ཀྲུང་དབྱང་རྩ་འཛུགས་པུའུ་དང་གུང་གཞོན་ཚོགས་པ་ཀྲུང་དབྱང་ཨུ་ཡོན་ལྷན་ཁང་གི་མཚོ་སྔོན་དུ་ཡོང་བའི་སྐོར་ཐེངས་ཉེར་ལྔ་པའི་འབུམ་རམས་པའི་ཞབས་ཞུ་ཚོགས་པའི་དགའ་བསུ་ཚོགས་འདུ་ཟི་ལིང་དུ་འཚོགས།

ཀྲུང་དབྱང་རྩ་འཛུགས་པུའུ་དང་གུང་གཞོན་ཚོགས་པ་ཀྲུང་དབྱང་ཨུ་ཡོན་ལྷན་ཁང་གི་མཚོ་སྔོན་དུ་ཡོང་བའི་སྐོར་ཐེངས་ཉེར་ལྔ་པའི་འབུམ་རམས་པའི་ཞབས་ཞུ་ཚོགས་པའི་དགའ་བསུ་ཚོགས་འདུ་ཟླ1ཚེས16ཉིན་ཟི་ལིང་དུ་འཚོགས།

ད་ལོར། ཀྲུང་དབྱང་རྩ་འཛུགས་པུའུ་དང་གུང་གཞོན་ཚོགས་པ་ཀྲུང་དབྱང་ཨུ་ཡོན་ལྷན་ཁང་གིས་སློབ་གསོ་པུའུ་དང་སྐྱེ་ཁམས་ཁོར་ཡུག་པུའུ་སོགས་རྒྱལ་ཁབ་ཀྱི་པུའུ་དང་ཨུ་ཡོན་ལྷན་ཁང་དང་པེ་ཅིང་། ཧྲང་ཧེ་སོགས་ཤར་རྒྱུད་ཀྱི་ཞིང་ཆེན་དང་གྲོང་ཁྱེར་ནས་མཚོ་སྔོན་ལ་འབུམ་རམས་པ་སོ་གཅིག་འདེམ་མངགས་བྱས་པ་དང་། སྐྱེ་ཁམས་ཁོར་ཡུག་སྲུང་སྐྱོབ་དང་དག་གཙང་ནུས་ཁུངས། ཚྭ་མཚོ་རྫས་འགྱུར་བཟོ་ལས། ལྗང་མདོག་རྩིས་ནུས། སྨན་བཅོས་འཕྲོད་བསྟེན། སློབ་གསོ་ཚན་རྩལ། ཚོང་གཉེར་དོ་དམ་སོགས་ཆེད་ལས་ཁྱབ་ཁོངས་སུ་ཁྱབ་ལ། ཁོ་ཚོ་རང་ཞིང་གི་ཏང་སྲིད་ལས་ཁུངས་དང་གཙོ་གནད་ཁེ་ལས། མཐོ་རིམ་སློབ་གྲྭ། སྨན་བཅོས་ལས་ཁུངས་སོགས་སྡེ་ཁག་ཏུ་སོང་ནས་དུས་ཡུན་ལོ་གཅིག་རིང་གི་ཞབས་ཞུ་སྦྱོང་བརྡར་བྱེད་རྒྱུ་རེད།

མཚོ་སྔོན་དུ་ཡོང་བའི་འབུམ་རམས་པ་ཚོས་མཐའ་གཅིག་ཏུ། མཚོ་སྔོན་དུ་བསྐྱོད་དེ་ཞབས་ཞུ་སྦྱོང་བརྡར་བྱེད་རྒྱུ་ནི་མི་ཚེའི་འཚོལ་སྙེག་ཏང་དང་མི་དམངས་ཀྱི་ལས་དོན་ཁྲོད་འདྲེས་པར་བྱེད་པའི་འགྱོད་མེད་ཀྱི་གདམ་ག་ཡིན་ལ། མྱུར་དུ་མཚོ་སྔོན་ལ་རྒྱུས་ལོན་བྱས་ནས་ཁོར་ཡུག་དང་མཐུན་པར་བྱེད་པ། བྱ་བར་རྒྱུས་ལོན་བྱེད་པ། མཚོ་སྔོན་གྱི་ལས་བྱེད་པ་དང་མང་ཚོགས་དང་བསམ་ཕྱོགས་གཅིག་འདྲ་དང་བྱ་བ་མཉམ་སྒྲུབ་བྱེད་པ། དཀའ་སྡུག་མཉམ་མྱོང་བྱས་ནས། དམིགས་བསལ་གྱི་བརྒྱུད་རིམ་ལ་གཅེས་སྤྲས་བྱེད་པ་དང་། དམིགས་བསལ་གྱི་འབད་འཐབ་བྱེད་པ། དམིགས་བསལ་གྱི་དྲན་གསོ་འཇོག་དགོས་ཟེར། དང་ལེན་སྡེ་ཁག་སོ་སོས། མཚོ་སྔོན་དུ་ཡོང་བའི་འབུམ་རམས་པ་ནི་དེང་རབས་ཅན་གྱི་མཚོ་སྔོན་གསར་བ་འཛུགས་སྐྲུན་བྱེད་པའི་རྩ་ཆེ་བའི་ཐོན་ཁུངས་དང་སྟོབས་ཤུགས་གལ་ཆེན་ཡིན་པས། སྟོབས་ཤུགས་ཡོད་རྒུས་ཞབས་ཞུ་འགན་སྲུང་བྱ་བ་བཟང་བོར་བསྒྲུབ་པ་དང་། ཆབ་སྲིད་སྟེང་རེ་བ་ནན་མོ་འདོན་པ་དང་བྱ་བའི་སྟེང་རྒྱབ་སྐྱོར་ཤུགས་ཆེན་བྱེད་པ། འཚོ་བའི་སྟེང་སེམས་ཁུར་ནན་མོ་བྱེད་པ། དོ་དམ་སྟེང་ཚད་ལྡན་སྒྲིག་ཡོད་བྱས་ནས། ཁོ་ཚོར་མཚོ་སྔོན་དུ་བྱ་བ་བསྒྲུབ་པའི་གར་སྟེགས་བསྐྲུན་པ་དང་ལས་སྐྲུན་གྱི་གོ་སྐབས་འདོན་སྤྲོད་བྱེད་པ། བྱས་རྗེས་བཞག་ན་གཟེངས་བསྟོད་བྱེད་དགོས་ཟེར།

ཞིང་ཆེན་ཏང་ཨུའི་རྩ་འཛུགས་པུའུ་དང་གུང་གཞོན་ཚོགས་པ་མཚོ་སྔོན་ཞིང་ཆེན་ཨུ་ཡོན་ལྷན་ཁང་གིས་ད་དུང་འབུམ་རམས་པའི་ཞབས་ཞུ་ཚོགས་པའི་ཁོངས་མི་ཡོངས་རྩ་འཛུགས་བྱས་ནས་དུས་ཡུན་ཉིན་གསུམ་རིང་གི་འགན་ཁུར་བའི་སྔོན་གྱི་གསོ་སྦྱོང་སྤེལ་བ་དང་། ཆེད་དོན་འཆད་ཁྲིད་དང་ཡུལ་དངོས་ལྟ་ཞིབ། གློག་བརྙན་སློབ་ཁྲིད། ཚན་ཆུང་བགོས་ནས་ཞིབ་སྡུར་བྱེད་པ་སོགས་ཀྱི་རྣམ་པ་བརྒྱུད་དེ། མཚོ་སྔོན་དུ་ཡོང་བའི་འབུམ་རམས་པས་མྱུར་དུ་མཚོ་སྔོན་ལ་རྒྱུས་ལོན་བྱེད་པ་དང་མཚོ་སྔོན་དུ་འདྲེས་པར་རོགས་རམ་བྱེད་རྒྱུ་རེད།