སྡེ་ཚན་བརྒྱད་ཀྱིས་ཡིག་ཆ་བཏོན་ནས་རྩལ་ནུས་ལ་བརྟེན་ནས་ཁེ་ལས་སྟོབས་ཆེར་གཏོང་བར་སྔར་བས་སྐུལ་འདེད་བཏང་བ།

“ས་གནས་ཀྱི་གནས་ཚུལ་དང་བསྟུན་ནས་སྤུས་གསར་ཐོན་སྐྱེད་ནུས་ཤུགས་འཕེལ་རྒྱས་གཏོང་བ་དང་སྲོལ་རྒྱུན་ཐོན་ལས་བསྒྱུར་བཀོད་དང་སྤུས་འདེགས་བྱེད་པ་ཡིས་ཁེ་ལས་ཀྱི་ཤེས་ལྡན་མི་སྣའི་དཔུང་ཁག་གི་བྱང་ཚད་ལ་སྔར་ལས་མཐོ་བའི་བླང་བྱ་གསར་པ་བཏོན་ཡོད”　ཞེས་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་པུའུ་ལས་རིགས་ནུས་པ་འཛུགས་སྐྱོང་སིའི་འགན་འཁུར་བས་ངོ་སྤྲོད་བྱས་པ་དང་།“ང་ཚོས་འབྲེལ་ཡོད་སྡེ་ཚན་དང་མཉམ་དུ་ཁེ་ལས་ཀྱི་རྩལ་ནུས་ཤེས་ལྡན་མི་སྣ་གསོ་སྐྱོང་བྱེད་པའི་གཙོ་གཞི་ནུས་པ་སྐུལ་སྤེལ་དང་ལས་བཟོ་པའི་རྩལ་ནུས་ལ་བརྟེན་ནས་ཤེས་ལྡན་མི་སྣར་འགྱུར་བའི་ཧུར་བརྩོན་རང་བཞིན་དང་རང་འགུལ་རང་བཞིན་ཆེ་རུ་གཏོང་བ་སོགས་ཀྱི་ཐད་ལ་དམིགས་ནས།　བསམ་འཆར་ཞིབ་འཇུག་དང་འཆར་ཟིན་བཀོད་པ་དང་།　གཙོ་གནད་ལས་འགན་ཁག་དགུ་གསལ་བོར་བཟོས་ནས་ཕྱོགས་བཞིའི་ཐོག་ནས་ཁེ་ལས་ཀྱིས་རྩལ་ནུས་ཤེས་ལྡན་མི་སྣ་གསོ་སྐྱོང་བྱེད་པར་ཤུགས་སྣོན་རྒྱག་རྒྱུར་རྒྱབ་སྐྱོར་བྱས་ཡོད”ཟེར།

ཁེ་ལས་ཀྱི་ཧུར་བརྩོན་རང་བཞིན་སྐུལ་སློང་བྱེད་པའི་ཐད།　བསམ་འཆར་ནང་ཁེ་ལས་ཀྱིས་སྣེ་ཁྲིད་ནས་ཐོན་ལས་དང་།　སློབ་ཁྲིད།　གདེང་འཇོག་བཅས་འབྲེལ་མཐུད་དང་མཉམ་འདྲེས་ཀྱི་རྩལ་ནུས་སྐྱེ་ཁམས་འབྲེལ་ཐག་བསྐྲུན་པར་རྒྱབ་སྐྱོར་བྱེད་པ་དང་།　ལས་རིགས་སློབ་གྲྭ་དང་ལས་རིགས་གསོ་སྦྱོང་སྒྲིག་གཞི་འཛུགས་པ།　རྩལ་ནུས་མཐོ་བའི་ཤེས་ལྡན་མི་སྣའི་གསོ་སྦྱོང་རྟེན་གཞི་དང་།　རྩལ་ནུས་དངོས་སྦྱོང་རྟེན་གཞི།　ཐོན་ལས་སློབ་གླིང་སོགས་འཛུགས་སྐྲུན་བཅས་བྱེད་དགོས་པར་བསྟན་ཡོད།

ཁེ་ལས་གསོ་སྐྱོང་གདེང་འཇོག་ལ་རྒྱབ་སྐྱོར་བྱེད་པའི་ཐད།　བསམ་འཆར་ནང་ཁེ་ལས་ཀྱི་དགེ་ཕྲུག་ལམ་ལུགས་གསར་པ་གསོ་སྦྱོང་དང“ལས་གནས་དགོས་མཁོ＋རྩལ་ནུས་གསོ་སྦྱོང＋ལས་ཞུགས་ཞབས་ཞུའི”རྣམ་གྲངས་ཅན་དང་མངོན་གསལ་ཅན་གྱི་གསོ་སྦྱོང་བྱེད་སྟངས་ཁྱབ་གདལ་ཤུགས་ཆེན་བཏང་ནས།　ཁེ་ལས་ཀྱི་གྲངས་འཛིན་ཤེས་ལྡན་མི་སྣ་གསོ་སྐྱོང་ལ་རྒྱབ་སྐྱོར་བྱེད་པ་དང་།　ཁེ་ལས་ཀྱིས་རང་བདག་གིས་ལས་རིགས་རྩལ་ནུས་རིམ་པའི་གདེང་འཇོག་བྱེད་པར་རྒྱབ་སྐྱོར་བྱས་ནས།　ལས་རིགས་རྩལ་ནུས་རིམ་པའི་ལག་ཁྱེར་སྤྲོད་དགོས་པར་གསལ་བོར་བསྟན་ཡོད།

ཁེ་ལས་ཀྱི་རྩལ་ནུས་ཤེས་ལྡན་མི་སྣའི་ཐོབ་ཐང་མཐོ་རུ་གཏོང་བའི་ཐད།　བསམ་འཆར་ནང་ཁེ་ལས་ལ་ལས་རིགས་རྩལ་ནུས་རིམ་པ་དེ་གླ་ཕོགས་བགོ་བཤའི་དཔྱད་གཞི་གལ་ཆེན་ཞིག་ཏུ་བརྩིས་ནས།　གླ་ཕོགས་བགོ་བཤའ་རྒྱག་རྒྱུ་དེ་འགག་རྩའི་ལས་གནས་དང་།　ཐོན་སྐྱེད་ཡུལ་དངོས།　འཕྲལ་མཁོའི་རྩལ་ནུས་ཤེས་ལྡན་མི་སྣའི་ཕྱོགས་སུ་དམིགས་པར་སྐུལ་འདེད་གཏོང་བ་དང་།　སྲིད་གཞུང་གི་དམིགས་བསལ་ཕོགས་སྣོན་དང་།　རྒྱལ་ཡོངས་ཀྱི་ངལ་རྩོལ་དཔེ་བཟང་དང་སྔོན་ཐོན་ལས་དོན་པ་སོགས་ཀྱི་དཔྱད་འདེམས་དང་གཟི་བརྗིད་བསྩོལ་བ་དེ་ཁེ་ལས་ཀྱི་འཐབ་ཕྱོགས་དང་པོའི་རྩལ་ནུས་མཐོ་བའི་ཤེས་ལྡན་མི་སྣར་གཟིགས་སྐྱོང་བྱ་དགོས་པར་བསྟན་ཡོད།

རྩ་འཛུགས་འགན་སྲུང་ཐད།　བསམ་འཆར་ནང་ཁེ་ལས་ཀྱི་ལས་བཟོ་པའི་སློབ་གསོའི་གྲོན་དངུལ་དང་།　ལས་ཞུགས་ཁ་གསབ་མ་དངུལ།　ལས་ཤོར་འགན་བཅོལ་ཐེབས་རྩ།　ཐོན་ལས་ཁྲིད་སྟོན་ཐེབས་རྩ།　ལས་བཟོ་མི་སྒེར་གྱི་གྲོན་དངུལ་སོགས་ཐབས་ལམ་སྣ་ཚོགས་བརྒྱུད་དེ་མ་དངུལ་གཏོང་ཤུགས་ཆེ་རུ་གཏོང་དགོས་པའི་བླང་བྱ་བཏོན་ཡོད།