ལེན་ལྟེ་གནས་དང་མཚོ་སྔོན་ཞིང་ཆེན་ལྗང་མདོག་ཟས་རིགས་གཞུང་ལས་ཁང་གི་ཆེད་མཁས་པའི་དཔྱད་ཞིབ་བརྒྱུད། སྐྱེ་ལྡན་སྤོ་སྒྱུར་ཁས་ལེན་དཔང་ཡིག་ཐོབ་པས་མདོ་ལ་རྫོང་གི་ཁོངས་ཡོངས་སྐྱེ་ལྡན་ཁས་ལེན་ཐོབ་པ་མཚོ་བྱང་ཁུལ་གྱི་གཅིག་པུ་རུ་གྱུར། ད་ཆ་མདོ་ལ་རྫོང་གི་རྩྭ་ཐང་དང་བོད་ལུག ནོར་ནག་ལ་བསྟུད་མར་ལོ་དགུར་སྐྱེ་ལྡན་ཁས་ལེན་བསྐྱར་མ་ཐོབ། ཁས་ལེན་ཐོབ་པའི་རྩྭ་སའི་རྒྱ་ཁྱོན་མུའུ་ཁྲི1531.52དང་། “ཆས་གསུམ་རྟགས་གཅིག”ཁས་ལེན་ཐོབ་པའི་ཐོན་རྫས100ཡོད་ཅིང་། དེའི་ཁྲོད་རྒྱལ་ཁབ་ས་ཁམས་རྟགས་མའི་ཞིང་ལས་ཐོན་རྫས3དང་། ལྗང་མདོག་ཐོན་རྫས53 སྐྱེ་ལྡན་ཐོན་རྫས44འདུས། ཐེངས་འདིར་ཁོངས་ཡོངས་སྐྱེ་ལྡན་ཁས་ལེན་ཐོབ་པ་ཡིས་མདོ་ལ་རྫོང་གི་ཞིང་ཕྱུགས་ཐོན་རྫས་ཀྱི་སྤུས་ཀ་དང་ཁྲོམ་རའི་འགྲན་རྩོད་ནུས་ཤུགས་མཐོ་རུ་བཏང་ལ། མདོ་ལའི་རོང་འབྲོག་མང་ཚོགས་ལ་དཔལ་འབྱོར་ཡོང་འབབ་འཕར་བར་བྱས་པ་མ་ཟད། མདོ་ལ་རྫོང་གི་ལྗང་མདོག་སྐྱེ་ལྡན་ཞིང་ཕྱུགས་ལས་ཁྱབ་ཁོངས་ཀྱི་སྔོན་ཐོན་གོ་གནས་དང་རྒྱལ་ཁའི་ཉམས་མྱོང་ཕྱིར་མཚོན་བྱས།

མ་འོངས་པར་མདོ་ལ་རྫོང་གིས་ཁོངས་ཡོངས་སྐྱེ་ལྡན་ཁས་ལེན་ཐོབ་པ་ནི་མགོ་བརྩམས་ས་གསར་བ་རུ་བྱས་ནས་ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་ཕྱིར་གཏོང་བྱ་ཡུལ་བསྐྲུན་པ་དམིགས་འབེན་དུ་འཛིན་ཞིང་། སྐྱེ་ལྡན་ཕྱུགས་ལས་ཐོན་ལས་ཀྱི་འཕེལ་རྒྱས་ལ་སྔར་བས་ཤུགས་སྣོན་དགོས། ཐོན་ལས་རིམ་སྤོར་སྐུལ་འདེད་དང་ཆས་རྟགས་ཤེས་ཚད་མཐོར་འདེགས། ཐོན་རྫས་ཟུར་སྣོན་རིན་ཐང་འཕར་བ། སྤུས་ཀའི་ཁུངས་སྙེག་མ་ལག་འཐུས་ཚང་། སྤུས་ཚད་བདེ་འཇགས་ཆུ་ཚད་མཐོར་གཏོང་སོགས་ཀྱི་ཐད་ལ་མ་རྩ་གཏོང་ཤུགས་རྒྱུན་མཐུད་ཆེ་རུ་བཏང་ནས་རང་རྫོང་གི་ཕྱུགས་ལས་ལྗང་མདོག་དང་སྐྱེ་ལྡན། ནུས་མཐོའི་ཕྱོགས་སུ་འཕེལ་བར་སྐུལ་འདེད་གཏོང་དགོས་ཤིང་འབྲེལ་ཡོད་ཐོན་ལས་མཐུན་སྦྱོར་འཕེལ་རྒྱས་སྒོས་རྫོང་ཁོངས་དཔལ་འབྱོར་གྱི་སྤུས་ཚད་མཐོ་བའི་འཕེལ་རྒྱས་མངོན་འགྱུར་བྱེད་དགོས།