རྨ་ཆུའི་སྲུང་སྐྱོང་བཅའ་ཁྲིམས།

དོན་ཚན་བརྒྱ་དང་བརྒྱད་པ། རྒྱལ་སྲིད་སྤྱི་ཁྱབ་ཁང་གི་འབྲེལ་ཡོད་སྡེ་ཁག་དང་། རྨ་ཆུའི་འབབ་རྒྱུད་ཀྱི་རྫོང་རིམ་པ་ཡན་གྱི་ས་གནས་མི་དམངས་སྲིད་གཞུང་དང་དེའི་འབྲེལ་ཡོད་སྡེ་ཁག་དང་། རྨ་ཆུའི་འབབ་རྒྱུད་དོ་དམ་སྒྲིག་གཞི་དང་དེའི་ཁོངས་གཏོགས་དོ་དམ་སྒྲིག་གཞི། རྨ་ཆུའི་འབབ་རྒྱུད་ཀྱི་སྐྱེ་ཁམས་ཁོར་ཡུག་ལྟ་སྐུལ་དོ་དམ་སྒྲིག་གཞི་བཅས་ཀྱིས་བཅའ་ཁྲིམས་འདིའི་གཏན་འཁེལ་དང་འགལ་ཏེ་གཤམ་གསལ་བྱ་སྤྱོད་ལས་རིགས་གཅིག་ཡོད་ན། དེའི་འགན་ཐད་ཀར་འཁུར་བའི་གཙོ་སྐྱོང་མི་སྣ་དང་ཁག་འགན་ཐད་ཀར་འཁུར་མཁན་གཞན་དག་ལ་ཁྲིམས་ལྟར་ཐ་ཚིག་བསྒྲག་རྒྱུ་དང་། སྐྱོན་ཐོ་དགོད་རྒྱུ། སྐྱོན་ཆེན་ཐོ་འགོད། རིམ་པ་གཅོག་པ་བཅས་ཀྱི་ཆད་པ་གཅད་རྒྱུ་དང་། མཇུག་འབྲས་ཚབས་ཆེན་བཟོས་པར་གོ་གནས་ལེན་པའམ་ཕྱིར་འབུད་ཀྱི་ཆད་པ་གཅད་རྒྱུ་དང་། དེའི་འགན་འཁུར་བ་གཙོ་བོས་འགན་འཛོལ་རང་ལ་དཀྲིས་ནས་ལས་ཁུར་དགོངས་ཞུ་བྱ་དགོས་པ་སྟེ།

( གཅིག ) སྲིད་འཛིན་བཀའ་འཁྲོལ་གནང་འཐུས་ཀྱི་ཆ་རྐྱེན་དང་མི་མཐུན་པར་སྲིད་འཛིན་བཀའ་འཁྲོལ་གནང་བ།

( གཉིས ) བཅའ་ཁྲིམས་ལྟར་ལས་མཚམས་འཇོག་པ་དང་སྒོ་རྒྱག་ཏུ་འཇུག་པ་སོགས་ཀྱི་ཐག་གཅོད་དགོས་ཀྱང་མ་བཅད་པ།

( གསུམ ) ཁྲིམས་འགལ་གྱི་བྱ་སྤྱོད་ཡོད་པ་ཤེས་པའམ་ཡང་ན་ཐེར་ འདོན་ཞུ་ཡིག་འབྱོར་ཡང་ཁྲིམས་ལྟར་རྩད་ཞིབ་ཐག་གཅོད་མི་བྱེད་པ།

( བཞི ) རང་འཁྲིའི་ལས་འགན་སྣང་མེད་དུ་འཇོག་པ་དང་། འགན་དབང་གང་བྱུང་དུ་སྤྱོད་པ། ཉེན་ཕྱོགས་གཡོ་ཟོལ།

དོན་ཚན་བརྒྱ་དང་དགུ་པ། བཅའ་ཁྲིམས་འདིའི་གཏན་འཁེལ་དང་འགལ་ཏེ་གཤམ་གསལ་གྱི་བྱ་སྤྱོད་ལས་རིགས་གཅིག་ཡོད་ན། ས་གནས་མི་དམངས་སྲིད་གཞུང་གི་སྐྱེ་ཁམས་ཁོར་ཡུག་དང་རང་བྱུང་ཐོན་ཁུངས་སོགས་གཙོ་སྐྱོང་སྡེ་ཁག་གིས་འགན་འཁྲི་བགོས་ཚུལ་ལྟར་ཁྲིམས་འགལ་བྱ་སྤྱོད་སྤེལ་མཚམས་འཇོག་ཏུ་འཇུག་རྒྱུ་དང་། དུས་བཀག་ལྟར་བཤིག་པའམ་རང་འཇགས་སོར་ཆུད་བྱེད་དུ་འཇུག་རྒྱུ་དང་། སྒོར་ལྔ་འབུམ་ཡན་ནས་ལྔ་འབུམ་མན་ཆད་བར་གྱི་དངུལ་ཆད་གཅད་རྒྱུ་དང་། འགན་ཐད་ཀར་འཁུར་བའི་གཙོ་སྐྱོང་མི་སྣ་ དང་ཁག་འགན་ཐད་ཀར་འཁུར་བའི་མི་སྣ་གཞན་དག་ལ་སྒོར་ཁྲི་ལྔ་ཡན་ནས་སྒོར་ཆིག་འབུམ་མན་ཆད་བར་གྱི་དངུལ་ཆད་གཅད་རྒྱུ། དུས་ལས་ཡོལ་ཡང་བཤིག་མེད་པའམ་སྔོན་མ་ནང་བཞིན་སོར་ཆུད་མི་བྱེད་པའི་རིགས་ལ་བཙན་ཐབས་ཀྱིས་བཤིག་པའམ་ཡང་ན་སྔོན་མ་ནང་བཞིན་སོར་ཆུད་བྱེད་དུ་འཇུག་རྒྱུ་དང་། འགྲོ་གྲོན་ཡོད་ཚད་ཁྲིམས་འགལ་པས་གཏོང་དགོས། བྱས་ཉེས་ཚབས་ཆེན་ཡིན་ན། ཆོག་མཆན་འགོད་དབང་ཡོད་པའི་མི་དམངས་སྲིད་གཞུང་ལ་སྙན་སེང་ཞུས་ནས་ཆོག་མཆན་ཐོབ་རྗེས་སྒོ་རྒྱག་ཏུ་འཇུག་རྒྱུ་སྟེ། 

( གཅིག ) རྨ་ཆུའི་ཡན་ལག་དང་ཡན་ལག་གི་དོ་དམ་ཚོད་འཛིན་མཚོ་རྒྱུད་ཀྱི་ཁྱབ་ཁོངས་ནང་རྫས་འགྱུར་བཟོ་ལས་གླིང་ཁུལ་ལམ་རྫས་འགྱུར་བཟོ་ལས་རྣམ་གྲངས་གསར་སྐྲུན་དང་རྒྱས་སྐྲུན་བྱ་རྒྱུ་དང་།

( གཉིས ) རྨ་ཆུའི་ཆུ་གཞུང་གི་འགྲམ་རྒྱུད་དམ་ཡང་ན་ཡན་ལག་ཆུ་བོ་གལ་ཆེའི་འགྲམ་རྒྱུད་དོ་དམ་ཚོད་འཛིན་བྱེད་ཁོངས་སུ་གཏེར་མཛོད་གསར འཛུགས་དང་། བཅོས་འཛུགས། རྒྱས་སྐྲུན་བཅས་བྱ་དགོས་པ།

( གསུམ ) སྐྱེ་ཁམས་ཁོར་ཡུག་ལ་ཆོག་འཐུས་ཀྱི་རྩིས་ཁྲའི་གཏན་འབེབས་དང་འགལ་ནས་ཐོན་སྐྱེད་འཛུགས་སྐྲུན་བྱེད་སྒོ་སྤེལ་བ།

དོན་ཚན་བརྒྱ་དང་བཅུ་པ། བཅའ་ཁྲིམས་འདིའི་གཏན་འབེབས་དང་འགལ་ཏེ་རྨ་ཆུའི་འབབ་རྒྱུད་དུ་གསར་སྦོལ་བྱས་མི་ཆོག་པའི་གཟར་ཚད་ཡན་གྱི་གཟར་ངོས་སུ་ལོ་ཏོག་གསར་སྦོལ་འདེབས་འཛུགས་བྱས་པར་རྫོང་རིམ་པ་ཡན་གྱི་ས་གནས་མི་དམངས་སྲིད་གཞུང་གི་ཆུའི་སྲིད་འཛིན་གཙོ་སྐྱོང་སྡེ་ཁག་གམ་ཡང་ན་རྨ་ཆུའི་འབབ་རྒྱུད་དོ་དམ་སྒྲིག་གཞི་དང་དེའི་ཁོངས་གཏོགས་དོ་དམ་སྒྲིག་གཞིས་ཁྲིམས་འགལ་བྱ་སྤྱོད་སྤེལ་མཚམས་འཇོག་འགན་དཀྲི་རྒྱུ་དང་། རྨོ་བསྐྱུར་དང་སྔོ་ཁེབས་སླར་གསོ་སོགས་ཀྱི་གྱོང་གུན་གསབ་ཐབས་སྤྱོད་རྒྱུ་དང་། གསར་སྦོལ་བྱས་པའི་རྒྱ་ཁྱོན་ལྟར་སྡེ་ཚན་ལ་སྨི་གྲུ་བཞི་མ་རེར་སྒོར་བརྒྱ་མན་ཆད་ཀྱི་དངུལ་ཆད་བཅད་ཆོག་པ་དང་། མི་སྒེར་ལ་སྨི་གྲུ་བཞི་མ་རེར་སྒོར་ཉི་ཤུ་མན་ཆད་བཅད་ཆོག

བཅའ་ཁྲིམས་འདིའི་གཏན་འཁེལ་དང་འགལ་ཏེ་རྨ་ཆུའི་འབབ་རྒྱུད་དུ་འདམ་གཤོང་སའི་ཆུ་རགས་གཏོར་སྐྱོན་བཏང་བ་དང་རང་དགར་བཟུང་སྤྱོད་བྱས་རིགས་ལ་རྫོང་རིམ་པ་ཡན་གྱི་ས་གནས་མི་དམངས་སྲིད་གཞུང་གི་ཆུའི་སྲིད་འཛིན་གཙོ་སྐྱོང་སྡེ་ཁག་གམ་ཡང་ན་རྨ་ཆུའི་འབབ་རྒྱུད་དོ་དམ་སྒྲིག་གཞི་དང་དེའི་ཁོངས་གཏོགས་དོ་དམ་སྒྲིག་གཞིས་ཁྲིམས་འགལ་བྱ་སྤྱོད་སྤེལ་མཚམས་འཇོག་འགན་དཀྲི་རྒྱུ་དང་དུས་བཀག་ལྟར་བཅོས་སྐྱོང་བྱེད་དུ་འཇུག་པའམ་ཡང་ན་གྱོང་གུན་གསབ་ཐབས་སྤྱད་དེ་དངུལ་ཆད་སྒོར་ཆིག་འབུམ་ཡན་ནས་ས་ཡ་གཅིག་མན་ཆད་གཅོད་རྒྱུ། དུས་ལས་ཡོལ་ཡང་བཅོས་སྐྱོང་མི་བྱེད་པའམ་གྱོང་གུད་གསབ་ཐབས་མི་སྤྱོད་པའི་རིགས་ལ། ཚབ་ཏུ་བཅོས་སྐྱོང་བྱེད་ པའམ་གྱོང་གུད་གསབ་ཐབས་སྤྱོད་སྐབས་འགྲོ་གྲོན་ཡོད་ཚད་ཁྲིམས་འགལ་པས་གཏོང་དགོས།

བཅའ་ཁྲིམས་འདིའི་གཏན་འཁེལ་དང་འགལ་ཏེ་རྨ་ཆུའི་འབབ་རྒྱུད་དུ་ཐོན་སྐྱེད་དང་འཛུགས་སྐྲུན་གྱི་བྱེད་སྒོ་སྤེལ་ནས་ས་ཆུ་ཤོར་ཚུལ་བཅོས་སྐྱོང་བྱས་མེད་པའམ་བཅོས་སྐྱོང་བྱས་ཚུལ་རྒྱལ་ཁབ་ཀྱིས་གཏན་འབེབས་བྱས་པའི་འབྲེལ་ཡོད་ཚད་གཞི་དང་མི་མཐུན་པའི་རིགས་ལ་རྫོང་རིམ་པ་ཡན་གྱི་ས་གནས་མི་དམངས་སྲིད་གཞུང་གི་ཆུའི་སྲིད་འཛིན་གཙོ་སྐྱོང་སྡེ་ཁག་གམ་ཡང་ན་རྨ་ཆུའི་འབབ་རྒྱུད་དོ་དམ་སྒྲིག་གཞི་དང་དེའི་ཁོངས་གཏོགས་དོ་དམ་སྒྲིག་གཞིས་དུས་ བཀག་ནང་བཅོས་སྐྱོང་བྱེད་འགན་དཀྲི་རྒྱུ་དང་། སྡེ་ཚན་ལ་སྒོར་ཁྲི་གཉིས་ཡན་ནས་སྒོར་ཁྲི་ཉི་ཤུ་མན་བར་གྱི་དངུལ་ཆད་གཅོད་རྒྱུ་དང་། མི་སྒེར་ལ་སྒོར་ཁྲི་གཉིས་མན་གྱི་དངུལ་ཆད་བཅད་ཆོག་པ་དང་། དུས་ལས་ཡོལ་ཡང་བཅོས་སྐྱོང་མ་བྱས་ན། གཙང་བཅོས་བྱས་ཆོག་པ་དང་། དེར་མཁོ་བའི་འགྲོ་གྲོན་ནི་ཁྲིམས་འགལ་པ་རང་གིས་སྤྲད་རྒྱུ།

དོན་ཚན་བརྒྱ་དང་བཅུ་གཅིག་པ། བཅའ་ཁྲིམས་འདིའི་གཏན་འཁེལ་དང་འགལ་ཏེ། རྨ་ཆུའི་ཆུ་གཞུང་ཨ་མ་དང་ཡན་ལག་ཆུ་བོ་གལ་ཆེན་གྱི་ཆུའི་ལས་གྲྭ་ཡིས་སྐྱེ་ཁམས་ཆུ་སྤྱོད་བཀོད་གཏོང་བྱ་རྒྱུ་དེ་རྒྱུན་ལྡན་གྱི་འཁོར་སྐྱོད་བཀོད་གཏོང་སྒྲིག་སྲོལ་དུ་བཅུག་མེད་ན། འབྲེལ་ཡོད་གཙོ་སྐྱོང་སྡེ་ཁག་གིས་འགན་འཁྲི་བགོས་ཚུལ་ལྟར་ཡོ་བསྲང་བྱེད་འགན་དཀྲི་རྒྱུ་དང་། ཐ་ཚིག་བསྒྲག་རྒྱུ་མ་ཟད། སྒོར་ཆིག་ཁྲི་ཡན་ནས་ཆིག་འབུམ་མན་ཆད་བར་གྱི་དངུལ་ཆད་ཀྱང་གཅད་རྒྱུ། ཉེས་ཚབས་ཆེ་རིགས་ལ་སྒོར་འབུམ་གཅིག་ཡན་ནས་འབུམ་ལྔ་མན་བར་གྱི་དངུལ་ཆད་ཆབས་སྦྲགས་སུ་གཅད་རྒྱུ།

དོན་ཚན་བརྒྱ་དང་བཅུ་གཉིས་པ། བཅའ་ཁྲིམས་འདིའི་གཏན་འཁེལ་དང་འགལ་ཏེ། ཀླུང་རྒྱ་སྡོམ་རིང་གི་རྨ་ཆུ་འབབ་རྒྱུད་ཀྱི་ཆུ་ཁོངས་གཙོ་བོ་རུ་རང་བྱུང་ཉ་ལས་ཐོན་ཁུངས་ཐོན་སྐྱེད་རང་བཞིན་གྱི་འཛིན་འདོན་བྱེད་རིགས་ལ་རྫོང་རིམ་པ་ཡན་གྱི་ས་གནས་མི་དམངས་སྲིད་གཞུང་གི་ཞིང་ལས་དང་གྲོང་གསེབ་གཙོ་སྐྱོང་སྡེ་ཁག་གིས་འཛིན་འདོན་བྱས་དངོས་དང་། ཁྲིམས་འགལ་གྱི་ཐོབ་ཆ་གཞུང་བཞེས་གཏོང་རྒྱུ་དང་དེ་བཞིན་ཁྲིམས་འགལ་གྱི་བྱེད་སྒོ་སྤེལ་བར་སྤྱོད་པའི་ཉ་གྲུ་དང་། ཉ་འཛིན་ཆས་དང་ལག་ཆ་གཞན་དག་བཅས་གཞུང་བཞེས་གཏང་རྒྱུ་དང་སྒོར་ཆིག་ཁྲི་ཡན་ནས་ལྔ་ཁྲི་མན་བར་གྱི་དངུལ་ཆད་ཆབས་སྦྲགས་སུ་གཅོད་རྒྱུ། གློག་ཉ་དང་དུག་རྫས་སོགས་ཀྱི་བྱེད་ཐབས་ལ་བརྟེན་ནས་འཛིན་འདོན་བྱེད་པའམ་ཡང་ན་གནས་ཚུལ་ཚབས་ཆེན་གཞན་དག་ཡོད་རིགས་ལ་སྒོར་ཁྲི་ལྔ་ཡན་ནས་འབུམ་ལྔ་མན་ཆད་བར་གྱི་དངུལ་ཆད་བཅས་མཉམ་དུ་གཅད་རྒྱུ།

བཅའ་ཁྲིམས་འདིའི་གཏན་འཁེལ་དང་འགལ་ཏེ་རྨ་ཆུའི་འབབ་རྒྱུད་དུ་ཆུ་ཁོངས་སུ་གསོ་སྤེལ་བྱེད་པ་དང་། ཕྱི་ནས་ཡོང་བའི་སྐྱེ་དངོས་རིགས་སམ་ཡང་ན་ས་ཆ་དེ་གའི་སྐྱེ་དངོས་རིགས་མ་ཡིན་པའི་སོན་རྒྱུའི་ཐོན་ཁུངས་གཞན་དག་འཇོག་པར་རྫོང་རིམ་པ་ཡན་གྱི་ས་གནས་མི་དམངས་སྲིད་གཞུང་གི་ཞིང་ལས་དང་གྲོང་གསེབ་གཙོ་སྐྱོང་སྡེ་ཁག་གིས་དུས་བཀག་ནང་ཕྱིར་སློག་བྱེད་འགན་དཀྲི་རྒྱུ་དང་། སྒོར་ཆིག་འབུམ་མན་གྱི་དངུལ་ཆད་གཅད་རྒྱུ་དང་། ངན་འབྲས་ཚབས་ཆེན་བཟོས་རིགས་ལ་སྒོར་ཆིག་འབུམ་ཡན་ནས་ས་ཡ་གཅིག་མན་ཆད་བར་གྱི་དངུལ་ཆད་གཅོད་རྒྱུ། དུས་ལས་ཡོལ་རུང་འཛིན་ལན་མ་སྤྲད་ན་འཛིན་ལན་བྱས་པའམ་ལྡོག་ཕྱོགས་ཀྱི་ཤུགས་རྐྱེན་ཆུང་དུ་གཏོང་བའི་བྱེད་ཐབས་འཛིན་རིགས་ཀྱི་འགྲོ་གྲོན་རྣམས་ཁྲིམས་འགལ་པ་རང་གིས་གཏང་དགོས།

བཅའ་ཁྲིམས་འདིའི་གཏན་འཁེལ་དང་འགལ་ཏེ་སན་མོན་ཞ་དང་། ཞའོ་ལང་ཏི། དེར་བརྟེན་རྫོང་དང་། ལུའུ་ཧུའེ། ཧོ་ཁོའུ་བཅས་གྲོང་ཚོའི་ཆུ་མཛོད་ཁུལ་དུ་དྲ་སྒམ་དང་། མཐའ་བསྐོར་དྲ་རྒྱའམ་ཆུ་བཀག་དྲ་བ་སྤྱད་དེ་གསོ་སྤེལ་བྱས་ནས་ཆུ་བྱེ་སྙོམས་སྒྲིག་དང་ཆུ་ལོག་འགོག་པར་འགོག་རྐྱེན་བཟོས་པར་རྫོང་ རིམ་པ་ཡན་གྱི་ས་གནས་མི་དམངས་སྲིད་གཞུང་གི་ཞིང་ལས་དང་གྲོང་གསེབ་གཙོ་སྐྱོང་སྡེ་ཁག་གིས་ཁྲིམས་འགལ་གྱི་བྱ་སྤྱོད་སྤེལ་མཚམས་འཇོག་ཏུ་འཇུག་རྒྱུ་དང་། དྲ་སྒམ་དང་དྲ་བའམ་ཆུ་བཀག་དྲ་བ་བཤིག་ཏུ་འཇུག་རྒྱུ་དང་དངུལ་ཆད་སྒོར་ཆིག་འབུམ་མན་ཆད་གཅོད་རྒྱུ། ངན་འབྲས་ཚབས་ཆེན་བཟོས་རིགས་ལ་སྒོར་ཆིག་འབུམ་ཡན་ནས་ས་ཡ་གཅིག་མན་ཆད་བར་གྱི་དངུལ་ཆད་གཅད་རྒྱུ།  

（མུ་འགོད）