ཨེ་ཅིབ་དང་ཅོར་ཏན་གྱི་འགོ་ཁྲིད་མི་སྣས་མྱུར་དུ་ཅཱ་ཧྲའི་དམག་འཁྲུག་མཚམས་འཇོག་རྒྱུའི་འབོད་སྐུལ་བཏང་།
ཨེ་ཅིབ་ཀྱི་ཙུང་ཐུང་སའེ་ཞི་དང་ཅོར་ཏན་གྱི་རྒྱལ་བོ་ཨ་པུའུ་ཏུའུ་ལཱ་སྐུ་ཕྲེང་གཉིས་པ་གཉིས་ཀྱིས་ཚེས16ཉིན་ཁེ་རོ་ནས་གྲོས་མོལ་བྱས་ཏེ། ཕྱོགས་གཉིས་ཀྱིས་ཅཱ་ཧྲ་ས་ཆའི་དམག་འཁྲུག་མྱུར་དུ་མཚམས་འཇོག་དགོས་པའི་འབོད་སྐུལ་བཏང་།
ཨེ་ཅིབ་ཀྱི་ཙུང་ཐུང་བཞུགས་ཤག་གིས་ཉིན་དེར་སྤེལ་བའི་གསལ་བསྒྲགས་ཤིག་གི་ནང་བཤད་རྒྱུར། འགོ་ཁྲིད་མི་སྣ་གཉིས་ཀྱིས་ཅཱ་ཧྲ་ས་ཆའི་དམག་འཁྲུག་མྱུར་དུ་མཚམས་འཇོག་དགོས་པ་མ་ཟད། ཆ་རྐྱེན་མེད་པར་ཅཱ་ཧྲ་ས་ཆར་མྱུར་བར་མཁོ་བའི་མི་ཆོས་རིང་ལུགས་ཀྱི་རོགས་སྐྱོབ་དང་རོགས་སྐྱོར་འདོན་སྤྲོད་བྱེད་དགོས་པ་ནན་གྱིས་བསྟན། ཕྱོགས་གཉིས་ཀྱིས་ཕ་ལེ་སི་ཐན་གྱི་ལས་དོན་ལ་གཏོར་བརླག་བྱེད་པ་དང་། བཙན་གྱིས་ཕ་ལེ་སི་ཐན་གྱི་མི་གནས་མེད་ཡུལ་གྱུར་པར་འགྱུར་དུ་འཇུག་པ། རྒྱལ་ཁབ་གཉིས་ཀྱི་ཇུས་གཞིར་གཏོར་བརླག་བྱེད་པའི་རེ་ངན་གང་རུང་ལ་མཐའ་གཅིག་ཏུ་ངོ་རྒོལ་བྱེད་རྒྱུ་ཡིན་པ་བསྐྱར་བསྒྲགས་བྱས།
གསལ་བསྒྲགས་ནང་ད་དུང་བཤད་རྒྱུར། འགོ་ཁྲིད་མི་སྣ་གཉིས་ཀྱིས་སི་རི་ཡའི་བྱ་བའི་གནས་བབ་ཀྱི་འཕེལ་རྒྱས་ཐད་ནས་གྲོས་སྡུར་བྱས་པ་དང་། ཨེ་ཅིབ་དང་ཅོར་ཏན་གཉིས་ཀ་སི་རི་ཡའི་གནད་དོན་གྱི་ཨ་རབ་པུའུ་ཀྲང་རིམ་པའི་འབྲེལ་འདྲིས་ཨུ་ཡོན་ལྷན་ཁང་གི་ཁོངས་གཏོགས་རྒྱལ་ཁབ་ཡིན་པའི་ཆ་ནས། མཐའ་གཅིག་ཏུ་སི་རི་ཡར་རྒྱབ་སྐྱོར་བྱེད་པ་དང་སི་རི་ཡའི་གཅིག་གྱུར་དང་མངའ་ཁོངས་ཆ་ཚང་། སི་རི་ཡའི་མི་དམངས་ཀྱི་བདེ་འཇགས་ལ་སྲུང་སྐྱོབ་བྱེད་པའི་གལ་ཆེན་རང་བཞིན་བསྐྱར་བསྒྲགས་བྱེད་ཀྱིན་ཡོད། ཕྱོགས་གཉིས་ཀྱིས་ད་དུང་ཕྱོགས་སོ་སོ་ཤོང་བའི་ཆབ་སྲིད་བརྒྱུད་རིམ་འགོ་རྩོམ་པའི་གལ་ཆེན་རང་བཞིན་བསྐྱར་བསྒྲགས་བྱས།
འགོ་ཁྲིད་མི་སྣ་གཉིས་ཀྱིས་ད་དུང་ལེ་པ་ནོན་གྱི་གནས་བབ་ལ་གྲོས་སྡུར་བྱས་པ་དང་། མཉམ་འབྲེལ་རྒྱལ་ཚོགས་བདེ་འཇགས་ལས་འཛིན་ལྷན་ཚོགས་ཀྱི་གྲོས་ཆོད1701པ་ལག་བསྟར་བྱེད་པའི་དགོས་ངེས་རང་བཞིན་ནན་བཤད་བྱས་པ་མ་ཟད། རྒྱལ་ཁབ་གཉིས་ཀྱིས་ལེ་པ་ནོན་གྱི་བདེ་འཇགས་དང་བདག་དབང་། གཏན་འཇགས་ལ་སྲུང་སྐྱོང་བྱེད་པའི་དམ་བཅས་བསྒྱར་བསྒྲགས་བྱས།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注