ཀྲུང་གོའི་འཐུས་མིས་ཅ་ཧྲ་ས་ཁུལ་དུ་ཆ་རྐྱེན་མེད་པའི་སྒོ་ནས་དམག་འཁྲུག་མྱུར་དུ་མཚམས་འཇོག་པ་མངོན་འགྱུར་བྱེད་པར་ངེས་པར་དུ་སྐུལ་འདེད་གཏོང་དགོས་ཟེར།

ཚེས11ཉིན། ཀྲུང་གོའི་མཉམ་འབྲེལ་རྒྱལ་ཚོགས་ཀྱི་རྒྱུན་སྡོད་འཐུས་མི་ཧྥུའུ་ཚུང་གིས་ཕ་ལེ་སི་ཐན་གནད་དོན་དང་འབྲེལ་བའི་བྲེལ་མྱུར་དམིགས་བསལ་གྱི་མཉམ་འབྲེལ་ཚོགས་ཐོག་ཏུ། ཨ་མེ་རི་ཁས་ཡང་དང་བསྐྱར་དུ་ཁས་ལེན་མི་བྱེད་པའི་དབང་ཆ་བཀོལ་བ་ལས། བདེ་འཇགས་ལས་འཛིན་ལྷན་ཚོགས་ནུས་མེད་དུ་བཏང་ཞིང་། ཅ་ཧྲའི་དམག་འཁྲུག་མཚམས་འཇོག་པར་སྐུལ་འདེད་གཏོང་བའི་དགོས་ངེས་ཀྱི་འགུལ་སྐྱོད་སྤེལ་མི་ཐུབ་གྱུར་ཅེས་བསྟན་པ་དང་། ཁོས་ཅ་ཧྲའི་དམག་འཁྲུག་ཆ་རྐྱེན་མེད་པའི་སྒོ་ནས་མྱུར་དུ་མཚམས་འཇོག་པ་མངོན་འགྱུར་བྱ་ཆེད་ངེས་པར་དུ་སྐུལ་འདེད་གཏོང་དགོས་པའི་འབོད་སྐུལ་བཏང་།

ཉིན་དེའི་མཉམ་འབྲེལ་ཚོགས་ཐོག་ཏུ་འདེམ་ཤོག་མང་པོ་ཐོབ་ནས་གྲོས་ཆོད་ཅིག་ལ་གྲོས་འཆམ་བྱུང་བ་སྟེ། ཅ་ཧྲ་ས་ཁུལ་དུ་ཆ་རྐྱེན་མེད་ཅིང་། མྱུར་མོ་ཡིན་པ། དུས་གཏན་བཅས་ཀྱི་སྒོ་ནས་དམག་འཁྲུག་མཚམས་འཇོག་པ་མངོན་འགྱུར་བྱེད་པའི་བླང་བྱ་བཏོན་ཡོད། གྲོས་ཆོད་དེར་ཡིད་འཐད་འདེམ་ཤོག་བརྒྱ་དང་ང་བརྒྱད་དང་། ངོ་རྒོལ་འདེམ་ཤོག་དགུ། འདེམ་ཤོག་བཅུ་གསུམ་གྱིས་འདེམ་དབང་བསྐྱུར་བའི་བརྡས་གཅོད་མཇུག་འབྲས་ཀྱིས་གྲོས་འཆམ་བྱུང་བ་རེད། ཨ་མེ་རི་ཁ་དང་དབྱི་སི་རལ་གྱིས་ངོ་རྒོལ་འདེམ་ཤོག་འཕངས་ཡོད། གྲོས་ཆོད་དེ་ལས་བཀག་འཇུག་བྱས་པའི་མི་སྣ་ཚང་མ་མྱུར་དུ་ཕྱིར་གཏོང་དགོས་པའི་སྐུལ་མ་བཏང་ཡོད།

ཧྥུའུ་ཚུང་གིས་བརྡས་གཅོད་སྔོན་དུ་གཏམ་བཤད་སྤེལ་དེ། ཉིན་དེར་བྲེལ་མྱུར་དམིགས་བསལ་གྱི་མཉམ་འབྲེལ་ཚོགས་ཆེན་སྤེལ་དོན་ནི། ཨ་མེ་རི་ཁས་ཡང་དང་བསྐྱར་དུ་སྒེར་གཅོད་ཀྱི་ཡིད་འཐད་མིན་པའི་འདེམ་ཤོག་འཕངས་པ་ལས་བདེ་འཇགས་ལས་འཛིན་ལྷན་ཚོགས་ནུས་མེད་དུ་བཏང་ཞིང་། ཅ་ཧྲའི་དམག་འཁྲུག་མཚམས་འཇོག་པར་སྐུལ་འདེད་གཏོང་བའི་དགོས་ངེས་ཀྱི་འགུལ་སྐྱོད་སྤེལ་ཐབས་མེད་པར་གྱུར་བས་ཡིན་ལ། ཨ་མེ་རི་ཁས་ཕ་ལེ་སི་ཐན་གནད་དོན་སྟེང་ཡིད་འཐད་མིན་པའི་དབང་ཆ་གང་འདོད་སྤྱད་པར་རྒྱུ་མཚན་གསལ་བོ་ཞིག་འདྲེན་རྒྱུ་མེད་པར་འདོད།

ཧྥུའུ་ཚུང་གིས་བཤད་རྒྱུར། ཅ་ཧྲའི་འགལ་བ་ཟླ་ངོ་བཅུ་བཞིའི་རིང་རྒྱུན་སྲིང་བྱས་ཤིང་། ཅ་ཧྲ་འགས་གཏོར་ལས་ཞིག་རལ་དུ་གྱུར་ཡོད་ལ། ཕ་ལེ་སི་ཐན་གྱི་མང་ཚོགས་ཁྲི་བཞི་ལྷག་གི་ཚེ་སྲོག་ཤོར་བར་མ་ཟད། ཤུལ་དུ་ལུས་པའི་མི་དག་གི་ཆེས་གཞི་རྩའི་འཚོ་གནས་ཀྱི་དངོས་ཟོང་ཡང་བཙན་འཕྲོག་བྱས་ནས་ཡི་ཆད་ཁྲོད་འཕག་འཚག་བྱེད་བཞིན་འདུག  ཁོས་ཅ་ཧྲའི་དམག་འཁྲུག་མཚམས་འཇོག་པ་ཆ་རྐྱེན་མེད་པའི་སྒོ་ནས་མྱུར་དུ་མངོན་འགྱུར་བྱེད་པར་ངེས་པར་དུ་སྐུལ་འདེད་གཏོང་དགོས་ཏེ། དམག་འཁྲུག་མཚམས་འཇོག་པ་ནི་ཚེ་སྲོག་སྐྱོབ་པ་དང་། ཞི་བདེ་སླར་གསོ་བྱེད་པའི་སྔོན་འགྲོ་ཡིན་ཞིང་། དམག་འཁྲུག་མཚམས་འཇོག་པའི་གནད་དོན་དེ་གནད་དོན་གཞན་པ་དང་ཁག་དཀྲི་ས་བྱས་ན། དོན་དངོས་སྟེང་དམག་འཁྲུག་རྒྱུན་སྲིང་བྱ་བར་རྒྱུ་ལམ་ཞིག་དོད་པ་དང་མཚུངས་ལ། མུ་མཐུད་དུ་དམར་གསོད་བྱེད་པར་ཀུ་ཡངས་བྱས་པ་དང་ཁྱད་པར་མེད་ཅེས་ནན་བཤད་བྱས།

ཧྥུའུ་ཚུང་གིས་བཤད་རྒྱུར། ཀྲུང་གོ་ཕྱོགས་ཀྱིས་ཕ་ལེ་སི་ཐན་རྒྱལ་ཁབ་དེ་མཉམ་འབྲེལ་རྒྱལ་ཚོགས་ཀྱི་ཁོངས་གཏོགས་རྒྱལ་ཁབ་ངོ་མར་འགྱུར་བར་རྒྱབ་སྐྱོར་བྱེད་ལ། གཞི་རྒྱ་སྔར་ལས་ཆེ་ཞིང་། སྔར་ལས་ཟིལ་ཤུགས་ལྡན་པ་དང་། སྔར་ལས་ཕན་ནུས་ཡོད་པའི་རྒྱལ་སྤྱིའི་ཞི་བའི་གྲོས་ཚོགས་བསྡུས་ནས། རྒྱལ་ཁབ་གཉིས་ཀྱི་ཇུས་གཞི་ཡི་དུས་ཚོད་རེའུ་མིག་དང་ལམ་ཐིག་འཆར་གཞི་གཏན་ཁེལ་དང་དངོས་འབེབས་བྱེད་པར་རྒྱབ་སྐྱོར་བྱེད་ངེས་ཡིན། ཀྲུང་གོ་ཕྱོགས་ཀྱིས་མུ་མཐུད་དུ་དམག་འཁྲུག་སྔ་མོ་ནས་མཚམས་འཇོག་པ་དང་། ས་ཁུལ་གྱི་ཞི་བདེ་སླར་གསོ་བྱེད་པ། ཕ་ལེ་སི་ཐན་གནད་དོན་ཕྱོགས་ཡོངས་དང་དྲང་གཞག དུས་གཏན་དུ་ཐག་གཅོད་ཐུབ་པ་མངོན་འགྱུར་བྱ་ཆེད་འབད་བརྩོན་ལྷོད་མེད་བྱེད་རྒྱུ་ཡིན་ཟེར།