བོད་ལྗོངས་ཀྱི་ཆ་འཕྲིན་འཕྲིན་གཏོང་ལས་རིགས་ཀྱི་ལས་དོན་ཁག་ལ་གྲུབ་འབྲས་མངོན་གསལ་དོད་པོ་ཐོབ་པ།

བོད་ལྗོངས་ཀྱི་ཆ་འཕྲིན་འཕྲིན་གཏོང་ལས་རིགས་ཀྱི་ལས་དོན་ཁག་ལ་གྲུབ་འབྲས་མངོན་གསལ་དོད་པོ་ཐོབ་པ།

ཟླ12པའི་ཚེས17ཉིན་གསར་འགོད་པས་བོད་རང་སྐྱོང་ལྗོངས་མི་དམངས་སྲིད་གཞུང་གསར་འགྱུར་གཞུང་དོན་ཁང་གིས་འཚོགས་པའི་གསར་འགྱུར་ཡོངས་བསྒྲགས་ཚོགས་འདུའི་ཐོག་ནས་ཤེས་རྟོགས་བྱུང་བ་ལྟར་ན། ད་ལོ་ནས་བཟུང་ལྗོངས་ཡོངས་ཀྱི་ཀྲའོ་སྟོང་གི་འོད་སྐུད་དྲ་རྒྱ་དེ་དུད་ཚང་ཁྲི་75ལ་ཁྱབ་པའི་ནུས་པ་ལྡན་པ་དང་། 10G-PONདང་དེ་བཞིན་དེ་ཡན་གྱི་མཐུད་སྣེ་ཁྲི7.94ཟིན་ཡོད། 5Gསྦྲེལ་ཚུགས7035གསར་འཕར་བྱུང་བ་དང་། རིམ་རྩིས་བྱས་ན་ཁྲི1.7ལྷག་བསྐྲུན་ཡོད་ལ། སྲིད་འཛིན་གྲོང་ཚོ70%ལ5Gདྲ་རྒྱ་ཤར་གཏོང་ཐུབ་ནས། 5Gལྟེ་བའི་དྲ་རྒྱའི་གཞན་འབྲེལ་དྲ་ཚུགས་ཀྱི་ཚོང་སྤྱོད་ཁྱབ་གདལ་ལས་དོན་གོ་རིམ་ལྡན་པའི་ངང་སྤེལ་ཡོད།

གློག་འཕྲིན་ཁྲོམ་རའི་གཙོ་གནད་ཁྱབ་ཁོངས་ཀྱི་ཚུལ་མིན་འགྲན་རྩོད་བྱ་སྤྱོད་ལ་ལྟ་སྐུལ་ཞིབ་བཤེར་དང་ཁྲིམས་འཛིན་བྱེད་ཤུགས་ཆེ་རུ་གཏོང་བ་དང་། འབྱུང་རྩ་ནས་བཅོས་སྒྲིག་དང་གནོན་ཤུགས་བརྒྱུད་འདྲེན་ལ་སྐུལ་འདེད་གཏོང་བ། ཁ་གསལ་བློ་བདེའི་འཛད་སྤྱོད་ཞབས་ཞུའི་ཁོར་ཡུག་གཏོད་པ་བཅས་བྱ་ཆེད། བོད་རང་སྐྱོང་ལྗོངས་འཕྲིན་གཏོང་དོ་དམ་ཅུའུ་ཡིས་སྡེ་ཚན་ལས་བརྒལ་བའི་ཆ་འཕྲིན་སྤེལ་རེས་དང་ལྟ་སྐུལ་དོ་དམ་མཐུན་སྦྱོར་བྱ་ཤུགས་ཆེ་རུ་གཏོང་བ་དང་། གློག་འཕྲིན་ཁྲོམ་རའི་སྒྲིག་འགལ་བྱ་སྤྱོད་ལ་ལྟ་སྐུལ་དོ་དམ་དང་ཐག་གཅོད་བྱེད་པ། གློག་འཕྲིན་སྦྲག་གྲོན་གྱི་ཐོ་འགོད་དོ་དམ་ལ་ཤུགས་སྣོན་བརྒྱབ་ཡོད། ད་ལོའི་ཚུན་དུ་སྤྱོད་མཁན་གྱི་ཞུ་གཏུག་ཁག1416འབྱོར་ནས་ཐག་གཅོད་ལས་སྒྲུབ་བྱེད་ཚད100%ཟིན་ཡོད།

དེ་དང་ཆབས་ཅིག་བོད་རང་སྐྱོང་ལྗོངས་འཕྲིན་གཏོང་དོ་དམ་ཅུའུ་ཡིས“ཐོ་འགོད་མ་བྱས་པའིAPPསྒོ་རྒྱག་པའི”སྤྱི་བསྒྲགས་ཁྱབ་བསྒྲགས་བྱས་ཏེ། ཁོངས་གཏོགས་ཁུལ་གྱི་གསོག་གྲངསAPPཡི་གྲངས་འབོར་ཞིབ་དཔྱད་བྱེད་པ་དང་། ཞབས་ཞུའི་ཁེ་ལས་ལ་དྲ་རྒྱ་འབྲེལ་མཐུད་བྱེད་པའིAPP/བྱ་རིམ་ཆུང་གྲས་ཀྱི་ཐོ་འགོད་བྱེད་པར་ལྟ་སྐུལ་བྱས་ནས། གསོག་གྲངསAPPཡི་ཐོ་འགོད་སྙན་སེང་གི་འགུལ་རྣམ་རིམ་བཞིན་མེད་པར་བཟོ་རྒྱུ་རེད། ཟླ་རེརICPཡི་ཐོ་འགོད་སྙན་སེང་གཙོ་གཞི་ཆ་འཕྲིན་ཡང་དག་ཡོང་ཚད་ལ་ཚོད་སྐོར་བྱེད་པ་དང་། སྟོང་ལྐོག་རིགས་ཀྱི་ཐོ་འགོད་སྙན་སེང་གི་གྲངས་གཞི་གཙང་བཤེར་བྱས་པས། ལྗོངས་ཡོངས་ཀྱི་དྲ་ཚིགས་ཐོ་འགོད་སྙན་སེང་བྱེད་ཚད100%དང་། གཙོ་གཞི་ཡང་དག་ཡོང་ཚད99.7%། ཁོངས་མིང་ཡང་དག་ཡོང་ཚད100%། དྲ་ཚུགས་ཀྱི་ལུགས་མཐུན་ཡོང་ཚད99.96%། དྲ་ཚུགས་ཀྱི་ཐོ་འགོད་སྙན་སེང་ཨང་རྟགས་ཡང་དག་ཡོང་ཚད99.82%བཅས་ཟིན་ཡོད།

གཞན་ཡང་བོད་རང་སྐྱོང་ལྗོངས་འཕྲིན་གཏོང་དོ་དམ་ཅུའུ་ཡིས་ད་དུང་ཆ་འཕྲིན་འཕྲིན་གཏོང་ལས་རིགས་ཀྱི“གྲངས་གཞི་བདེ་འཇགས་སྲུང་སྐྱེལ”གྱི་ཆེད་དོན་བྱ་སྤྱོད་སྒྲིག་འཛུགས་བྱས་ནས། གློག་འཕྲིན་ཁྱབ་ཁོངས་ཀྱི་གྲངས་གཞིའི་བདེ་འཇགས་དོ་དམ་ལ་སྐུལ་འདེད་གཏིང་ཟབ་བཏང་ཡོད། མིག་སྔའི་བར་ལྗོངས་ནང་ཁུལ་གྱི་རྨང་གཞིའི་གློག་འཕྲིན་ཁེ་ལས་ཁག་གིས་རིམ་རྩིས་བྱས་ན་ཁ་བསླུས་དང་འབྲེལ་བ་ཡོད་པའི་ཉེན་ཁའི་གཱ་ཁྲི17.3ལྷག་སྒོ་བརྒྱབ་པ་དང་། སྤྱི་བདེ་སྡེ་ཚན་ལ་གཞོགས་འདེགས་བྱས་ནས་ཁ་བསླུས་དང་འབྲེལ་བ་ཡོད་པའི་དྲ་ཁོངས་ཀྱི་མིང་ཁྲི825ལྷག་བཀག་པས། ལྗོངས་ཡོངས་ཀྱི་དྲ་རྒྱ་དང་གྲངས་གཞིའི་བདེ་འཇགས་ནུས་པ་རྒྱུན་ཆད་མེད་པར་ཆེ་རུ་ཕྱིན་ཡོད།