མཚོ་སྔོན་ཞིང་ཆེན་གྱི་སངས་རྒྱས་ཆོས་ལུགས་དང་དབྱི་སི་ལན་ཆོས་ལུགས། ཏའོ་ཅའོ་ཆོས་ལུགས། ཡེ་ཤུའི་ཆོས་ལུགས་བཅས་ཀྱི་འཐུས་མིའི་ཚོགས་ཆེན་བསྡུས།

ཟླ12པའི་ཚེས29ཉིན་ནས་ཚེས30ཉིན་བར། མཚོ་སྔོན་ཞིང་ཆེན་གྱི་སངས་རྒྱས་ཆོས་ལུགས་དང་དབྱི་སི་ལན་ཆོས་ལུགས། ཏའོ་ཅའོ་ཆོས་ལུགས། ཡེ་ཤུའི་ཆོས་ལུགས་བཅས་ཀྱི་འཐུས་མིའི་ཚོགས་ཆེན་ཟི་ལིང་ནས་བསྡུས། ཞིང་ཆེན་གྱི་མགོ་ཁྲིད་པ་པད་ཁོ་དང་དབྱང་ཀྲི་ཝུན། རིན་ཆེན་རྣམ་རྒྱལ། གསེར་ཁྲི་ཆོས་ཀྱི་བློ་གྲོས་རྒྱ་མཚོ། མཱ་ཡའོ་ཞང་བཅས་ཚོགས་ཆེན་ལ་ཞུགས།

གྲོས་ཚོགས་སྐབས་སུ། ཆོས་ལུགས་ཕྱོགས་ཁག་སོ་སོས་འདས་པའི་ལོ་ལྔའི་བྱ་བའི་གྲུབ་འབྲས་ལ་ཕྱིར་དྲན་དང་སྤྱི་བསྡོམས་བྱས་པ་དང་། སྐབས་སྔོན་མའི་ལས་འཛིན་ལྷན་ཚོགས་ཀྱི་བྱ་བའི་སྙན་ཞུར་གྲོས་ཞིབ་བྱས་ནས་གྲོས་འཆམ་བྱུང་བ་དང་སྒྲིག་ཡིག་བཟོ་བཅོས་འཆར་ཟིན་ལ་གྲོས་ཞིབ་བྱས་ཏེ་གྲོས་འཆམ་བྱུང་། སྐབས་གསར་བའི་མགོ་ཁྲིད་ཚན་ཁག་བདམས་ཐོན་བྱུང་བ་དང་། ཕྱིན་ཆད་ཀྱི་ལོ་ལྔའི་བྱ་བའི་ལས་འགན་གཙོ་བོ་བཀོད་སྒྲིག་བྱས་པར་མ་ཟད། འཐུས་མི་ཚང་མས་མཉམ་འབྲེལ་གྱིས་གྲོས་འདོན་ཡི་གེ་སྤེལ།

བླ་ཁོ་བློ་བཟང་བསྟན་པའི་དབང་ཕྱུག་ཞིང་ཆེན་སངས་རྒྱས་ཆོས་ལུགས་མཐུན་ཚོགས་ཀྱི་ཚོགས་གཙོར་བདམས་པ་དང་། མཱ་ཁྲིན་ཀོས་ཞིང་ཆེན་དབྱི་སི་ལན་ཆོས་ལུགས་མཐུན་ཚོགས་ཀྱི་ཚོགས་གཙོར་བདམས། ཝེ་ཐིན་ལིང་ཞིང་ཆེན་ཏའོ་ལུགས་མཐུན་ཚོགས་ཀྱི་ཚོགས་གཙོར་བདམས་པ་དང་། ཀུང་ཕེན་ཨན་ཞིང་ཆེན་ཡེ་ཤུའི་ཆོས་ལུགས་ཚོགས་ཆེན་གཉིས་ཀྱི་ཀྲུའུ་ཞིའམ་ཚོགས་གཙོར་བདམས།

གྲོས་ཚོགས་ནས་ཉེ་བའི་ལོ་འགའི་རིང་ལ། རང་ཞིང་གི་ཆོས་ལུགས་ཚོགས་ཁག་སོ་སོའི་བྱ་བའི་ཐད་ནས་བླངས་པའི་གྲུབ་འབྲས་ལ་ཁས་ལེན་གང་ལེགས་བྱས། ཚོགས་ཆེན་ནས་ནན་གྱིས་བསྟན་དོན། ཕྱོགས་ཡོངས་ནས་ཆ་ཚང་ཞིང་ཡང་དག་པའི་སྒོ་ནས་དུས་རབས་གསར་བའི་ཏང་གི་ཆོས་ལུགས་བྱ་བའི་གཞུང་ལུགས་དང་བྱེད་ཕྱོགས་སྲིད་ཇུས་ལ་སློབ་སྦྱོང་དང་ལག་ལེན་མཐར་ཕྱིན་བྱས་ཏེ། བསམ་བློ་དང་བྱ་སྤྱོད་དེ་ཀྲུང་དབྱང་དང་ཞིང་ཆེན་ཏང་ཨུའི་ཐབས་ཇུས་བཀོད་སྒྲིག་སྟེང་གཅིག་གྱུར་བྱེད་པ་དང་། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སྲ་བརྟན་དུ་གཏོང་བར་དངོས་འབེབས་བྱེད་པ། རང་རྒྱལ་གྱི་ཆོས་ལུགས་ཀྲུང་གོ་ཅན་གྱི་ཁ་ཕྱོགས་ལ་སྐུལ་འདེད་གཏོང་བའི་བྱ་བའི་ལག་ལེན་ཁྲོད་དངོས་འབེབས་བྱེད་དགོས། ཡང་དག་པའི་ཁ་ཕྱོགས་དམ་འཛིན་སྒོས་བསམ་བློའི་ཆབ་སྲིད་འཛུགས་སྐྲུན་ལ་བསྟུད་མར་ཤུགས་སྣོན་པ་དང་། ཀྲུང་ཧྭ་ཕུལ་བྱུང་སྲོལ་རྒྱུན་རིག་གནས་ཀྱིས་བརླན་པར་བྱས་ནས་ཆོས་ལུགས་ཀྱི་སྐྱོན་བྲལ་རྒྱུན་འཛིན་ལ་སྐུལ་འདེད་གཏོང་དགོས། རང་སྟེང་གི་འཛུགས་སྐྲུན་ལ་ཤུགས་སྣོན་པ་དང་ཕྱོགས་ཡོངས་ནས་ཆོས་ལུགས་བཅོས་སྐྱོང་ནན་མོ་བྱས་ཏེ། གྲོན་ཆུང་དར་སྤེལ་དང་རྒྱས་སྤྲས་འགོག་པའི་སློབ་གསོའི་བྱ་འགུལ་གཏིང་ཟབ་ཏུ་སྤེལ་བ་དང་། ཆོས་ལུགས་ཀྱི་སྙིང་བོ་བྱང་ཆུབ་པ་དང་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་བྱང་ཆུབ་པའི་རིམ་པ་མཐོ་བའི་འཇོན་མི་གསོ་སྐྱོང་བྱེད་དགོས། ཁྲིམས་ལྟར་ཆོས་ལུགས་སྤེལ་བ་དང་ཆེ་ཕྱོགས་ལ་ཞབས་འདེགས་ཞུ་བའི་ནུས་པ་འདོན་སྤེལ་བྱས་ཏེ། རང་ཞིང་གི་ཆོས་ལུགས་ལས་རིགས་ཀྱི་མི་སྣ་དང་ཆོས་ལུགས་དད་མོས་བྱེད་པའི་མང་ཚོགས་ལ་མཐུན་སྒྲིལ་དང་སྣེ་ཁྲིད་བྱས་ནས། ཀྲུང་གོའི་ལུགས་ཀྱི་དེང་རབས་ཅན་མཚོ་སྔོན་གྱི་ལག་ལེན་ལ་སྐུལ་འདེད་གཏོང་བའི་ཐད་འབད་པས་སྐུལ་འདེད་གཏོང་བར་སྟོབས་ཤུགས་འབུལ་དགོས་ཟེར།