ཡེ་མིན་ཧུའུ་སའེ་དྲག་ཆས་ཀྱིས་ཨ་མེ་རི་ཁའི་གནམ་གྲུ་འབབ་སའི་གྲུ་གཟིངས་དང་དབྱི་སི་རལ་གྱི་དམིགས་འབེན་ལ་འཇབ་རྒོལ་བྱས།

ཡེ་མེན་ཧུའུ་སའེ་དྲག་ཆས་ཀྱིས་ཚེས་དྲུག་ཉིན་གྱི་དགོང་མོར་ཁྱབ་བསྒྲགས་བྱས་པ་ལྟར་ན། རྩ་འཛུགས་དེས་ཧུང་ཧའེ་རྒྱ་མཚོ་རུ་ཨ་མེ་རི་ཁའི་ཧཱ་ལིས.ཏུའུ་ལུའུ་མིན་རྟགས་ཅན་གྱི་གནམ་གྲུ་འབབ་སའི་གྲུ་གཟིངས་ལ་འཇབ་རྒོལ་བྱས་པ་མ་ཟད། དབྱི་སི་རལ་གྱི་ཐི་ལ་ཝེ་ཧྥུའུ་སོགས་ས་ཆའི་དམིགས་འབེན་ལ་འཇབ་རྒོལ་ཐེངས་གསུམ་བྱས་ཟེར།

ཧུའུ་སའེ་དྲག་ཆས་ཀྱི་མགྲིན་ཚབ་པ་ཡེ་ཧའེ་ཡཱ.ས་ལེ་མུའུ་ཡིས་རྩ་འཛུགས་དེས་བཀག་སྡོམ་བྱས་པའི་མ་ཞི་ལཱ་ཡ་བརྙན་འཕྲིན་ཁང་དུ་བརྙན་རིས་གསལ་བསྒྲགས་སྤེལ་སྐབས་བཤད་རྒྱུར། རྩ་འཛུགས་དེས་འཕུར་མདེལ་དང་མི་མེད་གནམ་གྲུ་བཞི་སྤྱད་དེ་ཨ་མེ་རི་ཁའི་ཧཱ་ལིས.ཏུའུ་ལུའུ་མིན་རྟགས་ཅན་གྱི་གནམ་གྲུ་འབབ་སའི་གྲུ་གཟིངས་ལ་དམག་དོན་འགུལ་སྐྱོད་སྤེལ་བ་དང་། སྐབས་དེར་ཨ་མེ་རི་ཁའི་དམག་དཔུང་གིས་ཡེ་མིན་ལ་གཞི་ཁྱོན་ཆེ་བའི་བར་སྣང་འཇབ་རྒོལ་བྱེད་རྩིས་ཡོད་ལ། ཐེངས་འདིའི་དམག་དོན་འགུལ་སྐྱོད་ཀྱིས་ཨ་མེ་རི་ཁའི་དམག་དཔུང་གི་བར་སྣང་འཇབ་རྒོལ་ལ་ཕམ་ཉེས་བྱུང་དུ་བཅུག

གསལ་བསྒྲགས་ནང་བཤད་རྒྱུར། རྩ་འཛུགས་དེས་ད་དུང་ཚེས་དྲུག་ཉིན་གྱི་ཕྱི་དྲོ་དང་དགོང་མོར་དེ་ལས་གཞན་པའི་དམག་དོན་འགུལ་སྐྱོད་ཐེངས་གསུམ་སྤེལ་བ་དང་། དེའི་ཁྲོད་འགུལ་སྐྱོད་ཐེངས་གཉིས་ནི་དབྱི་སི་རལ་གྱི་ཐི་ལཱ་ཝེ་སིའི་དམག་དོན་དམིགས་འབེན་གཉིས་ལ་ཁ་གཏད་དེ་སྤེལ་བ་དང་། ཐེངས་གཞན་པ་དེ་ནི་མི་མེད་གནམ་གྲུ་བཀོལ་ནས་དབྱི་སི་རལ་གྱི་ཨ་ཧྲི་ཁའེ་ལུང་གྲོང་ཁྱེར་གྱི་དམིགས་འབེན་གལ་ཆེན་ཞིག་ལ་འཇབ་རྒོལ་བྱས་ཟེར།

ཨ་མེ་རི་ཁ་དང་དབྱི་སི་རལ་གྱི་རྒྱལ་སྲུང་དམག་གིས་གནས་སྐབས་སུ་དོན་དག་དེར་གདེང་འཇོག་མ་བྱས།

རྒྱུས་ལོན་བྱུང་བ་ལྟར་ན། མཉམ་འབྲེལ་རྒྱལ་ཚོགས་ཡེ་མིན་གནད་དོན་གྱི་ཆེད་མངགས་ཕོ་ཉ་ཀི་ལུང་ཏི་པེ་ལིས་ཚེས་དྲུག་ཉིན་མེ་མིན་གྱི་རྒྱལ་ས་སཱ་ནར་འབྱོར་བ་དང་། དེ་ནི་ལོ་གཉིས་ནང་ཐེངས་དང་པོར་ཡེ་མིན་ལ་འཚམས་འདྲི་བྱས་པ་ཡིན་ཟེར།

2024ལོའི་ཟླ12པའི་ཚེས30ཉིན་གྱི་དགོང་མོ་ནས་ཕྱི་ཉིན་གྱི་ཞོགས་པའི་བར་དུ། ཡེ་མིན་ཧུའུ་སའེ་དྲག་ཆས་ཀྱིས་དབྱི་སི་རལ་ཐི་ལཱ་ཝེ་ཧྥུའུ་པིན་ཀུའུ་ལི་ཨན་རྒྱལ་སྤྱིའི་གནམ་གྲུ་ཐང་དང་ཡེ་ལུའུ་ས་ལིན་གྱི་དབྱི་སི་རལ་གྱིས་བཀག་སྡོམ་བྱས་པའི་གློག་འདོན་ས་ཚིགས་ཞིག་ལ་འཕུར་མདེལ་གྱིས་འཇབ་རྒོལ་བྱས་པར་མ་ཟད། ཧུང་ཧའེ་རུ་ཡོད་པའི་ཨ་མེ་རི་ཁའི་ཧཱ་ལིས.ཏུའུ་ལུའུ་མིན་རྟགས་ཅན་གྱི་གནམ་གྲུ་འབབ་སའི་གྲུ་གཟིངས་ལ་འཕུར་མདེལ་དང་མི་མེད་གནམ་གྲུས་འཇབ་རྒོལ་བྱས།