ཕུའུ་ཅིན་གྱིས་སྐྱོ་གར་རང་བཞིན་གྱི་དོན་རྐྱེན་བྱུང་བའི་ཐད་ནས་ཨ་སེ་པེད་ཅང་ལ་དགོངས་དག་ཞུས།

ཕུའུ་ཅིན་གྱིས་སྐྱོ་གར་རང་བཞིན་གྱི་དོན་རྐྱེན་བྱུང་བའི་ཐད་ནས་ཨ་སེ་པེད་ཅང་ལ་དགོངས་དག་ཞུས།

ཨུ་རུ་སིའི་ཁི་ལི་མུའུ་ལིན་ཕོ་བྲང་གི་དྲ་ཚིགས་ཀྱིས་ཚེས28ཉིན་སྤེལ་བའི་གནས་ཚུལ་ལྟར་ན། ཨུ་རུ་སིའི་ཕྱོགས་ཀྱིས་གྲོས་འདོན་བྱས་པ་ལྟར། ཨུ་རུ་སིའི་ཙུང་ཐུང་ཕུའུ་ཅིན་གྱིས་ཉིན་དེར་ཨ་སེ་པེད་ཅང་གི་ཙུང་ཐུང་ཨ་ལེ་ཡེ་ཧྥུའུ་ལ་ཁ་པར་བཏང་། ཕུའུ་ཅིན་གྱིས་ཨ་སེ་པེད་ཅང་གི་མཁའ་འགྲུལ་ཀུང་ཟིའི་འགྲུལ་སྐྱེལ་གནམ་གྲུ་ཨུ་རུ་སིའི་མཁའ་ཁོངས་ནས་སྐྱོ་གར་རང་བཞིན་གྱི་དོན་རྐྱེན་བྱུང་བར་དགོངས་དག་ཞུས་པ་དང་། ཡང་བསྐྱར་འདས་པོའི་ཁྱིམ་མི་དག་ལ་སྙིང་ཐག་པ་ནས་འཚམས་འདྲི་བྱས།

ཨ་སེ་པེད་ཅང་གི་མཁའ་འགྲུལ་ཀུང་ཟི་ཡིས་ཚེས27ཉིན་ཁྱབ་བསྒྲགས་བྱས་དོན། ཕྱི་ཕྱོགས་ཀྱི་དངོས་ལུགས་དང་ལག་རྩལ་གྱི་བར་ཆད་ནི་འགྲུལ་སྐྱེལ་གནམ་གྲུར་ཆག་སྒོ་བྱུང་བའི་རྒྱུ་རྐྱེན་རེད་ཟེར།

ཨ་སེ་པེད་ཅང་གི་ཙུང་ཐུང་གསར་འགྱུར་ཅུའུ་ཡིས་ཚེས28ཉིན་བསྒྲགས་པ་ལྟར་ན། ཕུའུ་ཅིན་གྱིས་ཉིན་དེར་ཨ་ལེ་ཡེ་ཧྥུའུ་ལ་ཁ་པར་གཏོང་སྐབས། ཨ་སེ་པེད་ཅང་གི་མཁའ་འགྲུལ་ཀུང་ཟིའི་སར་ལྷུང་བའི་འགྲུལ་སྐྱེལ་གནམ་གྲུར་ཨུ་རུ་སིའི་མཁའ་ཁོངས་ནས་དངོས་ལུགས་དང་ལག་རྩལ་གྱི་བར་ཆད་ཐེབས་པའི་ཐད་ནས་དགོངས་དག་ཞུས་ཟེར།

ཁི་ལི་མུའུ་ལིན་ཕོ་བྲང་གིས་ཚེས28ཉིན་རྒྱལ་ཁབ་གཉིས་ཀྱི་མགོ་ཁྲིད་པའི་ཁ་པར་གྲོས་མོལ་གྱི་ནང་དོན་ཁྱབ་བསྒྲགས་བྱས། ཨ་སེ་པེད་ཅང་གི་འགྲུལ་སྐྱེལ་གནམ་གྲུ་དེ་ཡང་དག་པའི་དུས་ཚོད་རེའུ་མིག་ལྟར་འཕུར་སྐྱོད་བྱེད་བཞིན་ཡོད་པ་དང་། དེའི་སྐབས་སུ་ཀི་ལོ་ཙི་ནེ་གནམ་གྲུ་ཐང་དུ་འབབ་པར་ཚོད་ལྟ་བྱེད་རྩིས་བྱས། སྐབས་དེར་ཀི་ལོ་ཙི་ནེ་སོགས་ས་ཁུལ་དུ་ཝུའུ་ཁི་ལན་གྱི་མི་མེད་གནམ་གྲུའི་འཇབ་རྒོལ་ཐེབས་ནས་ཨུ་རུ་སིའི་མཁའ་སྲུང་མ་ལག་གིས་ཕྱིར་རྒོལ་ལན་སྤྲོད་བྱེད་བཞིན་པ་རེད།

ཨུ་རུ་སིའི་མཁའ་འགྲུལ་ཁང་གིས་དེའི་སྔོན་བསྒྲགས་པ་ལྟར་ན། སར་ལྷུང་བའི་འགྲུལ་སྐྱེལ་གནམ་གྲུ་དེ་ཀི་ལོ་ཙི་ནེ་གནམ་གྲུ་ཐང་དུ་འབབ་མ་ཐུབ་པར། དེའི་རྗེས་སུ་ཧཱ་སག་སི་ཐན་གྱི་ཨ་ཁི་ཐའོ་གནམ་གྲུ་ཐང་དུ་འཕུར་རྩིས་བྱས་པ་ཡིན་ལ། འགྲུལ་སྐྱེལ་གནམ་གྲུ་དེ་མཇུག་མཐར་ཨི་ཁི་ཐའོ་ཉེ་འདབས་སུ་སར་ལྷུང་བ་རེད་ཟེར།

ཨུ་རུ་སིའི་མྱུལ་ཞིབ་ཨུ་ཡོན་ལྷན་ཁང་གིས་མཁའ་འགྲུལ་གྱི་བདེ་འཇགས་གཏན་འཁེལ་དང་འགལ་བར་དོགས་ནས་རྟོག་ཞིབ་བྱེད་མགོ་བརྩམས་པ་དང་། འབྲེལ་ཡོད་མི་སྣས་འདྲི་གཅོད་དང་ལེན་བྱེད་བཞིན་ཡོད།