ཀྲུང་གོ་དང་འཇར་པན་གྱི་ཆབ་སྲིད་དང་དཔལ་འབྱོར་ལས་རིགས་ཀྱི་མི་སྣས་ལྗང་མདོག་ཚུལ་སྒྱུར་གྱི་མཉམ་ལས་ལ་སྐུལ་འདེད་གཏོང་བར་འབོད་སྐུལ་བཏང་།

ཚེས9ཉིན།   སྐབས་བཅུ་བདུན་པའི་ཀྲུང་གོ་དང་འཇར་པན་གྱི་ནུས་རྒྱུ་གྲོན་ཆུང་དང་ཁོར་ཡུག་སྲུང་སྐྱོབ་ཀྱི་ཕྱོགས་བསྡུས་གླེང་སྟེགས་འཇར་པན་གྱི་ཏུང་ཅིན་དུ་བསྡུས།  གླེང་སྟེགས་ལ་ཞུགས་མཁན་གྱི་རྒྱལ་ཁབ་གཉིས་ཀྱི་སྲིད་ཕྱོགས་ལས་རིགས་དང་དཔལ་འབྱོར་ལས་རིགས་ཀྱི་མི་སྣས་ལྗང་མདོག་འཕེལ་རྒྱས་ནི་ཀྲུང་གོ་དང་འཇར་པན་རྒྱལ་ཁབ་གཉིས་ལ་འཕྲད་པའི་ཐུན་མོང་གི་བརྗོད་གཞི་ཞིག་ཡིན། ཕྱོགས་གཉིས་ཀྱིས་ནུས་རྒྱུ་གྲོན་ཆུང་དང་ཁོར་ཡུག་སྲུང་སྐྱོབ།  ལྗང་མདོག་ཚུལ་སྒྱུར་ལ་སྐུལ་འདེད་གཏོང་བ་བཅས་ཀྱི་ཁྱབ་ཁོངས་ཀྱི་མཉམ་ལས་ལ་སྦས་ཤུགས་ཆེན་པོ་ལྡན་པས་ཕྱོགས་གཉིས་ཀྱིས་རང་ངོས་ཀྱི་དགེ་མཚན་སྔར་ལས་འདོན་སྤེལ་བྱས་ནས། མཉམ་ལས་ཀྱི་འཕར་གཞི་གསར་པ་སྔོག་འདོན་བྱེད་དགོས་པའི་ཐད་ངོས་འཛིན་གཅིག་མཐུན་བྱུང་།

ཀྲུང་གོ་དང་འཇར་པན་རྒྱལ་ཁབ་གཉིས་ཀྱི་སྲིད་གཞུང་སྡེ་ཁག་དང་ཁེ་ལས། སྒྲིག་གཞི། མཐུན་ཚོགས་བཅས་ནས་ཡོང་བའི་འཐུས་མི800ལྷག་ཙམ་ཉིན་དེའི་གླེང་སྟེགས་སུ་ཞུགས་ནས། ནུས་རྒྱུའི་ལས་ཕྱོད་དང་རླངས་འཁོར་གློག་སྒུལ་ཅན། རིག་ནུས་ཅན། ཆིང་ནུས་ཨན་ནུས།  ཀྲུང་གོ་དང་འཇར་པན་གྱི་ཡུན་རིང་ཚོང་དོན། འཛུགས་སྐྲུན་ལྗང་མདོག་ཅན་སོགས་བརྗོད་བྱ་གཙོ་བོའི་ཐད་ནས་བརྗེ་རེས་བྱས་པ་རེད།

ཀྲུང་གོའི་རྒྱལ་ཁབ་འཕེལ་རྒྱས་དང་བཅོས་སྒྱུར་ཨུ་ཡོན་ལྷན་ཁང་གི་ཀྲུའུ་རིན་གཞོན་པ་ཀྲའོ་ཁྲེན་ཞིན་གྱིས་གླེང་སྟེགས་སྟེང་ཤིས་ཚིག་འབུལ་སྐབས།  ཀྲུང་གོས་ལྗང་མདོག་ཐཱན་ཉུང་འཕེལ་རྒྱས་ཀྱི་རྒྱལ་སྤྱིའི་མཉམ་ལས་ལ་ཚད་མཐོའི་མཐོང་ཆེན་བྱེད་ཀྱི་ཡོད། ནུས་རྒྱུ་གྲོན་ཆུང་དང་ཁོར་ཡུག་སྲུང་སྐྱོབ་ནི་ཀྲུང་གོ་དང་འཇར་པན་གྱི་དཔལ་འབྱོར་ཉོ་ཚོང་མཉམ་ལས་ཀྱི་གཙོ་གནད་ཀྱི་གྲས་ཤིག་རེད། ཁྱབ་ཁོངས་དེའི་ནང་ཕྱོགས་གཉིས་ཀྱི་ཐོན་ལས་ཀྱི་ལེགས་ཆ་གསབ་རེས་དང་། ཁྲོམ་རའི་བར་སྟོང་རྒྱ་ཆེ་བ།   མཉམ་ལས་ཀྱི་རྨང་གཞི་ཧ་ཅང་བརྟན་པོ་ཡོད་པ་བཅས་རེད། ཀྲུང་གོ་ཕྱོགས་ཀྱིས་འཇར་པན་ཕྱོགས་དང་མཉམ་དུ་ཁོར་ཡུག་སྲུང་སྐྱོབ་ཐོན་ལས་དང་། ནུས་རྒྱུ་གྲོན་ཆུང་གི་སྒྲིག་ཆས། ཁོར་ཡུག རྨང་གཞིའི་སྒྲིག་ཆས་འཛུགས་སྐྲུན་སོགས་ཁྱབ་ཁོངས་ཀྱི་བརྗེ་རེས་དང་མཉམ་ལས་ལ་ཤུགས་སྣོན་བྱེད་འདོད་ཡོད་ཅེས་བསྟན།

ཀྲུང་གོའི་ཚོང་དོན་པུའུ་ཡི་པུའུ་ཀྲང་གཞོན་པ་ལི་ཧྥེ་ཡིས་བསྟན་དོན།   ཀྲུང་གོ་དང་འཇར་པན་གྱི་དཔལ་འབྱོར་ཚོང་དོན་མཉམ་ལས་ཀྱི་ངོ་བོ་ནི་གཉིས་ཕན་མཉམ་རྒྱལ་ཡིན་པ་དང་། དངོས་གཉེར་མཉམ་ལས་དེ་རྒྱལ་ཁབ་གཉིས་ཀྱི་མི་དམངས་ཀྱི་རྩ་བའི་ཁེ་ཕན་དང་མཐུན། ལྗང་མདོག་འཕེལ་རྒྱས་ཀྱི་ལམ་བུའི་སྟེང་ཀྲུང་གོ་དང་འཇར་པན་ནི་ལས་རིགས་གཅིག་པ་ཡིན་ལ་དེ་ལས་ཀྱང་གྲོགས་པོ་བཟང་བོ་ཡིན།   ཕྱོགས་གཉིས་ཀྱི་འགོ་ཁྲིད་པའི་ཐུན་མོང་ངོས་འཛིན་གལ་ཆེན་མཉམ་དུ་དོན་འཁྱོལ་ཡག་པོ་བྱས་ནས། ཕན་ཚུན་གྱི་དགེ་མཚན་འདོན་སྤེལ་དང་ལྗང་མདོག་མཉམ་ལས་གཏིང་ཟབ་ཏུ་བཏང་སྟེ།  ཀྲུང་གོ་དང་འཇར་པན་གྱི་དཔལ་འབྱོར་ཚོང་དོན་འབྲེལ་བའི་སྤུས་ཚད་མཐོ་གཏོང་རིམ་སྤོར་བྱས་ནས།   འཛམ་གླིང་གི་རྒྱུན་མཐུད་འཕེལ་རྒྱས་ཐད་སྟོབས་ཤུགས་འབུལ་དགོས་ཞེས་བཤད།

འཇར་པན་གྱི་དཔལ་འབྱོར་ཐོན་ལས་བློན་ཆེན་ཝུའུ་ཐེང་རུང་ཀྲི་ཡིས་ཤིས་ཚིག་འབུལ་སྐབ།  འཛམ་གླིང་ལ་སྦགས་བཙོག་ཕྱིར་འབུད་གཅིག་ཀྱང་མི་བྱེད་པ་དེ་ནི་སྤོབས་པ་ཆེན་པོ་ལྡན་པའི་དམིགས་འབེན་ཞིག་ཡིན་པ་དང་།  གལ་འགངས་ཆེ་བ་ཞིག་ནི་རྒྱལ་ཁབ་ཚང་མས་ཐཱན་འབུད་དང་དཔལ་འབྱོར་འཕར་བ། ནུས་རྒྱུའི་བདེ་འཇགས་བཅས་ཀྱི་དམིགས་འབེན་གསུམ་དུས་གཅིག་ཏུ་མངོན་འགྱུར་བྱེད་པའི་ཕྱོགས་སུ་འབད་བརྩོན་ཆེན་པོ་བྱེད་དགོས་པ་དེ་རེད།  དེར་བརྟེན་ངེས་པར་དུ་བཟོ་ལས་གསར་བརྗེ་ནས་བཟུང་འགྱུར་རྡོའི་འབར་རྫས་ལ་བརྟེན་པའི་དཔལ་འབྱོར་སྤྱི་ཚོགས་དང་ཐོན་ལས་གྲུབ་ཆ་དེ་ནུས་རྒྱུ་གཙང་མ་ལྟེ་བར་འགྱུར་བར་བྱེད་དགོས། ཐཱན་འབུད་ལ་སྐུལ་འདེད་གཏོང་བཞིན་པའི་འཇར་པན་དང་ཀྲུང་གོ་རྒྱལ་ཁབ་གཉིས་ཀྱིས་ཐཱན་ཁྲོད་སྙོམ་སྦྱོར་མངོན་འགྱུར་བྱ་རྒྱུ་དམིགས་འབེན་དུ་བྱས་ནས།  ནུས་རྒྱུ་གྲོན་ཆུང་དང་ཁོར་ཡུག་ཁྱབ་ཁོངས་ཀྱི་བརྗེ་རེས་དང་མཉམ་ལས་ལ་སྐུལ་འདེད་གཏོང་བཞིན་ཡོད་པ་དེས་རྒྱལ་ཁབ་གཉིས་ཀྱི་བར་ཐཱན་ཁྲོད་སྙོམ་སྦྱོར་མངོན་འགྱུར་ཡོང་བར་བྱས་རྗེས་ཧ་ཅང་ཆེན་པོ་འཇོག་ཐུབ་རྒྱུ་རེད་ཅེས་བཤད།

ཉིན་དེར་ཀྲུང་གོ་དང་འཇར་པན་གྱི་མཉམ་ལས་དཔེ་སྟོན་ལས་གཞི27གྱི་ཡིག་ཆ་བརྗེ་རེས་ཀྱི་མཛད་སྒོ་བསྡུས། ལས་གཞི་དེ་དག་བཟོ་ལས་གླིང་ཁུལ་གྱི་ཐཱན་སེལ་དང་། གད་སྙིགས་མེར་བསྲེག་གློག་འདོན། ལྗང་མདོག་འཛུགས་སྐྲུན་སོགས་ཁྱབ་ཁོངས་མང་པོ་དང་འབྲེལ་བ་ཡོད་པ་རེད།

ཀྲུང་གོ་དང་འཇར་པན་རྒྱལ་ཁབ་གཉིས་ཀྱི་ནུས་རྒྱུ་གྲོན་ཆུང་དང་ཁོར་ཡུག་སྲུང་སྐྱོབ་ཀྱི་ཕྱོགས་བསྡུས་གླེང་སྟེགས་དེ2006ལོ་ནས་ད་བར་སྐབས17ལ་བདེ་བླག་ངང་བསྡུས་པ་དང་། རིམ་རྩིས་བྱས་ན་མཉམ་ལས་ལས་གཞི457ལ་མིང་རྟགས་བཀོད་པ་དེ་ཀྲུང་གོ་དང་འཇར་པན་རྒྱལ་ཁབ་གཉིས་ཀྱི་ནུས་རྒྱུ་གྲོན་ཆུང་དང་ཁོར་ཡུག་སྲུང་སྐྱོབ།  ལྗང་མདོག་འཕེལ་རྒྱས་སོགས་ཁྱབ་ཁོངས་མཉམ་ལས་ཀྱི་སྟེགས་བུ་གལ་ཆེན་ཞིག་ཏུ་གྱུར་ཡོད་པ་རེད།