རྟོགས་པ་གྲོལ་བའི་མགུར།

སེམས་ཀྱི་མེ་ལོང་ངོས་སུ་འཛུམ་པ་ཡི།།

རྣམ་རྟོག་སྤྲིན་རིས་འདི་ཡང་རྫུན་པ་སྟེ།།

དབྱར་གྱི་ཆར་རྗེས་ཤར་བའི་འཇའ་ཚོན་བཞིན།།

ཅོལ་ཆུང་བྱིས་པ་བསླུ་བའི་ཆོམ་རྐུན་ཉིད།།

སེམས་ཀྱིས་ཉེ་ན་ཡོད་ཚད་དྲུང་ན་གནས།།

དགྲ་ལ་བྱམས་པའི་མེ་ཏོག་ཕུལ་ཡང་ཆོག།

དགའ་སྡུག་རླུང་བུའི་བུ་ཡུག་འཚུབ་པའི་ཚེ།།

བརྩེ་བའི་གུར་ཁང་ནང་གི་སྒྲོན་མེ་གཟིམས།།

ཐར་བའི་མྱུ་གུ་བྱང་སེམས་ཁུད་ནས་འཁྲུངས།།

ཉམས་རྟོགས་ཡོན་ཏན་ལྟ་བའི་གདོང་ནས་བཀྲ།།

འཁོར་འདས་རྫུན་རྐུབ་ཕུད་པའི་ཕར་རྒྱབ་ན།།

འགྱུར་མེད་བདེ་བ་ཆེན་པོའི་བཙན་ས་ཡོད།།

མི་ཚེ་སྟོན་མཚན་རིང་མོའི་རྨི་ལམ་འདྲ།།

མེད་སྣང་སྒྱུ་མའི་ཆོས་ཀྱིས་གཙེས་པའི་ཚེ།།

དགའ་སྐྱོ་ཆགས་སྡང་རླབས་ཕྲེང་བསྟུད་མར་འབྱུང་།།

སུས་ཀྱང་མ་བྱས་ཀུན་བྱེད་རི་མོ་ཡིན།།

ཡར་མཐའ་གང་ནས་འོངས་པ་མི་རྟོགས་ཤིང་།།

མར་མཐའ་གང་དུ་འགྲོ་བ་མ་ངེས་པའི།།

བདག་འཛིན་གདོན་གྱི་དཔའ་བོ་ཁེར་རྒྱུགས་དེས།།

སྐྱེ་བོ་ཕལ་ཆེར་སྡུག་བསྔལ་འོབས་སུ་བརྫངས།།

བྱ་བའི་ལམ་འགྲོ་སྤྲིན་བར་ཉི་མ་འདྲ།།

རླུང་རྟའི་དར་རྒུད་ཟླ་བའི་འཕེལ་འགྲིབ་བཞིན།།

བདེ་སྡུག་སྣང་བ་འདི་ཡི་རང་བཞིན་ཡིན།།

ཕལ་བའི་མི་ཚེ་འདི་ལ་ཡིད་རྟོན་ཅི།།

འདུན་མ་བརྒྱ་ལ་གྲུབ་པ་གཅིག་དང་གཉིས།།

འབད་པས་གྲུབ་ལ་སྙིང་པོ་ཏིལ་འབྲུ་ཙམ།།

སོ་སྐྱེས་ང་ཅག་ཧམ་པའི་རྩེད་ཆས་ཏེ།།

གང་སར་གཡུག་པ་རྐང་རྩེད་སྤོ་ལོ་བཞིན།།

ལ་ལས་འབྱུང་འགྱུར་མོ་དང་རྩིས་ལ་བཅོལ།།

འགའ་ཡིས་ཡོད་ཚད་རྗེས་དཔག་བློ་ལ་བཅོལ།།

གལ་ལ་ཐུག་ཚེ་རང་རྐྱ་མི་ཐུབ་པའི།།

འཁྲུལ་སྣང་སྣོན་མ་འདིས་ཀྱང་ཅི་ཞིག་བྱ།།

མེད་སྣང་འདི་ལ་མཛུབ་མོ་གདོང་བཙུགས་ཀྱིས།།

ཁྱོད་ནི་རྫུན་ལ་ང་ནི་བདེན་ནོ་ཞེས།།

རེ་དོགས་མཁའ་རུ་ཆགས་སྡང་སྤྲིན་ནག་འཁྲིགས།།

འདི་ཡང་མ་བོས་སྡུག་བསྔལ་ལྷག་མ་ཞིག།

རེ་བའི་སྣེ་མོར་འཇིག་རྟེན་ཆོས་བརྒྱད་ཀྱི།།

དར་ཚོན་ལན་བུ་ཤམ་པའི་དགུ་མདུད་འདི།།

ནམ་ཞིག་རང་སར་མ་གྲོལ་དེ་སྲིད་དུ།།

དོན་གྱི་བདེ་བ་བྱང་ཕུག་ཉི་སྒུག་འདྲ།།