ལེ་པ་ནོན་ཀྲིན་ཀྲུའུ་ཏང་གིས་དབྱི་སི་རལ་གྱི་དམག་དོན་རྟེན་གཞི་གཉིས་ལ་འཇབ་རྒོལ་བྱས་ཟེར།

ཚེས6ཉིན། ལེ་པ་ནོན་ཀྲིན་ཀྲུའུ་ཏང་མངའ་འོག་གི་ཏིན་ཐཱ་བརྙན་འཕྲིན་ཁང་གིས་ཀྲིན་ཀྲུའུ་ཏང་གི་གསལ་བསྒྲགས་དྲངས་ནས་བཤད་རྒྱུར། རྩ་འཛུགས་དེས་མི་མེད་གནམ་གྲུ་བཀོལ་ནས་དབྱི་སི་རལ་ཧའེ་ཧྥ་མཚོ་ཁུགས་ཀྱི་མཚོ་ཐོག་དམག་དོན་རྟེན་གཞི་ཞིག་ལ་ཐོག་མའི་འཇབ་རྒོལ་བྱས་ཟེར།

ཉིན་དེར། ལེ་པ་ནོན་ཀྲིན་ཀྲུའུ་ཏང་གིས་དབྱི་སི་རལ་ཐི་ལ་ཝེ་ཧྥུའུ་པིན·ཀུའུ་ལི་ཨན་རྒྱལ་སྤྱིའི་གནམ་གྲུ་ཐང་གི་ཉེ་འགྲམ་གྱི་དམག་དོན་རྟེན་གཞི་ཞིག་ལ་ཡང་འཇབ་རྒོལ་བྱས་ཡོད་ཟེར།

ལེ་པ་ནོན་ཀྲིན་ཀྲུའུ་ཏང་གི་གསར་དུ་འགན་འཁུར་བའི་འགོ་ཁྲིད་པ་ཁཱ་ཞིས་མུའུ་ཡིས་ཚེས་དྲུག་ཉིན་བརྙན་འཕྲིན་གཏམ་བཤད་ཁྲོད་བཤད་རྒྱུར། ཀྲིན་ཀྲུའུ་ཏང་གིས་འཐབ་འཁྲུག་ལ་རྒྱབ་རྟེན་བྱེད་པ་ལས་འདུམ་སྒྲིག་མི་བྱེད་པའི་སྒོ་ནས་དབྱི་སི་རལ་བར་གྱི་དམག་འཁྲུག་མཇུག་བསྡུ་དགོས། རྣམ་པ་གང་རུང་གི་འདུམ་སྒྲིག་ཡོད་ཚད་དབྱི་སི་རལ་གྱིས་ལེ་པ་ནོན་རྒྱལ་ཁབ་ཀྱི་བདག་དབང་ལ་བཙན་འཛུལ་བྱེད་པ་མཇུག་བསྒྲིལ་བའི་རྨང་གཞིའི་སྟེང་སྤེལ་དགོས་ཟེར།

ལེ་པ་ནོན་རྒྱལ་ཁབ་འཕྲིན་གཏོང་ཁང་གིས་བསྒྲགས་པ་ལྟར་ན། ཉིན་འགའི་ལྷིང་འཇགས་རྗེས་སུ། དབྱི་སི་རལ་གྱི་དམག་འཐབ་གནམ་གྲུས་ཚེས་དྲུག་ཉིན་ལེ་པ་ནོན་གྱི་རྒྱལ་ས་པེ་རུ་ཐེའི་ལྷོ་ཕྱོགས་མཐའ་མཚམས་སུ་བར་སྣང་འཇབ་རྒོལ་བྱས་ཟེར། ལེ་པ་ནོན་དམག་ཕྱོགས་ཀྱི་གནས་ཚུལ་ཤེས་མཁན་གྱིས་ཞིན་ཧྭ་གསར་འགྱུར་ཁང་གི་གསར་འགོད་པར་བཤད་པ་ལྟར་ན། དབྱི་སི་རལ་གྱི་དམག་འཐབ་གནམ་གྲུས་ཉིན་དེའི་སྔ་དྲོར་ལེ་པ་ནོན་ལྷོ་ཕྱོགས་ཀྱི་གྲོང་རྡལ15དང་སྡེ་བ21ལ་བར་སྣང་འཇབ་རྒོལ་བྱས་པ་དང་། ལེ་པ་ནོན་ཤར་ཕྱོགས་ཀྱི་གྲོང་རྡལ5དང་སྡེ་བ8དུ་བར་སྣང་འཇབ་རྒོལ་བྱས། ལེ་པ་ནོན་སྤྱི་བའི་འཕྲོད་བསྟེན་པུའུ་ཡིས་ཉིན་དེའི་དགོང་མོར་ཁྱབ་བསྒྲགས་བྱས་དོན། དབྱི་སི་རལ་གྱིས་ཉིན་དེར་ལེ་པ་ནོན་ཤར་ཕྱོགས་ཀྱི་ས་ཁུལ་མང་བོར་འཇབ་རྒོལ་བྱས་པ་ལས། མི40རྐྱེན་ལམ་དུ་ཤོར་བ་དང་། མི53ལ་རྨས་ཕོག་ཡོད་ཟེར།

ལེ་པ་ནོན་གྱི་ཙུང་ལི་མཱིས་ཁ་ཐིས་ཀྱིས་ཚེས6ཉིན་བཤད་རྒྱུར། དབྱི་སི་རལ་གྱིས་ལེ་པ་ནོན་ལ་འཇབ་རྒོལ་བྱེད་ཚད་རྒྱུན་ཆད་མེད་པར་མཐོ་རུ་བཏང་སྟེ་མིའི་རིགས་ལ་ངོ་རྒོལ་བྱེད་པའི་ནག་ཉེས་གྲུབ་ཡོད། དམག་འཁྲུག་ངེས་པར་དུ་མཚམས་བཞག་ནས། ངེས་པར་དུ་མཉམ་འབྲེལ་རྒྱལ་ཚོགས་བདེ་འཇགས་ལས་འཛིན་ལྷན་ཚོགས་ཀྱི་གྲོས་ཆོད་གཅིག་བདུན་ཐིག་གཅིག་ཕྱོགས་ཡོངས་ནས་ལག་བསྟར་བྱེད་དགོས་ཟེར།

ལེ་པ་ནོན་གྱི་སྤྱི་བའི་འཕྲོད་བསྟེན་པུའུ་ཡིས་ཚེས་དྲུག་ཉིན་ཁྱབ་བསྒྲགས་བྱས་པའི་གཞི་གྲངས་བསྡོམས་རྩིས་ལྟར་ན། ན་ནིང་གི་ཟླ10བའི་ཚུན་དུ། ལེ་པ་ནོན་ཀྲིན་ཀྲུའུ་ཏང་དང་དབྱི་སི་རལ་བར་གྱི་འགལ་བ་ལས་ལེ་པ་ནོན་གྱི་མི3050རྐྱེན་ལམ་དུ་ཤོར་ཡོད།