ལྷ་ས་གྲོང་ཁྱེར་གྱི་2025ལོའི་ལོ་གསར་མཁོ་ཆས་ཁྲོམ་ར་འཁྲུག་ཆ་དོད་པ།

ལྷ་ས་གྲོང་ཁྱེར་གྱི་2025ལོའི་ལོ་གསར་མཁོ་ཆས་ཁྲོམ་ར་འཁྲུག་ཆ་དོད་པ།

• ཕྱེ་མར་གྱི་འབོ་ཆེ་ཆུང་སྣ་ཚོགས་ཡིན་པ།

• ཤིང་གིས་བཟོས་པའི་རྩེ་སྒྲོ་ཡིན་པ།

• བཟོ་ལྟ་མི་གཅིག་པའི་ཤིང་ཕོར་སྒྲིག་གཤོམ་བྱས་ཡོད་པ།

• ལོ་གསར་གྱི་གཟབ་སྤྲོས་ཡིན་པ།

• གྲོང་མི་ཞིག་གིས་དཔྱིད་གསར་དུས་ཆེན་གྱི་ཆ་ཡིག་ཉོ་བཞིན་པ།

• གྲོང་མི་ཞིག་གིས་བར་སྐོར་ཚོང་ར་ནས་ལོ་གསར་མཁོ་ཆས་ཉོ་བཞིན་པ།

• གྲོང་མི་ཞིག་གིས་ཟངས་སྣོད་ཀྱི་སྒྲིག་ཆས་ཉོ་བཞིན་པ།

• ལྷ་ས་དགེ་འོས་མཐོ་རིམ་ཆེད་ཚན་སློབ་གྲྭའི་སློབ་མ་བཀྲ་ཤིས་ལྷ་མོས་སློབ་ཞོར་ལ་བསགས་པའི་ལག་དངུལ་གྱིས་ལོ་གསར་གྱི་མཁོ་ཆས་ཉོ་བཞིན་པ།

  2025ལོའི་ལུགས་རྙིང་གི་དཔྱིད་གསར་དུས་ཆེན་དང་བོད་ཀྱི་ལོ་གསར་འཆར་ལ་ཉེ་བའི་སྐབས་སུ། རྒྱ་ཆེའི་གྲོང་མིའི་ལོ་གསར་གྱི་མཁོ་ཆས་ཉོ་བའི་སྤྲོ་སྣང་ཇེ་ཆེར་འཕེལ་ཏེ་ལོ་གཅིག་དུས་གཅིག་གི་ལོ་གསར་མཁོ་ཆས་ཉོ་ཚོང་ཁྲོམ་ར་རིམ་བཞིན་འཁྲུག་ཆ་དོད་དུ་སོང་ཡོད།

  བར་སྐོར་ཚོང་རར་སྐྱོད་སྐབས། ཚོང་ཟོག་གི་རིན་གོང་འདྲི་བ་དང་། ཐོན་རྫས་ངོ་སྤྲོད་བྱེད་པ། རིན་གོང་གཅོག་པ་སོགས་ཀྱི་སྐད་སྒྲ་རྣ་བར་ཡང་ཡང་ཐོས་རྒྱུ་ཡོད། གྲོང་མི་ཁྲོམ་བཀྱག་མདུན་དུ་འོང་འཕྲལ་རིན་གོང་མ་དྲིས་ཀྱང་ཚོང་པས་སེམས་རྩ་འཁོལ་པོས་རང་ཉིད་ཀྱི་ཚོང་ཟོག་བྲིན་ཐབས་བྱེད་ཀྱི་ཡོད།

  ལོ་གསར་གྱི་མཁོ་ཆས་ཉོ་རིང་། གྲོང་མིར་བདེ་འཇགས་དང་འཆམ་མཐུན་གྱི་ཉོ་སྒྲུབ་ཁོར་ཡུག་ཅིག་གཏོད་ཆེད། ལྷ་ས་གྲོང་ཁྱེར་མ་འཇོག་རྒྱུ་ནོར་ལས་གཉེར་དོ་དམ་ཚད་ཡོད་ཀུང་སིའི་འགན་འཁུར་བ་བྱམས་པས། “ལོ་གསར་གྱི་མཁོ་ཆས་ཉོ་རིང་ཕར་འགྲོ་ཚུར་འོང་གི་མི་ཚོགས་ཆེས་ཆེར་འཕར་བས། ང་ཚོས་སྔོན་ནས་མེ་གསོད་བགྲོད་ལམ་བཟུང་བའི་ཚོང་གཉེར་བྱེད་མཁན་གཙང་སེལ་བྱས་ནས། ལོ་གསར་གྱི་མཁོ་ཆས་ཉོ་རིང་གྲོང་མིར་བག་ཕེབས་དང་སྤྲོ་སྣང་ལྡན་པའི་ཉོ་སྒྲུབ་ཀྱི་ཁོར་ཡུག་ཅིག་བཏོད་ཡོད། ལོ་གསར་གྱི་མཁོ་ཆས་ཁྲོམ་ར་དེ་བྱི་རིལ་དང་ཤིང་འབྲས་སྐམ་པོ། ལོ་ཕུད་དང་གྲོ་དང་སྙེ་མ། སྡེར་ཁ་དང་རྩེ་སྒྲོ ལུག་མགོ་དང་ལོ་གསར་ཆ་ཡིག་བཅས་འཚོང་ཡུལ་བཞི་བཟོས་ཡོད”ཅེས་ངོ་སྤྲོད་བྱས།

  ལྷ་ས་གྲོང་ཁྱེར་རྔ་ཆེན་ཕྱོགས་བསྡུས་སྡེབ་ཚོང་ཁྲོམ་རར་ཚགས་ཤ་དང་། ལུག་ཤ། ཤ་སྐམ་པོ་ཉོ་མཁན་གྱི་གྲོང་མིས་ཁེངས་ཤིང་། 2024ལོའི་འདམ་གཞུང་རྫོང་གི་དགུན་དུས་ཚགས་ཤ་དང་ལུག་ཤ་བྲིན་ཚོང་ས་ཚིགས་ཀྱི་ཁྲོམ་བཀྱག་ཨང་067གྱི་ཚོང་པ་འཕྲིན་ལས་ཆོས་རྒྱལ་གྱིས“སྲིད་གཞུང་གིས་གཟིགས་སྐྱོང་བྱེད་སྒོ་སྤེལ་བར་བརྟེན་དེ་རིང་ཚོང་ཧ་ཅང་ཡག་པོ་འདུག ཉིན་དང་པོར་ཚགས་ཤ་སྨད་བཞི་ལིང་39དང་། ཚགས་ཤ་རྒྱ་མ་2000ལྷག་ཙམ་བྲིན་སོང”ཞེས་དགའ་སྤྲོའི་ངང་བཤད།

  ལོ་གསར་མཁོ་ཆས་ཉོ་བ་ནི། ལོ་གསར་བསུ་བའི་གྲ་སྒྲིག་ཅིག་ཡིན་ལ། སྲོལ་རྒྱུན་རིག་གནས་རྒྱུན་འཛིན་བྱས་པ་ཞིག་ཀྱང་ཡིན། ཚང་མས་ལོ་གསར་གྱི་མཁོ་ཆས་ཉོ་རིང་གོམ་པའི་འདེགས་འཇོག་དལ་དུ་བཏང་ནས་དུས་ཆེན་འཆར་ཁའི་དྲོ་སྐྱིད་དང་སྐྱིད་སྣང་དེ་སེམས་ཁོང་ལ་མྱོང་རོལ་བྱེད་བཞིན་ཡོད།