ཞི་ཅིན་ཕིང་གིས་མོ་ན་ཁོའི་མགོ་ཁྲིད་ཨ་ཨར་པེ་སྐུ་ཕྲེང་གཉིས་པར་གློག་འཕྲིན་བཏང་ནས་རྒྱལ་ཁབ་གཉིས་བར་འབྲེལ་བ་བཙུགས་ཏེ་ལོ30འཁོར་བར་རྟེན་འབྲེལ་ཞུས།

ཟླ1པའི་ཚེས16ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་དང་མོ་ན་ཁོའི་མགོ་ཁྲིད་ཨ་ཨར་པེ་སྐུ་ཕྲེང་གཉིས་པ་གཉིས་ཀྱིས་ཕན་ཚུན་བར་གློག་འཕྲིན་བཏང་ནས། རྒྱལ་ཁབ་གཉིས་བར་འབྲེལ་བ་བཙུགས་ནས་ལོ30འཁོར་བར་རྟེན་འབྲེལ་ཞུས།

ཞི་ཅིན་ཕིང་གིས་རྒྱལ་ཁབ་གཉིས་བར་འབྲེལ་བ་བཙུགས་ནས་ལོ30འཁོར་བའི་རིང་ལ། རྒྱལ་ཁབ་གཉིས་ཀའི་འབྲེལ་བ་མགྱོགས་མྱུར་ངང་འཕེལ་རྒྱས་བྱུང་ཡོད། ཕྱོགས་གཉིས་ཀས་ཕན་ཚུན་བར་ལྷག་བསམ་ཟོལ་མེད་དང་འདྲ་མཉམ་གྱི་ལྟ་སྟངས་འཛིན་རྒྱུ་རྒྱུན་འཁྱོངས་བྱས་ཏེ། ཆབ་སྲིད་ཐད་ཀྱི་ཡིད་ཆེས་དང་སྲོལ་རྒྱུན་མཛའ་མཐུན་མུ་མཐུད་ཟབ་སྤེལ་བཏང་བ་དང་། འཕྲིན་གཏོང་དང་ཁོར་ཡུག་སྲུང་སྐྱོབ། ལུས་རྩལ། སྒྱུ་རྩལ་སོགས་ཁྱབ་ཁོངས་ཀྱི་མཉམ་ལས་ལ་ཁྱད་ཆོས་ལྡན་པར་བྱས་ལ། དེ་བསྟུན་གྱི་གྲུབ་འབྲས་ཆེན་པོ་བླངས་ནས། ད་ལྟ་ས་ཁོངས་མི་འདྲ་བ་དང་ལོ་རྒྱུས་རིག་གནས་མི་འདྲ་བ། སྤྱི་ཚོགས་ལམ་ལུགས་མི་འདྲ་བ་བཅས་ཀྱི་རྒྱལ་ཁབ་མཛའ་མཐུན་མཉམ་གནས་དང་ཐུན་མོང་འཕེལ་རྒྱས་ཀྱི་དཔེ་མཚོན་ལྟ་བུར་གྱུར་ཡོད། ངས་རྒྱལ་ཁབ་གཉིས་ཀྱི་འབྲེལ་བ་འཕེལ་རྒྱས་གཏོང་རྒྱུར་མཐོང་ཆེན་གང་ལེགས་བྱས་ནས། ཨ་ཨར་པེ་སྐུ་ཕྲེང་གཉིས་པ་དང་མཉམ་དུ་འབད་བརྩོན་བྱས་ཏེ། རྒྱལ་ཁབ་གཉིས་བར་འབྲེལ་བ་བཙུགས་ནས་ལོ30འཁོར་བ་མགོ་རྩོམ་ས་གསར་པར་བརྩིས་ནས། རྒྱལ་ཁབ་གཉིས་ཀྱི་འབྲེལ་བར་མུ་མཐུད་འཕེལ་རྒྱས་གསར་པ་ཡོང་བར་སྐུལ་འདེད་བཏང་སྟེ། རྒྱལ་ཁབ་གཉིས་ཀའི་མི་དམངས་ལ་སྔར་ལས་ལེགས་པའི་བདེ་སྐྱིད་བསྐྲུན་འདོད་ཡོད་ཅེས་གསུངས།

ཨ་ཨར་པེ་སྐུ་ཕྲེང་གཉིས་པས་ངས་སྐུ་ཞབས་ཀྲུའུ་ཞི་དང་མཉམ་དུ་ཕན་ཚུན་བར་གྱི་ཡིད་ཆེས་ཇེ་བརྟན་དུ་གཏོང་བ་དང་མཉམ་ལས་རྒྱ་སྐྱེད་བཏང་སྟེ། མོ་ན་ཁོ་དང་ཀྲུང་གོའི་འབྲེལ་བར་གྲུབ་འབྲས་སྔར་ལས་གང་མང་ཐོབ་རྒྱུར་སྐུལ་འདེད་བཏང་ནས། རྒྱལ་ཁབ་གཉིས་ཀའི་མི་དམངས་ལ་སྔར་ལས་ལེགས་པའི་བདེ་སྐྱིད་བསྐྲུན་འདོད་ཡོད་ཅེས་བསྟན།