མཚོ་སྔོན་ཞིང་ཆེན་གྱིས་གྲོང་ཁྱེར་དང་གྲོང་ཚོའི་སྡོད་དམངས་ཀྱི་གཞི་རྩའི་རྒན་གསོའི་འགན་སྲུང་ཐད་དམངས་ཕན་སྲིད་ཇུས་གསར་བ་བཏོན།
ཟླ་བཅུ་གཅིག་པའི་ཚེས་ཉེར་བདུན་ཉིན། མཚོ་སྔོན་ཞིང་ཆེན་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ཐིན་གྱིས་སྤེལ་པའི་གནས་ཚུལ་ལྟར་ན། མིག་སྔར། མཚོ་སྔོན་ཞིང་ཆེན་སྤྱི་ཚོགས་འགན་སྲུང་ཐིན་གྱིས་མཚོ་སྔོན་ཞིང་ཆེན་ནོར་སྲིད་ཐིན་དང་རྒྱལ་ཁབ་ཁྲལ་དོན་སྤྱི་ཁྱབ་ཅུའུ་མཚོ་སྔོན་ཞིང་ཆེན་ཁྲལ་དོན་ཅུའུ་དང་མཉམ་འབྲེལ་སྒོས་མཚོ་སྔོན་ཞིང་ཆེན་གྱི་གྲོང་ཁྱེར་དང་གྲོང་ཚོའི་སྡོད་དམངས་ཀྱི་གཞི་རྩའི་རྒན་གསོའི་འགན་སྲུང་ཇུས་གཞི་ལག་བསྟར་བྱས་ཏེ། གྲོང་ཁྱེར་དང་གྲོང་ཚོའི་སྡོད་དམངས་ཀྱི་གཞི་རྩའི་རྒན་གསོའི་འགན་སྲུང་གྱི་མ་དངུལ་གྲབས་གསོག་ཐབས་ལམ་སྔར་བས་རྒྱ་ཆེར་གཏོང་བ་དང་། མཚོ་སྔོན་ཞིང་ཆེན་གྱི་གྲོང་ཁྱེར་དང་གྲོང་ཚོའི་སྡོད་དམངས་ཀྱི་གཞི་རྩའི་རྒན་གསོའི་འགན་སྲུང་ལམ་ལུགས་མ་ལག་འཐུས་སྒོ་ཇེ་ཚང་དུ་གཏོང་བའི་ཐད་གོམ་སྟབས་གལ་ཆེན་སྤོས་ཡོད།
ལག་བསྟར་ཇུས་གཞིའི་ནང་ཞིང་སྡེའི་ཐུན་མོང་དཔལ་འབྱོར་རྩ་འཛུགས་ཀྱིས་ཐུན་མོང་གི་ཁ་གསབ་སྤེལ་བར་སྔོན་ལ་ཚོད་ལྟའི་ལག་བསྟར་དང་། ཡུལ་བབ་ལ་བསྟུན་པ། དམངས་གཙོས་དོ་དམ། ཞིང་སྡེ་གཅིག་ལ་ཐབས་ཇུས་གཅིག་འགོད་པ་བཅས་ཀྱི་རྩ་དོན་གཞིར་བཟུང་ནས་ཞིང་སྡེའི་ཐུན་མོང་དཔལ་འབྱོར་རྩ་འཛུགས་ཀྱི་ཁོངས་མིའི་ཚོགས་ཆེན་ཐོག་གྲོས་འཆམ་བྱུང་རྗེས་ལག་བསྟར་བྱེད་དགོས། ཁ་གསབ་བྱ་ཡུལ་ནི་ཞིང་སྡེ་དེ་གའི་ཐུན་མོང་དཔལ་འབྱོར་རྩ་འཛུགས་ནང་གི་ལོ་དེར་གྲོན་དངུལ་སྤྲད་པའི་གྲོང་ཁྱེར་དང་ཡུལ་ཚོའི་གཞི་རྩའི་རྒན་གསོའི་འགན་སྲུང་ནང་ཞུགས་མཁན་ཡིན་དགོས་ལ། ཁ་གསབ་མ་དངུལ་གྱི་ཡོང་ཁུངས་གཙོ་བོ་ནི་ཐུན་མོང་དཔལ་འབྱོར་རྩ་འཛུགས་ཀྱི་ཡོང་འབབ་ཡིན། ཁ་གསབ་རོགས་དངུལ་གྱི་ཚད་གཞི་དང་བྱེད་ཐབས་དེ་ཞིང་སྡེ་སོ་སོའི་ཐུན་མོང་དཔལ་འབྱོར་རྩ་འཛུགས་ཀྱིས་གྲོང་ཚོའི་གནས་ཚུལ་དང་ལོ་དེའི་ཡོང་སྒོའི་གནས་ཚུལ་ལ་གཞིགས་ནས། གྲོས་བསྡུར་བཞི་དང་ཡོངས་བསྒྲགས་གཉིས་ཀྱི་དམངས་གཙོའི་ཇུས་ཐག་གཅོད་པའི་བྱེད་ཐབས་ལ་བརྟེན་ནས་གཏན་འཁེལ་བྱེད་དགོས།
ལག་བསྟར་ཇུས་གཞི་ཉིས་སྟོང་ཉེར་ལྔ་ལོའི་ཟླ་དང་པོའི་ཚེས་གཅིག་ཉིན་ལག་བསྟར་བྱེད་རྒྱུ་ཡིན་ལ། ཞིང་ཆེན་ཡོངས་ཀྱི་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་སྡེ་ཁག་གིས་གྲོང་ཁྱེར་དང་གྲོང་ཚོའི་སྡོད་དམངས་ཀྱི་གཞི་རྩའི་རྒན་གསོའི་འགན་སྲུང་ཐུན་མོང་དཔལ་འབྱོར་གྱི་ཁ་གསབ་ལས་ཀར་སྐུལ་འདེད་བཏང་ནས་ཞིང་ཆེན་ཡོངས་ཀྱི་མི་རིགས་ཁག་གི་མང་ཚོགས་ལ་བསྒྱུར་བཅོས་དང་འཕེལ་རྒྱས་ཀྱི་ཁེ་ཕན་སྔར་ལས་མང་པོ་ལོངས་སྤྱོད་བྱེད་དུ་འཇུག་རྒྱུ་དང་། ཞིང་ཆེན་ཡོངས་ཀྱི་གྲོང་ཁྱེར་དང་གྲོང་ཚོའི་སྡོད་དམངས་ཀྱི་གཞི་རྩའི་རྒན་གསོའི་འགན་སྲུང་གྱི་སྤུས་ཚད་མཐོ་ལ། རྒྱུན་མཐུད་ངང་འཕེལ་རྒྱས་གཏོང་བར་སྒུལ་ཤུགས་གསར་བ་སྣོན་དགོས།
གྲོང་ཁྱེར་དང་གྲོང་ཚོའི་སྡོད་དམངས་ཀྱི་གཞི་རྩའི་རྒན་གསོའི་འགན་སྲུང་གྱི་ཐུན་མོང་དཔལ་འབྱོར་ཁ་གསབ་ལས་དོན་སྤེལ་བ་དང་། མི་སྒེར་གྱིས་གྲོན་དངུལ་སྤྲོད་པར་སྐུལ་མ་གཏོང་བ། མ་དངུལ་གྲབས་གསོག་དང་ཐོབ་ཐང་གི་ཆུ་ཚད་དམའ་དྲགས་པ་བཅས་ཀྱི་དཀའ་གནད་སེལ་བ་དང་། གྲོང་ཚོ་དང་ཡུལ་ཚོ་དར་རྒྱས་ཡོང་རྒྱུར་སྐུལ་འདེད་གཏོང་བ་སོགས་ལ་དོན་སྙིང་གལ་ཆེན་ལྡན་ཡོད། ཉིས་སྟོང་ཉེར་བཞི་ལོར། ཞིང་ཆེན་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ཐིན་གྱིས་གློག་རྡུལ་བརྟག་དཔྱད་འདྲི་ཤོག་བཀྲམས་ནས་ཟི་ལིང་གྲོང་ཁྱེར་དང་མཚོ་ཤར་གྲོང་ཁྱེར། མཚོ་ནུབ་སོག་རིགས་བོད་རིགས་རང་སྐྱོང་ཁུལ་གྱི་ཡུལ་ཚོ་ཁག་ཅིག་ཏུ་བརྟག་ཞིབ་གཏིང་ཟབ་བྱས་ཏེ། ཀོང་ཏུང་དང་ཅང་སུའུ་སོགས་ཞིང་ཆེན་ལས་གྲུབ་འབྲས་ཐོབ་པའི་ཉམས་མྱོང་བླངས་པ་དང་། སྤྱི་ཚོགས་ལ་ཁ་ཕྱོགས་ནས་ཡོངས་བསྒྲགས་ངང་བསམ་འཆར་དང་གྲོས་འགོ་བསྡུ་ལེན་བྱས་ཏེ་གྲོང་ཁྱེར་དང་གྲོང་ཚོའི་སྡོད་དམངས་ཀྱི་གཞི་རྩའི་རྒན་གསོའི་འགན་སྲུང་གི་ཐུན་མོང་དཔལ་འབྱོར་ཁ་གསབ་ཀྱི་དམངས་ཕན་སྲིད་ཇུས་གཏན་འབེབས་བྱེད་པར་རྨང་གཞི་བརྟན་པོ་བཏིངས་ཡོད།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注