པཱ་ཞིའི་ལྷོ་ཕྱོགས་ས་ཁུལ་དུ་གནམ་གྲུ་ཆུང་བ་ཞིག་སར་ལྷུང་ནས་མི10རྐྱེན་ལམ་དུ་ཤོར།

མི10དྲུད་པའི་གནམ་གྲུ་ཆུང་བ་ཞིག་ཚེས22ཉིན་གྱི་སྔ་དྲོར་པཱ་ཞིའི་ལྷོ་ཕྱོགས་ཀྱི་ལི་ཨོ་ཀི་ལན་ཏི་མངའ་སྡེའི་ཀི་ལཱ་མཱ་ཏུའུ་གྲོང་ཁྱེར་ནས་སར་ལྷུང་བ་དང་། གནམ་གྲུའི་སྟེང་གི་མི་ཚང་མ་རྐྱེན་ལམ་དུ་ཤོར། དོན་རྐྱེན་དེ་ལས་ད་རུང་ས་ངོས་ཀྱི་མི17ལ་རྨས་ཕོག་ཡོད་ཟེར།

ས་དེའི་དམག་དོན་སྡེ་ཁག་གིས་བསྒྲགས་པ་ལྟར་ན། གནམ་གྲུ་དེ་ཀི་ལཱ་མཱ་ཏུའུ་གྲོང་ཁྱེར་ཉེ་འདབས་ཀྱི་ཁཱ་ནེ་ལཱ་གནམ་གྲུ་ཐང་ནས་འཕུར་བ་དང་། ཧྲིན་པའོ་ལོ་མངའ་སྡེའི་རོང་ཏིས་ཡཱ་དབྱེ་གྲོང་ཁྱེར་དུ་འཕུར་རྩིས་ཡོད། གནམ་གྲུ་འཕུར་ནས་སྐར་མ་འགའི་རྗེས་སུ་ཀི་ལཱ་མཱ་ཏུའུ་གྲོང་ཁུལ་ནས་སར་ལྷུང་བ་དང་། སར་ལྷུང་སྐབས་ཐོག་ཁང་ཞིག་གི་དུད་ཁུང་དང་ཁྱིམ་ཆས་འཚོང་ཁང་ཞིག་དང་མགྲོན་ཁང་ཞིག་བཅས་ལ་ཐོ་བརྒྱབ་པ་རེད། ལི་ཨོ་ཀི་ལན་ཏི་ལྷོ་མ་མངའ་སྡེའི་སྲིད་གཞུང་གིས་བདེན་དཔང་བྱས་དོན། གནམ་གྲུའི་སྟེང་གི་མི་བཅུ་བོ་ཚང་མ་རྐྱེན་ལམ་དུ་ཤོར་ཟེར།

ས་དེའི་མེ་གསོད་སྡེ་ཁག་གིས་བཤད་རྒྱུར། གནམ་གྲུ་སར་ལྷུང་བ་ལས་ས་ངོས་ནས་མེར་འབར་བ་དང་། མི17ལ་རྨས་ཕོག་ནས་སྨན་ཁང་དུ་བསྐྱལ་ཡོད་ལ། དེའི་ནང་མི་གཉིས་ཀྱི་རྨས་སྐྱོན་ཅུང་ཚབས་ཆེན་རེད་ཟེར།

གཞན་ཡང་ས་དེའི་ཉེན་རྟོག་ཕྱོགས་ཀྱིས་བསྒྲགས་པ་ལྟར་ན། གནམ་གྲུའི་སྟེང་གི་མི་ནི་ཚོང་བ་ཞིག་དང་དེའི་ཁྱིམ་མི་དག་རེད། གནམ་གྲུ་སར་ལྷུང་སར་སྔར་བཞིན་འགས་གཏོར་འབྱུང་བའི་ཉེན་ཁ་ཡོད་པས་བཀག་སྡོམ་བྱས་ཡོད་པ་དང་། དོན་རྐྱེན་དེའི་འབྱུང་རྐྱེན་ལ་རྟོག་ཞིབ་བྱེད་བཞིན་ཡོད་ཟེར།