སུའུ་ཏན་སྲིད་གཞུང་གིས་ཡུལ་གྱར་པ་དག་ལ་རོགས་སྐྱོབ་རླངས་འཁོར་མངག་གཏོང་བྱས།

སུའུ་ཏན་མི་ཆོས་རིང་ལུགས་རོགས་སྐྱོབ་ཨུ་ཡོན་ལྷན་ཁང་གིས་ཚེས་དྲུག་ཉིན་གསར་འགྱུར་སྤྱི་བསྒྲགས་སྤེལ་ནས་བཤད་རྒྱུར། སུའུ་ཏན་སྲིད་གཞུང་གིས་ཉིན་དེར་རྒྱལ་ཁབ་དེའི་ཤར་ཕྱོགས་དང་བྱང་ཕྱོགས་སུ་མི་ཆོས་རིང་ལུགས་ཀྱི་རོགས་སྐྱོབ་རླངས་འཁོར་མངག་གཏོང་བྱས་ཏེ། ཉེ་ལམ་ཅེ་ཅིས་ལ་མངའ་སྡེ་ནས་བྲོས་པའི་གནས་དེར་ཡུལ་གྱར་པ་དག་ལ་རོགས་སྐྱོར་འདོན་སྤྲོད་བྱས་ཡོད་ཟེར།

སུའུ་ཏན་མི་ཆོས་རིང་ལུགས་རོགས་སྐྱོབ་ཀྱི་ཆེད་དོན་པ་པེ་ཉི་ཡཱ་ཡིས་གསལ་བསྒྲགས་ནང་བཤད་རྒྱུར། རླངས་འཁོར་རུ་དཔུང་གིས་ཕྱེ་དང་རས་གུར། ཟ་མ་དང་ཉལ་ཐུལ་སོགས་དངོས་རྫས་དྲུད་ཡོད་ཅིང་། ད་ལྟ་ཤར་ཕྱོགས་ཀྱི་ཅ་ཏ་ལིས་ཧྥུའུ་མངའ་སྡེ་དང་ཁཱ་ས་ལ་མངའ་སྡེ། བྱང་ཕྱོགས་ཀྱི་ཉི་ལོ་གཙང་བོ་མངའ་སྡེ་སོགས་སུ་སྐྱོད་བཞིན་ཡོད་ཟེར།

སུའུ་ཏན་གྱི་འགྲིམ་འགྲུལ་པུའུ་ཀྲང་ཚབ་མ་ཁཱ་ཞིས་མུའུ་ཡིས་ཉིན་དེར་གསལ་བསྒྲགས་སྤེལ་ནས་བཤད་རྒྱུར། སུའུ་ཏན་བྲེལ་མྱུར་རོགས་སྐྱོབ་དམག་དཔུང་གིས་ཉེ་ལམ་ཅེ་ཅིས་ལ་མངའ་སྡེ་ནས་སྤེལ་བའི་འཁོན་སློག་འགུལ་སྐྱོད་ལས་མི་མང་པོ་འགྲོ་སའི་གནས་མེད་པར་གྱུར་པས། སུའུ་ཏན་སྲིད་གཞུང་གིས་ཡུལ་གྱར་པ་འདི་དག་ལ་དགོས་ངེས་ཀྱི་རྒྱབ་སྐྱོར་འདོན་སྤྲོད་བྱས་ཏེ། ཁོ་ཚོའི་དཀའ་སྡུག་སེལ་བར་འབད་པ་བྱེད་བཞིན་ཡོད་ཟེར།

ད་ལོའི་ཟླ10ཚེས20ཉིན། སུའུ་ཏན་བྲེལ་མྱུར་རོགས་སྐྱོབ་དམག་དཔུང་གི་རུ་དཔུང་འབྲིང་བའི་བཀོད་འདོམས་དཔོན་ཅི་ཁི་ཨར་གྱིས་ཁོངས་གཏོགས་དམག་དཔུང་ཁྲིད་ནས་སུའུ་ཏན་དྲག་ཆས་དམག་དཔུང་ལ་མགོ་བཏགས་རྗེས། སུའུ་ཏན་བྲེལ་མྱུར་རོགས་སྐྱོབ་དམག་དཔུང་གིས་ཅེ་ཅིས་ལ་མངའ་སྡེའི་ཤར་ཕྱོགས་ཀྱི་གྲོང་རྡལ་དང་སྡེ་བ་མང་བོར་གཞི་རྒྱ་ཆེ་བའི་འཇབ་རྒོལ་བྱས། མཉམ་འབྲེལ་རྒྱལ་ཚོགས་མི་ཆོས་རིང་ལུགས་ལས་དོན་མཐུན་སྦྱོར་ཐིན་གྱིས་ཟླ11པའི་ཚེས4ཉིན་སྤེལ་བའི་གཞི་གྲངས་ལས་མངོན་པ་ལྟར་ན། ཟླ10བའི་ཚེས20ཚུན་དུ། ལ་ཅེ་ཧྥུའུ་མངའ་སྡེའི་སྡེ་བ་དང་གྲོང་རྡལ30ལྷག་ལ་འཇབ་རྒོལ་ཐེབས་པ་ལས། མི་འབུམ་གཅིག་དང་ཁྲི་གཅིག་སྟོང་ལྔ་ཙམ་གྱིས་ཡུལ་གྱར་བྱེད་བཞིན་ཡོད།

2023ལོའི་ཟླ4བའི་ཚེས15ཉིན། སུའུ་ཏན་དྲག་ཆས་དམག་དཔུང་དང་སུའུ་ཏན་བྲེལ་མྱུར་རོགས་སྐྱོབ་དམག་དཔུང་བར་རྒྱལ་ས་ཁཱ་ཐུའུ་མུའུ་ནས་དྲས་ཆས་གདོང་ཐུག་བྱུང་ཞིང་། དེར་མཐུད་ནས་དམག་འཁྲུག་དེ་ས་ཁུལ་གཞན་པར་མཆེད་པ་རེད། ལོ་གཅིག་ལྷག་རིང་རྒྱུན་སྲིང་བྱས་པའི་དྲག་ཆས་གདོང་ཐུག་དེ་ལས་སུའུ་ཏན་གྱི་མི་ཁྲི་གཅིག་དང་སྟོང་བཞི་བརྒྱད་བརྒྱ་ཙམ་རྐྱེན་ལམ་དུ་ཤོར་བ་དང་། མི་བྱེ་བ་གཅིག་དང་འབུམ་ལྔ་ཁྲི་གསུམ་ལས་བརྒལ་བ་ཡུལ་གྱར་བྱེད་བཞིན་ཡོད།