ཆོས་དབྱིངས་སྐྱིད་ཧང་ཀྲོའུ་ཨེ་ཤེ་ཡའི་ལུས་རྩལ་འགྲན་ཚོགས་ཀྱི་ཀྲུང་གོའི་ལུས་རྩལ་འཐུས་ཚབ་ཚོགས་པའི་ནང་བདམས་པ།

ཡོང་ཁུངས། གངས་ལྗོངས་འཕྲིན་གསར། རྩོམ་སྒྲིག་པ། དབང་ཆེན་དོན་འགྲུབ། 2023-09-13 16:07:29 ཀློག་གྲངས།889

ཆོས་དབྱིངས་སྐྱིད་ཧང་ཀྲོའུ་ཨེ་ཤེ་ཡའི་ལུས་རྩལ་འགྲན་ཚོགས་ཀྱི་ཀྲུང་གོའི་ལུས་ རྩལ་འཐུས་ཚབ་ཚོགས་པའི་ནང་བདམས་པ།

མཚོ་སྔོན་ཞིང་ཆེན་ལུས་རྩལ་ཅུས་ནས་འབྱོར་བའི་གནས་ཚུལ་ལྟར་ན། ཟླ9པའི་ཚེས12ཉིན། ཨེ་ཤེ་ཡའི་ལུས་རྩལ་འགྲན་ཚོགས་སྐབས19པའི་ཀྲུང་གོའི་ལུས་རྩལ་འཐུས་ཚབ་ཚོགས་པ་བཙུགས་པའི་ཚོགས་ཆེན་པེ་ཅིང་དུ་འཚོགས་ཤིང་། འཐུས་ཚབ་ཚོགས་པ་དེ་ཁྱོན་མི1329ལས་གྲུབ་པ་དང་དེའི་ཁྲོད་ལུས་རྩལ་པ886ཡོད་ལ། མཚོ་སྔོན་མཆོང་རྒྱུག་འཕེན་གསུམ་གྱི་ལུས་རྩལ་པ་ཆོས་དབྱིངས་སྐྱིད་དང་ཐའེ་ཆོན་དྲག་རྩལ་གྱི་ལུས་རྩལ་པ་ཁྲིན་ཁའེ་གཉིས་བདམས་ཐོན་བྱུང་ཡོད་པ་རེད།

སྐབས་འདིའི་ཨེ་ཤེ་ཡའི་ལུས་རྩལ་འགྲན་ཚོགས་ཁྲོད། ཀྲུང་གོའི་ལུས་རྩལ་འཐུས་ཚབ་ཚོགས་པ་ཁ་པ་ཏི（卡巴迪）དང་པན་ཆིའུ（板球）ཕུད་པའི་རྣམ་གྲངས་ཆེ་བ38དང་ཆུང་བ407གྱི་འགྲན་བསྡུར་ལ་ཞུགས་རྒྱུ་ཡིན་ཞིང་། དེའི་ནང་མཚོ་སྔོན་ཞིང་ཆེན་གྱི་ལུས་རྩལ་པ་ཆོས་དབྱིངས་སྐྱིད་ཕོ་མོའི་སྤྱི་ལེ35ཡི་མཉམ་བསྲེས་འདུར་རྒྱུག་འགྲན་བསྡུར་རྣམ་གྲངས་ནང་ཞུགས་རྒྱུ་ཡིན་པ་དང་། ཁྲིན་ཁའེ་སྐྱེས་པའི་སྤྱི་རྒྱ-58རིམ་པའི་ཐའེ་ཆོན་དྲག་རྩལ་རྣམ་གྲངས་ནང་ཞུགས་རྒྱུ་རེད།

དེའི་སྔོན། ཆོས་དབྱིངས་སྐྱིད་ལ་ལོན་ཏོན་ཨོ་རྩལ་འགྲན་ཚོགས་ཐོག་སྤྱི་ལེ20ཡི་འདུར་རྒྱུག་འགྲན་བསྡུར་གྱི་གསེར་གྱི་རྟགས་མ་ཐོབ་པ་དང་། ད་ལོའི་ཟླ3པར་ཆོས་དབྱིངས་སྐྱིད་ཀྱིས2023ལོའི་རྒྱལ་ཡོངས་འདུར་རྒྱུག་གི་བྱ་དགའ་ཆེན་མོའི་འགྲན་བསྡུར་དང（ས་ཚིགས་དང་པོ）འཛམ་གླིང་གཟེངས་རྟགས་འགྲན་བསྡུར་དེ་བཞིན་ཨེ་ཤེ་ཡའི་ལུས་རྩལ་འགྲན་ཚོགས་ཀྱི་འདེམ་སྒྲུག་འགྲན་བསྡུར་ཁྲོད་ཕུལ་དུ་བྱུང་བའི་ཨང་གཉིས་པའི་གྲུབ་འབྲས་བླངས་ནས་ཀྲུང་གོའི་མཆོང་རྒྱུག་འཕེན་གསུམ་རུ་ཁག་གི་འཛམ་གླིང་གཟེངས་རྟགས་འགྲན་བསྡུར་དང་ཨེ་ཤེ་ཡའི་ལུས་རྩལ་འགྲན་ཚོགས་ཀྱི་གཅིག་སྡུད་སྦྱོང་བརྡར་གྱི་དཔུང་ཉམས་ནང་ཚུད་ཡོད་པ་རེད། ད་ལོའི་ཟླ4པར་མཚོ་སྔོན་ལུས་རྩལ་ལས་དོན་རུ་ཆེན་གཉིས་པའི་ལུས་རྩལ་པ་ཁྲིན་ཁའེ་ལ་འཛམ་གླིང་ཐའེ་ཆོན་དྲག་རྩལ་གྱི་ཨང་དང་པོ་ཐོབ་མཁན་གྱི་མུ་འབྲེལ་འགྲན་བསྡུར་དང་ཨོ་རྩལ་འགྲན་ཚོགས་ཀྱི་ཁོངས་སྒྲོལ་བྱང་བུའི་འགྲན་བསྡུར་ཁྲོད་སྐྱེས་པའི་སྤྱི་རྒྱ-58རིམ་པའི་ཨང་གསུམ་པ་བླངས་ཤིང་འཛམ་གླིང་ཐའེ་ཆོན་དྲག་རྩལ་གྱི་ཨང་དང་པོ་ཐོབ་མཁན་གྱི་རྟིང་རྩོད་འགྲན་བསྡུར་ནང་ཚུད་ཡོད་པ་རེད།

རྩོམ་གོང་མ། > ཞི་ཅིན་ཕིང་གིས་པེ་ནི་ནའི་ཙུང་ཐུང་ཐ་ལུང་དང་གྲོས་མོལ་གནང་བ།
རྩོམ་གཞུག་མ། > ཞི་ཅིན་ཕིང་གིས་ཝེ་ནེ་ཙུའེ་ལའི་ཙུང་ཐུང་དང་གྲོས་མོལ་མཛད།