ཁྱིམ་ཚང་དྲག་སྤྱོད་སྤེལ་མཁན་ཇི་ལྟར་ཐག་གཅད་དགོས།

གྱོད་དཔེ།

2020ལོའི་ཟླ4པར། བཟང་མོ་དང་ལྕགས་རྒྱལ་གཉིས་ཁྱིམ་མིས་ངོ་སྤྲོད་བྱས་པ་བརྒྱུད་ཕན་ཚུན་ངོ་ཤེས་ཤིང་། 2021ལོའི་ཟླ2པར་ཁོ་གཉིས་ཀྱིས་གཉེན་སྒྲིག་ཐོ་འགོད་བྱས། 2021ལོའི་ཟླ3པའི་ཟླ་དཀྱིལ་དུ་བཟང་མོས་མངལ་ཆགས་ཡོད་སྒང་ལ་ལྕགས་རྒྱལ་ལ་སྦྲུམ་མའི་མཁོ་ཆས་ཉོ་བར་སྒོར་མོ་བསླངས་པ་ན། ལྕགས་རྒྱལ་གྱིས་སྒོར་མོ་སྟེར་མ་འདོད་པར་བཟང་མོར་གཅར་རྡུང་བྱས། ཟླ4པའི་ཉིན་ཞིག་སྒྱུག་མོས་བཟའ་འཁོན་བྱས་ན་ཁྱིམ་ཚང་ལ་གནོད་པའི་ཁ་ཏ་བྱས་པར་ལྕགས་རྒྱལ་གྱིས་གོ་ནོར་བླངས་ཏེ་སྒྱུག་མོར་གཅར་རྡུང་བྱེད་སྒང་ལ་བར་འབྱེད་མཁན་ཆུང་མ་བཟང་མོ་ལའང་གཅར་རྡུང་བྱས། ཕྱིས་སུ་བཟང་མོས་གྲོང་རྡལ་མངགས་གཏོང་ཁང་ལ་གྱོད་དོན་སྙན་སེང་ཞུས་རྗེས། ཉེན་རྟོག་པ་འཕྲལ་མར་ཡུལ་དངོས་སུ་ཐོན་ནས་ལྕགས་རྒྱལ་ལ་སློབ་གསོ་བཏང་ཞིང་ཐ་ཚིག་བསྒྲགས། ཉིན་དེའི་ཕྱི་དྲོར་བཟང་མོ་ཨ་མའི་ཁྱིམ་དུ་ལོག་ཅིང་ས་རུབ་རྗེས་ལྕགས་རྒྱལ་བཟང་མོ་ཡོད་སར་སོང་སྟེ་སྒྱུག་མོར་གཅར་རྡུང་དང་འཇིགས་སྐུལ་བྱས་པས། བཟང་མོ་ཐབས་ཟད་དེ་ཡང་བསྐྱར་ཉེན་རྟོག་པར་གྱོད་དོན་སྙན་སེང་ཞུས་རྗེས། ཉེན་རྟོག་པ་འཕྲལ་མར་ཡོང་ནས་ལྕགས་རྒྱལ་ཡུལ་དངོས་དང་ཁ་བྲལ་དུ་བཅུག ལྕགས་རྒྱལ་གྱིས་བཟང་མོ་དང་མོའི་ཁྱིམ་མིར་ཐེངས་གང་མང་ལ་གཅར་རྡུང་བྱས་པ་དང་། བཟང་མོས་ཀྱང་བྱིས་པ་བཙའ་ལ་ཁད་ཡོད་པས། མོས་རང་ཉིད་ཀྱི་རྒྱུན་ལྡན་འཚོ་བ་དང་ཁྲིམས་མཐུན་ཁེ་དབང་ལ་སྲུང་སྐྱོང་བྱ་ཆེད། ལྕགས་རྒྱལ་མི་དམངས་ཁྲིམས་ཁང་དུ་ཞུ་གཏུག་བྱས་ཏེ་ཁྱིམ་མིར་གཅར་རྡུང་དང་འཇིགས་སྐུལ་བྱེད་པར་བཀག་འགོག་བྱ་དགོས་པའི་རེ་བ་བཏོན།

བཅའ་ཁྲིམས་དབྱེ་ཞིབ། 

མིག་སྔའི་སྤྱི་ཚོགས་འཚོ་བའི་ཁྲོད་ས་ཁུལ་མང་པོ་ཞིག་དང་ལྷག་པར་གྲོང་གསེབ་ས་ཁུལ་དུ་ཁྱིམ་ཚང་དྲག་སྤྱོད་ལ་ངོ་རྒོལ་བྱེད་པའི་འདུ་ཤེས་སྔར་བཞིན་ཆེན་པོ་མེད་པ་དང་། གནོད་འཚེ་ཕོག་མཁན་གྱིས་ཁྱིམ་གྱི་སྐྱུག་བྲོ་བའི་དོན་ངན་ཕྱི་ལ་མི་སྒྲོག་པའི་བསམ་བློ་བཟུང་སྟེ། ཁྱིམ་ཚང་དྲག་སྤྱོད་ལ་བཅའ་ཁྲིམས་ཀྱིས་དུས་ཐོག་ཏུ་སྲུང་སྐྱོང་བྱེད་མི་ཐུབ་པས་ཁྱིམ་གྱི་དྲག་སྤྱོད་གནས་ཚུལ་ཚབས་ཆེན་དུ་གྱུར་ཡོད། ཁྱིམ་ཚང་དྲག་སྤྱོད་ནི་ཁྱིམ་ཚང་གི་འཆམ་མཐུན་ལ་འཇིགས་སྐུལ་བྱེད་པའི་རྒྱུ་རྐྱེན་གལ་ཆེན་ཞིག་ཏུ་གྱུར་ཡོད།

མི་དམངས་ཁྲིམས་ཁང་གིས་བཟང་མོས་བཏོན་པའི་རེ་ཞུ《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཁྱིམ་ཚང་དྲག་སྤྱོད་ལ་ངོ་རྒོལ་བྱེད་པའི་བཅའ་ཁྲིམས》ཀྱི་དོན་ཚན27པར་གཏན་འཁེལ་བྱས་པའི་མི་ལུས་བདེ་འཇགས་སྲུང་སྐྱོང་གི་བཀའ་རྒྱ་གཏོང་བའི་ཆ་རྐྱེན་དང་མཐུན་པར་ངོས་འཛིན་བྱ་སྲིད། ཁྲིམས་ལྟར་ལྕགས་རྒྱལ་གྱིས་བཟང་མོར་གཅར་རྡུང་དང་མོའི་ཁྱིམ་མི་ལ་འཇིགས་སྐུལ་དང་བཀག་འགོག་བྱ་དགོས་པའི་ཁྲུན་བཅད་གཏོང་བ་དང་། ཁྲུན་བཅད་ཀྱི་ནུས་ལྡན་དུས་ཡུན་ནི་ཟླ6ཡིན་ཞིང་། ཁྲུན་བཅད་སྐྱེལ་སྤྲོད་བྱས་ཉིན་ནས་བཟུང་ནུས་པ་ཐོན་རྒྱུ་དང་། སྐྱེལ་སྤྲོད་བྱས་རྗེས་འཕྲལ་དུ་ལག་བསྟར་བྱ་རྒྱུ། གལ་ཏེ་ལྕགས་རྒྱལ་གོང་གསལ་གྱི་བཀའ་རྒྱ་དང་འགལ་ན། ཁྲིམས་ཁང་གིས《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཁྱིམ་ཚང་དྲག་སྤྱོད་ལ་ངོ་རྒོལ་བྱེད་པའི་བཅའ་ཁྲིམས》ཀྱི་དོན་ཚན34པའི་གཏན་འཁེལ་ལྟར། ཉེས་ཚབས་ཆེ་ཆུང་ལ་གཞིགས་ནས་དངུལ་ཆད་དང་བཀག་ཉར་བྱེད་པ་དང་ནག་ཉེས་སུ་གྲུབ་ཚེ། ཉེས་དོན་འགན་འཁྲི་བདའ་འདེད་བྱ་ངེས།

གོང་གི་གྱོད་དོན་འདིའི་ཁྲོད་དུ། ཁྲིམས་ཁང་གིས་ཁྱིམ་ཚང་དྲག་སྤྱོད་གནས་ཚུལ་ཛ་དྲག་ཡིན་པའི་ཚད་ལ་གཞིགས་ནས། ཁྲིམས་ལྟར་ཆུ་ཚོད་ཉེར་བཞིའི་ནང་དུས་ཐོག་ཏུ་མི་ལུས་བདེ་འཇགས་སྲུང་སྐྱོང་གི་བཀའ་རྒྱ་གཏོང་བའི་ཁར་ཁྲིམས་བཀོད་ནང་དོན་ཁ་གསལ་བཟོས་པ་ནུས་པ་ལྡན་ཡིན་པས། ཁྱིམ་ཚང་དྲག་སྤྱོད་སྤེལ་མཁན་ཏེ་ལྕགས་རྒྱལ་ལ་ཚོད་འཛིན་དང་བཀག་འགོག་བྱ་ངེས། མི་ལུས་བདེ་འཇགས་སྲུང་སྐྱོང་གི་བཀའ་རྒྱ་ཁྱབ་སྒྲོག་བྱས་པ་དེས་མཇུག་མཐར་དོ་བདག་པའི་བརྩེ་དུང་འཆམ་མཐུན་ཡོང་བར་སྐུལ་འདེད་དང་། བཟང་མོས་བྱིས་པ་བཙས་རྗེས་འཚར་ལོངས་འབྱུང་བར་ཁོར་ཡུག་ལེགས་པོ་ཞིག་བསྐྲུན་ཆེད་ཡིན།