གཞན་ལ་བྱིན་པའི་དངོས་པོ་ཕྱིར་བླངས་ཆོག་གམ།

གཞན་ལ་བྱིན་པའི་དངོས་པོ་ཕྱིར་བླངས་ཆོག་གམ།

བློ་མཐུན་རྩོམ་སྒྲིག་པ་ལགས།

ང་ནི་དུས་རྒྱུན་སྡེ་བ་ཚོ་བའི་མི་ལ་རོགས་རམ་བྱ་རྒྱུར་ཤིན་ཏུ་དགའ་བའི་མི་ཞིག་ཡིན་པར་མ་ཟད།ཁྱིམ་མཚེས་གཡས་གཡོན་ལ་མཐུན་སྒྲིལ་བྱ་རྒྱུར་དེ་བས་ཀྱང་དགའ།ན་ནིང་ངའི་ཆུང་སྐྱེས་ཆུང་འགྲོགས་ཀྱི་གྲོགས་པོ་ཞིག་གི་བུ་མོ་གཉེན་བསྒྲིགས་པས།ངས་དེར་ཆེད་དུ་རྟེན་འབྲེལ་ཞུ་བར་རང་ཉིད་ཀྱི་རིན་ཐང་ཆེ་བའི་ལག་གདུབ་ཆ་ཞིག་ཡོད་པ་དེ་ལེགས་སྐྱེས་སུ་བྱིན།ད་ལོར།ངའི་བུ་བློ་སེམས་གཏད་ཆོག་པའི་བུ་མོ་དང་ཞིག་འཕྲད་དེ་ཁྱིམ་ཐབ་བསྒྲིག་རྒྱུ་བྱས་རྗེས།ངས་མནའ་མར་རང་ཉིད་ཀྱི་རྩ་ཆེ་བའི་གསེར་གྱི་སྐེ་རྒྱན་དེ་ལེགས་སྐྱེས་སུ་སྟེར་རྩིས་བྱས་མོད།འོན་ཀྱང་སྐེ་རྒྱན་ཇི་ལྟར་བཙལ་ཡང་མ་རྙེད།དེ་བས་ངས་སྔ་འདང་ཕྱི་འདང་ཇི་ལྟར་བརྒྱབ་རུང་།ན་ནིང་གྲོགས་པོའི་བུ་མོར་ལེགས་སྐྱེས་སུ་བྱིན་པའི་ལག་གདུབ་ཆ་དེར་དྲན་རྟེན་གྱི་དོན་སྙིང་ཆེན་པོ་ལྡན་པར་བསམས་ཏེ།དངོས་པོ་གཞན་ཞིག་དེའི་ཚབ་ཏུ་བྱིན་ནས་ལག་གདུབ་ཆ་དེ་ཕྱིར་ལེན་འདོད་སྐྱེས།ཡིན་ན་ཡང་གྲོགས་པོའི་བུ་མོའང་ལག་གདུབ་ཆ་དེར་ཤིན་ཏུ་དགའ་ཞིང་།ལག་གདུབ་ཆ་དེ་གཡང་རྟེན་ཞིག་གི་ཚུལ་དུ་བཞག་ཡོད་པས།ངས་མོར་ཇི་ལྟར་བཤད་ཀྱང་ལག་གདུབ་ཆ་དེ་ཕྱིར་མ་བྱིན།འདིར་ཁྱེད་བཅའ་ཁྲིམས་བློ་སྟོན་ཁང་ལ་དྲི་རྒྱུ་ཞིག་ཡོད་པ་ནི་གཞན་ལ་བྱིན་པའི་དངོས་པོ་ཕྱིར་བླངས་ཆོག་གམ།

ཞེས་ཚེ་དབང་གིས།

བློ་མཐུན་ཚེ་དབང་ལགས།

རང་རྒྱལ་གྱི《དམངས་དོན་ཁྲིམས་གཞུང》གི་དོན་ཚན658པའི་གཏན་འཁེལ་ལྟར་ན།“ལེགས་སྐྱེས་འབུལ་མཁན་གྱིས་ལེགས་སྐྱེས་སུ་བྱིན་པའི་རྒྱུ་ནོར་གྱི་ཁེ་དབང་སྤོ་སྒྱུར་མ་བྱས་གོང་ལེགས་སྐྱེས་ཕྱིར་འཐེན་བྱས་ཆོག གཞུང་དཔང་བྱས་ཏེ་ལེགས་སྐྱེས་དབུལ་རྒྱུའི་གན་རྒྱའམ་ཁྲིམས་ལྟར་ཕྱིར་འཐེན་བྱས་མི་ཆོག་པའི་མུག་སྐྱོབ་དང་།དབུལ་སྐྱོར།དབང་པོ་སྐྱོན་ཅན་ལ་རོགས་རམ་བྱེད་པ་སོགས་སྤྱི་ཕན་དང་ཀུན་སྤྱོད་ཀྱི་འོས་འགན་བསྒྲུབས་པའི་ངོ་བོ་ལྡན་པའི་ལེགས་སྐྱེས་དབུལ་རྒྱུའི་གན་རྒྱར་གོང་འཁོད་དོན་ཚན་གྱི་གཏན་འཁེལ་མི་སྤྱོད”ཅེས་བཀོད་ཡོད།དེར་བརྟེན།སྤྱིར་བཏང་གི་ལེགས་སྐྱེས་དབུལ་རྒྱུའི་གན་རྒྱ་ལས།ལེགས་སྐྱེས་བྱིན་པའི་རྒྱུ་ནོར་གྱི་ཁེ་དབང་སྤོ་སྒྱུར་མ་བྱས་སྔོན་དུ་ལེགས་སྐྱེས་སྟེར་མཁན་གྱིས་དུས་ནམ་ཡིན་ཡང་ལེགས་སྐྱེས་ཕྱིར་འཐེན་བྱས་ཆོག འདིར་ཡོད་པའི་ཁེ་དབང་སྤོ་སྒྱུར་ལ་ནང་གསེས་སུ།དངོས་རྫས་སྤྲོད་པ་དང་ཁང་པ་སོགས་བརྟན་དངོས་བདག་དབང་གི་འགྲོ་ལུགས་བསྒྲུབ་པ་སོགས་འདུ།ཡང་ཅིག་བཤད་ན།གཞུང་དཔང་མ་བྱས་པའི་ལེགས་སྐྱེས་དབུལ་རྒྱུའི་གན་རྒྱ་དང་སྤྱི་ཕན།ཀུན་སྤྱོད་ཀྱི་འོས་འགན་བསྒྲུབ་པའི་ངོ་བོ་མི་ལྡན་པའི་ལེགས་སྐྱེས་དབུལ་རྒྱུའི་གན་རྒྱ་ལས།དབུལ་བྱའི་དངོས་པོའི་ཁེ་དབང་སྤོ་སྒྱུར་མ་བྱས་སྔོན།ལེགས་སྐྱེས་འབུལ་མཁན་གྱིས་དངོས་རྫས་ཕྱིར་འཐེན་བྱས་ཆོག

གལ་ཏེ་དབུལ་བྱའི་དངོས་པོའི་ཁེ་དབང་སྤོ་སྒྱུར་བྱས་ཟིན་ན།ཕྱིར་འཐེན་བྱ་རུང་མི་རུང་ལ།འདིར《དམངས་དོན་ཁྲིམས་གཞུང》གིས་བྱིན་པའི་དངོས་པོ་ཕྱིར་འཐེན་བྱས་ཆོག་པའི་དམིགས་བསལ་གྱི་གནས་ཚུལ་རིགས་འགའ་གཏན་འཁེལ་བྱས་ཡོད།《དམངས་དོན་ཁྲིམས་གཞུང》གི་དོན་ཚན663པའི་གཏན་འཁེལ་ལྟར་ན།“དང་ལེན་མཁན་ལ་གཤམ་གསལ་གྱི་གནས་ཚུལ་ལས་རིགས་གཅིག་ཡོད་ན།ལེགས་སྐྱེས་འབུལ་མཁན་གྱིས་དངོས་པོ་ཕྱིར་འཐེན་བྱས་ཆོག་སྟེ།（གཅིག） ལེགས་སྐྱེས་འབུལ་མཁན་ནམ་ལེགས་སྐྱེས་འབུལ་མཁན་གྱི་གཉེན་ཉེའི་ཁྲིམས་མཐུན་ཁེ་དབང་ལ་གནོད་འཚེ་ཚབས་ཆེན་བཏང་རིགས།（གཉིས） ལེགས་སྐྱེས་འབུལ་མཁན་ལ་གསོ་སྐྱོང་བྱ་རྒྱུའི་འོས་འགན་ཡོད་ཀྱང་མི་བསྒྲུབ་པ།（གསུམ） ལེགས་སྐྱེས་དབུལ་རྒྱུའི་གན་རྒྱའི་ཁྲོད་ཁ་ཆད་བཞག་པའི་འོས་འགན་མི་བསྒྲུབ་པ་བཅས་ཡིན།ལེགས་སྐྱེས་འབུལ་མཁན་གྱི་ཕྱིར་འཐེན་བྱེད་དབང་དེ་ཕྱིར་འཐེན་བྱ་རྒྱུ་ཤེས་པའམ་ཤེས་དགོས་པའི་ཉིན་ནས་ལོ1གི་ནང་ཚུན་དུ་སྤྱད་རྒྱུ”ཞེས་བཀོད་ཡོད།དོན་ཚན664པའི་གཏན་འཁེལ་ལྟར་ན།“དང་ལེན་མཁན་གྱིས་ཁྲིམས་འགལ་གྱི་བྱ་སྤྱོད་སྤེལ་བའི་རྐྱེན་གྱིས་ལེགས་སྐྱེས་འབུལ་མཁན་ཤི་སྐྱོན་བྱུང་བའམ་དམངས་དོན་བྱ་སྤྱོད་སྤེལ་ནུས་ཤོར་བ་ཡིན་ན།ལེགས་སྐྱེས་འབུལ་མཁན་གྱི་ཤུལ་འཛིན་མཁན་ནམ་ཁྲིམས་བཀོད་ལས་ཚབ་པས་ལེགས་སྐྱེས་ཕྱིར་འཐེན་བྱས་ཆོག”ཅེས་བཀོད་ཡོད།དོན་ཚན666པའི་གཏན་འཁེལ་ལྟར་ན།“ལེགས་སྐྱེས་འབུལ་མཁན་གྱི་དཔལ་འབྱོར་གནས་ཚུལ་ལ་མངོན་གསལ་གྱིས་འགྱུར་ལྡོག་བྱུང་སྟེ།ཐོན་སྐྱེད་ཚོང་གཉེར་རམ་ཁྱིམ་ཚང་གི་འཚོ་བར་ཤུགས་རྐྱེན་ཚབས་ཆེན་ཐེབས་པ་ཡིན་ན།ལེགས་སྐྱེས་དབུལ་རྒྱུའི་འོས་འགན་མ་བསྒྲུབས་ནའང་ཆོག”ཅེས་བཀོད་ཡོད།མདོར་བསྡུས་ན།ལེགས་སྐྱེས་དང་ལེན་མཁན་གྱིས་ལེགས་སྐྱེས་འབུལ་མཁན་གྱི་ཁེ་ཕན་ལ་འཇིགས་བསྐུལ་བའམ་ལེགས་སྐྱེས་འབུལ་མཁན་གྱི་དཔལ་འབྱོར་གནས་ཚུལ་ལ་འགྱུར་ལྡོག་བྱུང་སྟེ་ལེགས་སྐྱེས་དབུལ་རྒྱུའི་འོས་འགན་བསྒྲུབས་མ་ཐུབ་ན།ལེགས་སྐྱེས་འབུལ་མཁན་གྱིས་ལེགས་སྐྱེས་ཕྱིར་འཐེན་བྱས་ཆོག

གོང་གི་གྱོད་དོན་འདིའི་ཁྲོད་དུ།བུ་མོ་དེས་ལེགས་སྐྱེས་འབུལ་མཁན་ཁྱོད་ལ་མི་ལེགས་པའི་དོན་དག་ཅི་ཡང་བསྒྲུབས་མེད་པ་དང་།ཁྱོད་དང་བུ་མོ་གཉིས་བར་གྱི་ལེགས་སྐྱེས་དབུལ་རྒྱུའི་གན་རྒྱ་ཁྲིམས་མཐུན་དང་ནུས་ལྡན་ཡིན་ཞིང་།ཁྱོད་ཀྱི་ལག་གདུབ་ཆ་དེའི་བདག་དབང་བུ་མོ་དེར་ཡོད་པས།གོང་འཁོད་ཀྱི《དམངས་དོན་ཁྲིམས་གཞུང》གི་དོན་ཚན663པ་དང664པ།666པའི་གཏན་འཁེལ་གྱི་གནས་ཚུལ་མེད་སྟབས།ཁྱོད་ཀྱིས་བྱིན་པའི་ལེགས་སྐྱེས་ཕྱིར་འཐེན་བྱས་མི་ཆོག

ཅེས་འདི་གའི་བཅའ་ཁྲིམས་བློ་སྟོན་ཁང་གིས