རྒྱལ་སྤྱིའི་རྡུལ་ཕྲན་ནུས་པའི་ལས་ཁུངས་ཀྱི་སྤྱི་ཁྱབ་ལས་འཛིན་པས་ཝུའུ་ཁི་ལན་གྱི་ཉིང་རྡུལ་ནུས་པའི་སྒྲིག་ཆས་ལ་དམག་དོན་ཚོད་འཛིན་གང་ལེགས་བྱེད་དགོས་པའི་འབོད་སྐུལ་བཏང་།
རྒྱལ་སྤྱིའི་རྡུལ་ཕྲན་ནུས་པའི་ལས་ཁུངས་ཀྱི་སྤྱི་ཁྱབ་ལས་འཛིན་པ་ཀི་ལོ་ཞི་ཡིས་ཚེས་ཉེར་བརྒྱད་ཉིན་ལས་ཁུངས་དེའི་གཞུང་ཕྱོགས་དྲ་ཚིགས་སྟེང་གཏམ་བཤད་སྤེལ་ནས། ཝུའུ་ཁི་ལན་གྱི་ཉིང་རྡུལ་ནུས་པའི་སྒྲིག་ཆས་ལ་དམག་དོན་ཚོད་འཛིན་གང་ལེགས་བྱེད་དགོས་པའི་འབོད་སྐུལ་བཏང་།
ཀི་ལོ་ཞི་ཡིས་བཤད་རྒྱུར། ཚེས28ཉིན། ཝུའུ་ཁི་ལན་གྱིས་བཀོལ་སྤྱོད་བྱེད་བཞིན་པའི་ཧི་མཱེ་ལེ་ནེ་ཚི་ཅི་ཉིང་རྡུལ་གློག་འདོན་ས་ཚིགས་དང་ལོ་ཧྥུའུ་ནོའུ་ཉིང་རྡུལ་གློག་འདོན་ས་ཚིགས། ལྷོ་ཕྱོགས་ཀྱི་ཝུའུ་ཁི་ལན་ཉིང་རྡུལ་གློག་འདོན་ས་ཚིགས་བཅས་ལ་བར་སྣང་འཇབ་རྒོལ་གྱི་ཤུགས་རྐྱེན་ཐེབས་ནས་གློག་འདོན་ཇེ་ཉུང་དུ་གཏོང་བའི་ཉེན་ཡོལ་བྱེད་ཐབས་སྤྱད་ཡོད། དེ་ནི་འདས་པའི་གཟའ་འཁོར་གཉིས་ནང་ཉིང་རྡུལ་གློག་འདོན་ས་ཚིགས་དེ་གསུམ་ལ་ཐེངས་གཉིས་པར་ཉེན་ཡོལ་བྱེད་ཐབས་སྤྱད་པ་རེད། གོང་སྨྲས་ཀྱི་ཉིང་རྡུལ་གློག་འདོན་ས་ཚིགས་དེ་གསུམ་ལ་ཐད་ཀར་ཆམ་ཕབ་ཐེབས་མེད་ཀྱང་། ལོ་ཧྥུའུ་ནོའུ་ཉིང་རྡུལ་གློག་འདོན་ས་ཚིགས་ཀྱི་གློག་དྲའི་འབྲེལ་ཐག་ཆད་པ་དང་། ཧི་མཱེ་ལེ་ནེ་ཚི་ཅི་ཉིང་རྡུལ་གློག་འདོན་ས་ཚིགས་ཀྱི་ཕྱི་ཕྱོགས་གློག་འདོན་གློག་སྐུད་གཉིས་བཅད་ཡོད་ཟེར།
ཀི་ལོ་ཞི་ཡིས་བཤད་རྒྱུར། ད་ལོའི་ཟླ8པར། ཝུའུ་ཁི་ལན་གྱི་ཉིང་རྡུལ་སྒྲིག་ཆས་ལ་འཇབ་རྒོལ་ཐེབས་ནས་གཏོར་བརླག་ཐེབས། རྒྱལ་སྤྱིའི་རྡུལ་ཕྲན་ནུས་པའི་ལས་ཁུངས་ཀྱིས་དེའི་རྗེས་སུ་མི་སྣ་མངག་ནས་ཉིང་རྡུལ་གློག་འདོན་ས་ཚིགས་བདུན་ལ་རྟོག་ཞིབ་བྱས་པས། འབྲེལ་ཡོད་སྒྲིག་ཆས་ལ་གཏོར་བརླག་ཆེན་པོ་ཐེབས་པ་དང་། ཝུའུ་ཁི་ལན་གྱི་གློག་དྲ་ཡིས་ཉིང་རྡུལ་གློག་འདོན་ས་ཚིགས་ལ་གཏན་འཇགས་ཀྱི་ཕྱི་གློག་འདོན་སྤྲོད་བྱེད་པའི་ནུས་པ་ཇེ་ཞན་དུ་བཏང་ཡོད་པ་ཤེས།
ཀི་ལོ་ཞི་ཡིས་ནན་གྱིས་བསྟན་དོན། ཝུའུ་ཁི་ལན་གྱི་ནུས་ཁུངས་རྨང་གཞིའི་སྒྲིག་ཆས་ཧ་ཅང་ཉམས་ཞན་ཡིན་པ་དང་། དེ་ལས་ཉིང་རྡུལ་ནུས་པའི་བདེ་འཇགས་ཐད་ཉེན་ཁ་ཆེན་པོ་བཟོས་ཡོད་ཟེར། ཁོས་འབྲེལ་ཡོད་ཕྱོགས་ཀྱིས་ཉིང་རྡུལ་ནུས་པའི་སྒྲིག་ཆས་ཡོད་སའི་ས་ཁོངས་ནས་ཚད་ཆེན་པོས་དམག་དོན་ཚོད་འཛིན་བྱས་ཏེ་ཉིང་རྡུལ་ནུས་པའི་དོན་རྐྱེན་གྱི་ཉེན་ཁ་ཇེ་ཆུང་དུ་གཏོང་དགོས་པའི་འབོད་སྐུལ་བཏང་།
ཀི་ལོ་ཞི་ཡིས་བསྟན་དོན། རྒྱལ་སྤྱིའི་རྡུལ་ཕྲན་ནུས་པའི་ལས་ཁུངས་ཀྱིས་མུ་མཐུད་དུ་ཝུའུ་ཁི་ལན་གྱི་ཉིང་རྡུལ་གློག་འདོན་ས་ཚིགས་ལ་གཏོར་བརླག་ཐེབས་པའི་གནས་ཚུལ་ལ་དཔྱད་ཞིབ་བྱེད་རྒྱུ་མ་ཟད། འགན་འཁྲིའི་ཁྱབ་ཁོངས་ནང་གང་ནུས་ཀྱིས་ཉིང་རྡུལ་ནུས་པའི་དོན་རྐྱེན་གྱི་ཉེན་ཁ་ཇེ་དམའ་རུ་གཏོང་རྒྱུ་ཡིན་ཟེར།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注