​ཡུག་རེན་དམག་གིས་ཁུའར་སི་ཁེ་མངའ་སྡེའི་ཨུ་རུ་སུའི་བཀོད་འདོམས་ཁང་ཞིག་ལ་གནད་འཁེལ་རྡུང་རྡེག་བཏང་བ།

ཡུག་རེན་དམག་གིས་ཁུའར་སི་ཁེ་མངའ་སྡེའི་ཨུ་རུ་སུའི་བཀོད་འདོམས་ཁང་ཞིག་ལ་གནད་འཁེལ་རྡུང་རྡེག་བཏང་བ།

ཡུག་རེན་དྲག་ཆས་དཔུང་སྡེའི་སྤྱི་ཁྱབ་དྲག་ཇུས་པུའུ་ཡིས་ཚེས7ཉིན་སྨྱན་སྦྱོར་ཐོག་རྩོམ་ཡིག་སྤེལ་ནས། ཡུག་རེན་དམག་གིས་ཉིན་དེར་ཨུ་རུ་སུའི་ཁུའར་སི་ཁེ་མངའ་སྡེའི་པེ་ལ་ཡ་ས་ཁུལ་དུ་ཡོད་པའི་ཨུ་རུ་སུའི་དམག་གི་རང་ཚུགས་མཚོ་དམག་སྐམ་འཐབ་སྟོང་ཤོག་ཨང810ཡི་བཀོད་འདོམས་ཁང་ཞིག་ལ་གནད་འཕིགས་རྡུང་རྡེག་བཏང་ཡོད་ཅེས་བསྟན།

ཡུག་རེན་དྲག་ཆས་དཔུང་སྡེའི་སྤྱི་ཁྱབ་དྲག་ཇུས་པུའུ་ཡིས། ད་ཐེངས་ཀྱི་མེ་ཤུགས་རྡུང་རྡེག་དང་ཉེ་དུས་ཁུའར་སི་ཁེ་མངའ་སྡེར་ཡོད་པའི་ཨུ་རུ་སུའི་དམག་ལ་དམིགས་ནས་སྤེལ་བའི་དམག་དོན་འགུལ་སྐྱོད་རབ་དང་རིམ་པ་ནི་ཡུག་རེན་སྐམ་དམག་གི་གཞོགས་འདེགས་འོག་སྤེལ་བ་ཞིག་དང་། ཡུག་རེན་སྐམ་དམག་གིས་མིག་སྔར་ཨུ་རུ་སུའི་དམག་ལ་ཕར་རྒོལ་གསར་པ་ཞིག་སྤེལ་མུས་ཡོད་ཅེས་བཤད།

དེ་མིན། ཨུ་རུ་སུ་དང་ཡུག་རེན་དམག་དཔུང་གིས་ད་ལྟ་པོ་ཁེ་ལུ་ཧྥུ་སི་ཁེ་དང་ཁུ་ལ་ཧོ་ཝོ་སོགས་ནས་འཁྲུག་བཞིན་ཡོད་ཅིང་། ཡུག་རེན་དམག་གིས་ཁུ་ལ་ཧོ་ཝོ་ནུབ་བྱང་རྒྱུད་ཀྱི་སི་ལ་ཧྥུ་ཡང་ཁ་དང་། ལྷོ་ནུབ་རྒྱུད་ཀྱི་ཏ་ཆི་ནོ་ཡེ་དང་ནུབ་རྒྱུད་ཀྱི་ཨན་ཏེ་ལེ་ཡེ་ཧྥུ་ཁ་སོགས་ཐིག་ཕྱིའི་འགོག་སྲུང་ར་བར་མུ་མཐུད་ཨུ་རུ་སུའི་དམག་བཀག་འགོག་བྱེད་བཞིན་ཡོད།

ཨུ་རུ་སུའི་རྒྱལ་སྲུང་པུའུ་ཡིས་ཚེས7ཉིན་བརྡ་ཁྱབ་བཏང་བར་གཞིགས་ན། འདས་ཟིན་པའི་ཉིན་གཅིག་གི་ནང་། ཨུ་རུ་སུའི་དྲག་ཆས་དཔུང་སྡེའི་མཁའ་སྐྱོད་དམག་དང་། མི་མེད་གནམ་གྲུ། མེ་ཤུགས་འཕུར་མདེལ་དཔུང་སྡེ་དེ་བཞིན་མེ་སྒྱོགས་དམག་བཅས་ཀྱིས་ཡུག་རེན་གྱི་དམག་སྤྱོད་གནམ་ཐང་དང་གོ་མཚོན་འཇོག་སའི་མཛོད་ཁང་སོགས་ཀྱི་སྒྲིག་ཆས་ལ་རྡུང་རྡེག་བཏང་བ་དང་ཆབས་ཅིག ཡུག་རེན་དྲག་ཆས་མི་སྣ་དང་དེ་བཞིན་ཕྱི་རྒྱལ་གླས་དམག་རུབ་བསྡུས་ཁུལ་དང་གོ་མཚོན་འཇོག་སའི་མཛོད་ཁང་རྩ་གཏོར་བཏང་ཡོད། དེ་མིན། ཨུ་རུ་སུའི་མཁའ་ཟོན་དཔུང་སྡེས་ཧའེ་མ་སིའི་འཕྲུལ་སྒུལ་རང་བཞིན་ཆེ་བའི་མེ་སྒྱོགས་མ་ལག་གིས་འཕངས་པའི་སྒྱོགས་མདེལ6དང་མི་མེད་གནམ་གྲུ50ལྷག་གཏོར་ཡོད་པ་རེད།