ནང་ཆེན་རྫོང་གིས་རིག་གནས་ཡུལ་སྐོར་འཕེལ་རྒྱས་ཐད་ཀྱི་སྤུས་འདེགས་ནུས་སྤེལ་མངོན་འགྱུར་བྱས་ནས་ཡུལ་སྐོར་ཡོང་སྒོ་སྒོར་བྱེ་བ་དགུ་དང་ས་ཡ་བཞི་འབུམ་ལྔ་ཁྲི་བརྒྱད་ལ་སླེབས།

ཟླ12པའི་ཚེས16ཉིན། གསར་འགོད་པས་ཡུས་ཧྲུའུ་བོད་རིགས་རང་སྐྱོང་ཁུལ་ནང་ཆེན་རྫོང་རིག་གནས་ལས་རྩལ་དང་ཡུལ་སྐོར་རྒྱང་སྒྲོགབརྙན་འཕྲིན་ནས་རྒྱུས་ལོན་བྱུང་བ་ལྟར་ན། 2024ལོར། ནང་ཆེན་རྫོང་གིས་ལྷོ་འདྲེས་བྱང་མཐུད་ཀྱི་ས་ཚིགས་དང་པོ་དང་། མཚོ་སྔོན་དང་བོད་ལྗོངས་ལ་འབྲེལ་འདྲིས་བྱེད་གནས་བྱེད་རྒྱུ་དེ་འཕེལ་རྒྱས་ཀྱི་དམིགས་ཡུལ་དུ་བྱས་ནས། སྐྱེ་ཁམས་རྫོང་འཛུགས་དང་རིག་གནས་ཡུལ་སྐོར་ལ་བརྟེན་ནས་རྫོང་འཕེལ་རྒྱས་སུ་གཏོང་བའི་འཐབ་ཇུས་ཇེ་ཟབ་ཏུ་བཏང་བ་དང་། སྐྱེ་ཁམས་རིག་གནས་ཡུལ་སྐོར་ཐོན་ལས་སྤུས་ཚད་མཐོ་བའི་ངང་འཕེལ་རྒྱས་སུ་གཏོང་བར་སྐུལ་འདེད་བཏང་། མིག་སྔའི་བར་དུ། བསྡོམས་པས་ཡུལ་སྐོར་པ་འབུམ་གཅིག་དང་ཁྲི་བདུན་སྟོང་བརྒྱད་སྣེ་ལེན་བྱས་པ་དང་། ཡུལ་སྐོར་ཡོང་སྒོ་སྒོར་བྱེ་བ་དགུ་དང་ས་ཡ་བཞི་འབུམ་ལྔ་ཁྲི་བརྒྱད་ལ་སླེབས།

ནང་ཆེན་རྫོང་ཏང་ཨུ་དང་རྫོང་སྲིད་གཞུང་གིས་ནང་ཆེན་རྫོང་གི་རིག་གནས་ཡུལ་སྐོར་ལས་རིགས་སྤུས་ཚད་མཐོ་བའི་ངང་འཕེལ་རྒྱས་སུ་གཏོང་བ་དང་། སྤུས་ལེགས་ཡུལ་སྐོར་ལམ་ཐིག་རིམ་སྤོར་བསྒྱུར་བཀོད་ལས་གཞི་འཛུགས་སྐྲུན་བྱེད་པའི་བྱ་བའི་དབྱེ་འབྱེད་ཇུས་གཞི་གཏན་འབེབས་བྱས་ནས་པར་འགྲེམ་བྱས་པ་དང་། རྫོང་རིམ་པའི་འགོ་ཁྲིད་ལས་བྱེད་པ་བཅོ་ལྔས་འགོ་ཁྲིད་མཐུན་སྦྱོར་བྱེད་པའི་བྱ་བའི་ཚན་ཁག་ཉེར་དྲུག་བཙུགས་ལ། བསྡོམས་པས་མ་དངུལ་སྒོར་བྱེ་བ་བརྒྱད་དང་ས་ཡ་གཅིག་འབུམ་དྲུག་ཁྲི་བརྒྱད་བཏང་ནས། རྫ་ཆུའི་དྲ་དབྱིབས་ཆུ་རྒྱུད་ལྟ་ལྗོངས་སྟེགས་བུ་དང་རྒྱལ་ལམ214ལམ་རྒྱུད་ཀྱི་སྤུས་ལེགས་ཡུལ་སྐོར་ལམ་ཐིག་གི་ལྗང་མདོག་བར་ཁྱམས་དང་ཁོར་ཡུག་ཕྱོགས་བསྡུས་བཅོས་སྐྱོང་སོགས་ཀྱི་ཡུལ་སྐོར་རྩོལ་ནུས་ཚད་འདེགས་རིམ་སྤོར་ལས་གཞི་ཉི་ཤུ་ལག་བསྟར་བྱས་པ་དང་། རང་བྱུང་ལྟ་ཞིབ་དང་ཞིབ་སློབ་ཉམས་ལེན། རང་འཁོར་ཡུལ་སྐོར་སོགས་ཁྱད་ཆོས་ལྡན་པའི་སྐྱེ་ཁམས་ཡུལ་སྐོར་འཕེལ་རྒྱས་སུ་བཏང་། དེ་དང་མཉམ་དུ། ཁྱད་ལྡན་དམངས་སྲོལ་མགྲོན་ཁང་གསུམ་དང་ཁྱད་ལྡན་ཟ་ཁང་གཉིས། སྐར་གསུམ་རིམ་པའི་གསོལ་མགྲོན་ཁང་གཅིག ཆུ་ཚན་ཁམས་གསོ་ལྟེ་གནས་གཅིག་བཅས་འཛུགས་སྐྲུན་བྱེད་པར་རྒྱབ་སྐྱོར་བྱས་པ་དང་། ཁུལ་ཡོངས་ཀྱི་ཁེ་ལས་དང་མང་ཚོགས་ལ་ཕན་པའི་བྱེད་ཐབས་ལྔ་བཅུའི་རོགས་སྐྱོར་བྱེད་ཡུལ་ཉིས་བརྒྱ་དང་གཅིག་ཡིག་ཐོག་སྙན་ཞུ་བྱས་ནས། རོགས་སྐྱོར་བྱེད་ཡུལ་དོན་བདུན་ལ་དཔྱད་ཞིབ་བྱས་ནས་གྲོས་འཆམ་བྱུང་།

རིགས་མི་འདྲ་བའི་ཕྱི་ཕྱོགས་དྲིལ་སྒྲོག་བརྗེ་རེས་བྱ་འགུལ་སྣ་ཚོགས་སྤེལ་བ་དང་། ནང་ཆེན་གྱི་རིག་གནས་ཡུལ་སྐོར་ཚོང་རྟགས་ཧུར་ཐག་གིས་གསར་སྐྲུན་བྱས་ཏེ། རྨ་འབྲི་རྫ་གསུམ་གྱི་འབྱུང་ཡུལ་ཡུས་ཧྲུའུ། གསང་ཡུལ་ནང་ཆེན་གྱི་སྙན་གྲགས་རྒྱུན་མ་ཆད་པར་ཇེ་ཆེར་བཏང་། ནང་ཆེན་རྫོང་གི་རྒྱལ་ཁར་རིམ་པའི་བོད་རིག་གནས་ཀྱི་ཡུས་ཧྲུའུ་སྐྱེ་ཁམས་སྲུང་སྐྱོབ་ཚོད་ལྟ་ཁུལ་གྱི་གཟུགས་འདས་རིག་གནས་དྲིལ་སྒྲོག་འགྲེམ་སྟོན་བྱ་འགུལ་དང་གཟུགས་འདས་རིག་གནས་ལས་གཞིའི་རྒྱུན་འཛིན་པར་བྱང་བུ་སྟེར་བུ་མཛད་སྒོ་རྒྱལ་ཁའི་ངང་བསྡུས་པ་དང་། ད་ལོར་རྫོང་རིམ་པའི་གཟུགས་འདས་ཤུལ་བཞག་རིག་གནས་ཀྱི་མིང་ཐོ་སོ་ལྔར་ཆོག་མཆན་བཀོད་དེ་ཁྱབ་བསྒྲགས་བྱས། མིག་སྔའི་བར་དུ། ནང་ཆེན་རྫོང་དུ་རྒྱལ་ཁར་རིམ་པའི་བོད་རིག་གནས་ཡུས་ཧྲུའུ་སྐྱེ་ཁམས་སྲུང་སྐྱོབ་ཚོད་ལྟ་ཁུལ་གྱི་སྒྲོམ་གཞིའི་འོག རྒྱལ་ཁབ་རིམ་པའི་སྲུང་སྐྱོབ་ལས་གཞི་གཉིས་ཡོད་པ་དང་། ཞིང་ཆེན་རིམ་པའི་སྲུང་སྐྱོབ་ལས་གཞི་བཅུ་བཞི་ཡོད་ལ། ཁུལ་རིམ་པའི་སྲུང་སྐྱོབ་ལས་གཞི་ཞེ་བདུན་དང་། རྫོང་རིམ་པའི་སྲུང་སྐྱོབ་ལས་གཞི་བརྒྱ་དང་ཞེ་དྲུག་ཡོད།