ཐུན་ཏེ་རྫོང་རིག་གནས་ཁང་གིས2024ལོའི་ལས་དོན་དཔྱད་ཞིབ་བྱ་བ་སྤེལ།

འཁྲབ་སྟོན་པའི་ཆེད་ལས་བྱང་ཚད་དང་ལས་སྒོའི་ནུས་པ་སྔར་བས་ཆེ་རུ་གཏོང་བ་དང་རིག་རྩལ་འཁྲབ་སྟོན་སྤུས་ཚད་མཐོར་འདེགས་སུ་གཏོང་བར་འགན་ལེན་བྱ་ཆེད། ཉེ་སྔོན། ཐུན་ཏེ་རྫོང་རིག་གནས་ཁང་གིས2024ལོའི་འདས་སོང་ལ་དཔྱད་ཞིབ་དང་འབྱུང་འགྱུར་གསལ་སྟོན་བྱེད་པའི་ལས་སྒོའི་དཔྱད་ཞིབ་བྱ་བ་སྤེལ་ཞིང་།  ཐེངས་འདིའི་དཔྱད་ཞིབ་ཀྱི་དམིགས་ཡུལ་ནི་འཁྲབ་སྟོན་པའི་ཆེད་ལས་རྩལ་ནུས་དང་སྒྱུ་རྩལ་གྱི་མཚོན་ནུས། ཚོགས་པའི་མཉམ་ལས་ནུས་པ་བཅས་ལ་ཕྱོགས་ཡོངས་ནས་དཔྱད་ཞིབ་བྱས་ཏེ། རྗེས་ཕྱོགས་ཀྱི་རིག་རྩལ་གསར་རྩོམ་དང་འཁྲབ་སྟོན་ལ་རྨང་གཞི་བརྟན་པོ་ཞིག་འདིང་རྒྱུ་དེ་རེད།

ཐེངས་འདིའི་དཔྱད་ཞིབ་ཁྲོད་གླུ་ལེན་པ་དང་ཞབས་བྲོ་འཁྲབ་པ། སྒྱུ་རྩལ་གྱི་རྨང་གཞིའི་རྩལ་ནུས་འཁྲབ་སྟོན་བྱེད་པ་སོགས་ནང་དོན་གཙོ་བོར་བཟུང་ནས། འཁྲབ་སྟོན་པའི་ཉིན་རྒྱུན་དོ་དམ་དང་རྒྱུན་རྣམ་རང་བཞིན་གྱི་འཁྲབ་སྟོན་སྒྲིག་སྲོལ་དང་ཟུང་འབྲེལ་སྒོས་ཕྱོགས་ཡོངས་ནས་དཔྱད་ཞིབ་བྱས་ཤིང་། ཡུལ་དངོས་སུ་འཁྲབ་སྟོན་བྱེད་པའི་བྱེད་ཐབས་བརྒྱུད། དཔྱད་ཞིབ་ཀྱི་དྲང་བདེན་རང་བཞིན་དང་ཕྱོགས་ཡོངས་རང་བཞིན་ལ་འགན་སྲུང་བྱས། འཁྲབ་སྟོན་པ་རྣམས་ཀྱིས་ཕུན་སུམ་ཚོགས་ལ་རྣམ་པ་སྣ་མང་གི་འཁྲབ་སྟོན་ལེ་ཚན་གྲ་སྒྲིག་བྱས་ཏེ། རིག་གནས་ཁང་གི་འཁྲབ་སྟོན་མི་སྣའི་སྒྱུ་རྩལ་གྱི་སྣ་མང་རང་བཞིན་དང་གསར་རྩོམ་ནུས་པ་མངོན་པར་བྱས། དཔྱད་ཞིབ་ཁྲོད་འཁྲབ་སྟོན་པའི་གཟབ་ནན་གྱི་ཆེད་ལས་རྨང་གཞི་དང་ཕུལ་དུ་བྱུང་བའི་གར་སྟེགས་ཀྱི་མངོན་ནུས་ལ་དཔྱད་འདེམས་པས་ཚད་མཐོའི་དཔྱད་འཇོག་གནང་། ཐུན་མོང་གི་འཁྲབ་སྟོན་རྣམ་པས་འཁྲབ་སྟོན་པ་རྣམས་ཀྱི་མཐུན་སྦྱོར་གཞོགས་འདེགས་ཀྱི་བསམ་བློ་མངོན་པར་བྱས་ཤིང་། གནད་འཁེལ་གྱི་ཉམས་འགྲོས་དང་ཁོང་དུ་ཆུད་པའི་སྟངས་སྟབས་ཀྱིས་ཕུན་སུམ་ཚོགས་པའི་གར་སྟེགས་བརྩམས་ཆོས་ཕྱིར་མངོན།

ཐེངས་འདིའི་ལས་དོན་དཔྱད་ཞིབ་ཀྱིས་འཁྲབ་སྟོན་པ་རྣམས་ཀྱི་ལས་དོན་རྩལ་ནུས་ཕྱིར་མངོན་པ་ཙམ་མ་ཡིན་པར། ཁོ་ཚོའི་འབད་འཐབ་དང་རང་ཉིད་ཀྱི་ལས་སྒོའི་ནུས་པ་མཐོར་འདེགས་སུ་གཏོང་བའི་བསམ་བློ་ཡང་མངོན་པར་བྱས་ཡོད། ལས་རིམ་རྗེས་མར་རྫོང་རིག་གནས་ཁང་གིས་ཐེངས་འདིའི་དཔྱད་ཞིབ་ལས་དོན་གོ་སྐབས་སུ་བརྩིས་ནས་སྤྱི་ཡོངས་ལ་ཞབས་ཞུ་དང་རིག་གནས་ཀྱི་རང་རྟོགས་མཐོར་འདེགས་སུ་གཏོང་བ། རིག་གནས་ཀྱི་ཆོད་སེམས་ཇེ་བརྟན་དུ་གཏོང་བ་བཅས་བྱས་ཏེ། འཇོན་མིའི་དཔུང་ཁག་འཛུགས་སྐྱོང་ལ་ཤུགས་སྣོན་དང་། སྲོལ་རྒྱུན་རིག་གནས་སྲུང་སྐྱོང་དང་རྒྱུན་འཛིན་ལ་སྐུལ་འདེད་གཏོང་རྒྱུ་རེད།

རྫོང་ཨུའི་རྒྱུན་ཨུའམ་དྲིལ་སྒྲོག་པུའུ་ཡི་པུའུ་ཀྲང་ཀྲའོ་ཐུང་དབྱིན་དང་རྫོང་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་གཞོན་པ་རྫ་བློ། རྫོང་སྲིད་གྲོས་ཀྱི་ཀྲུའུ་ཞི་གཞོན་པ་སི་ཅིན་ཕེན། རྫོང་མི་དམངས་ཞིབ་དཔྱོད་ཁང་གི་ཞིབ་དཔྱོད་མགོ་གཙོ་འབྲུག་ལོ་ཐར་བཅས་ཐེངས་འདིའི་ལས་དོན་དཔྱད་ཞིབ་བྱ་བར་ཞུགས།