པཱ་ཞི་ཡིས་ཨ་སེ་པེད་ཅང་མཁའ་འགྲུལ་ཀུང་སིའི་དོན་རྐྱེན་བྱུང་བའི་འགྲུལ་སྐྱེལ་གནམ་གྲུའི“སྒམ་ནག་པོའི”གཞི་གྲངས་ཧ་སག་སི་ཐན་ལ་རྩིས་སྤྲོད་བྱས།

ཚེས6ཉིན།  པཱ་ཞིའི་མཁའ་དམག་གིས་བསྟན་དོན།   ཨ་སེ་པེད་ཅང་མཁའ་འགྲུལ་ཀུང་སིའི་དོན་རྐྱེན་བྱུང་བའི་འགྲུལ་སྐྱེལ་གནམ་གྲུའི་འཕུར་སྐྱོད་ཆ་འཕྲིན་ཐོ་འགོད་མ་ལག་གི“སྒམ་ནག་པོའི”གཞི་གྲངས་ལ་དབྱེ་ཞིབ་ལེགས་གྲུབ་བྱུང་བར་མ་ཟད། གཞི་གྲངས་ཧ་སག་སི་ཐན་མཁའ་འགྲུལ་དོན་རྐྱེན་བརྟག་དཔྱད་ཅུའུ་ལ་རྩིས་སྤྲོད་བྱས་པ་རེད།

པཱ་ཞིའི་མཁའ་དམག་གིས་ཉིན་དེར་སྤེལ་བའི་གསལ་བསྒྲགས་ལྟར་ན། ཚེས1ཉིན། ཨ་སེ་པེད་ཅང་མཁའ་འགྲུལ་ཀུང་སིའི་དོན་རྐྱེན་བྱུང་བའི་འགྲུལ་སྐྱེལ་གནམ་གྲུའི“སྒམ་ནག་པོ”པཱ་ཞི་ལིས་ཡར་འབྱོར་ནས་པཱ་ཞིའི་མཁའ་འགྲུལ་དོན་རྐྱེན་བརྟག་དཔྱད་དང་སྔོན་འགོག་ལྟེ་གནས་སུ་བསྐྱལ་བ་རེད། གྲངས་གཞི་ལེན་པ་དང་དབྱེ་ཞིབ་བྱ་བ་ཚེས4ཉིན་མཇུག་བསྒྲིལ་བ་རེད། རྒྱལ་སྤྱིའི་གྲོས་མཐུན་གཞིར་བཟུང་ནས་པཱ་ཞི་མཁའ་དམག་གིས་གཞི་གྲངས་ཚང་མ་ཐེངས་འདིའི་དོན་རྐྱེན་བརྟག་དཔྱད་བྱེད་འགན་འཁུར་བའི་ཧ་སག་སི་ཐན་མཁའ་འགྲུལ་དོན་རྐྱེན་བརྟག་དཔྱད་ཅུའུ་ལ་རྩིས་སྤྲོད་བྱས་པ་རེད།

2024ལོའི་ཟླ12པའི་ཚེས25ཉིན།  ཨ་སེ་པེད་ཅང་མཁའ་འགྲུལ་ཀུང་སིའི་ ཨ་སེ་པེད་ཅང་གི་པ་ཁུའུ་ནས་ཨུ་རུ་སུའི་ཀེ་ལུའོ་ཙི་ཉི་རུ་འཕུར་བའི་འགྲུལ་སྐྱེལ་གནམ་གྲུ་ཞིག་ཧ་སག་སི་ཐན་ནུབ་རྒྱུད་གྲོང་ཁྱེར་ཨ་ཁེ་ཐའོ་ཉེ་འདབས་སུ་ལྷུང་བ་རེད། གནམ་གྲུའི་སྟེང་ཁྱོན་བསྡོམས་འགྲུལ་པ62དང་གནམ་གྲུའི་ནང་གི་ལས་བྱེད་མི་སྣ5ཡོད་པའི་ནང་མི38རྐྱེན་ལམ་དུ་ཤོར། དོན་རྐྱེན་བྱུང་བའི་འགྲུལ་སྐྱེལ་གནམ་གྲུ་དེ་པཱ་ཞིའི་མཁའ་འགྲུལ་བཟོ་ལས་ཀུང་སིས་བཟོས་པ་ཞིག་རེད།