མཚོ་སྔོན་གྱིས་གནས་ངེས་གཏན་མེད་པའི་བྱིས་པར་སེམས་ཁུར་དང་སྲུང་སྐྱོབ་བྱེད་པའི་སྲིད་ཇུས་ཐོག་མ་བཏོན།

ཟླ11པའི་ཚེས26ཉིན། མཚོ་སྔོན་ཞིང་ཆེན་དམངས་སྲིན་ཐིན་གྱིས་ཞིང་ཆེན་ཏང་ཨུའི་སྲིད་ཁྲིམས་ཨུ་ཡོན་ལྷན་ཁང་དང་ཞིང་ཆེན་ཏང་ཨུའི་དྲ་འཕྲིན་གཞུང་དོན་ཁང་སོགས་སྡེ་ཁག་ཉེར་གཉིས་དང་མཉམ་འབྲེལ་སྒོས་མཚོ་སྔོན་ཞིང་ཆེན་གྱིས་གནས་ངེས་གཏན་མེད་པའི་བྱིས་པར་སེམས་ཁུར་དང་སྲུང་སྐྱོབ་བྱེད་པའི་འགུལ་སྐྱོད་ལག་བསྟར་ཇུས་གཞི་པར་འགྲེམ་བྱས། དེ་ནི་མཚོ་སྔོན་ཞིང་ཆེན་གྱིས་བཏོན་པའི་གནས་ངེས་གཏན་མེད་པའི་བྱིས་པར་སེམས་ཁུར་དང་སྲུང་སྐྱོབ་བྱེད་པའི་སྲིད་ཇུས་ཐོག་མ་ཡིན་པས་ཞིང་ཆེན་ཡོངས་ཀྱི་གནས་ངེས་གཏན་མེད་པའི་བྱིས་པའི་ཁེ་དབང་འགན་སྲུང་དང་ཐུགས་ཁུར་ཞབས་ཞུ་ལོངས་སྤྱོད་བྱེད་པར་འདེགས་སྐྱོར་ནུས་ལྡན་འདོན་སྤྲོད་བྱས་ཡོད།

ལག་བསྟར་ཇུས་གཞིའི་ནང་གནས་ངེས་གཏན་མེད་པའི་བྱིས་པ་དང་གཏན་སྡོད་བྱིས་པའི་སློབ་གསོ་དང་། སྨན་བཅོས། འཚོ་བའི་འགན་སྲུང་སོགས་གཞི་རྩའི་སྤྱི་པའི་ཞབས་ཞུ་མཁོ་འདོན་ཐད་ཀྱི་བར་ཁྱད་མུ་མཐུད་དུ་ཇེ་ཆུང་དུ་གཏོང་བར་དམིགས་ནས་གཙོ་གནད་ལས་ཀའི་ལས་འགན་ཁག་བཅུ་བཞི་བཀོད་སྒྲིག་བྱས། བྱིས་པར་སློབ་གསོ་ཡོད་པ། སློབ་ཁྲིད་བྱེད་མཁན་ཡོད་པ། ན་དུས་སྨན་བཅོས་ཐུབ་པ། སྡོད་སའི་ཁང་པ་ཡོད་པ། ཉམས་ཞན་ལ་རོགས་སྐྱོད་ཡོད་པ། འཕེལ་རྒྱས་ཀྱི་འགན་སྲུང་བཅས་ཡོད་པ་སོགས་ཕྱོགས་དྲུག་ཐད་ཀྱི་ཞིབ་ཕྲའི་བྱེད་ཐབས་ཉེར་གཅིག་བཏོན་ནས། ས་གནས་སོ་སོའི་འབྲེལ་ཡོད་སྡེ་ཁག་གིས་གནས་ངེས་གཏན་མེད་པའི་བྱིས་པའི་ཁེ་དབང་འགན་སྲུང་དང་ཐུགས་ཁུར་སྲུང་སྐྱོབ་བྱེད་པར་བྱ་བའི་ཕྱོགས་སྟོན་འདོན་སྤྲོད་བྱས་ཡོད།

ལག་བསྟར་ཇུས་གཞི་ལས་གསལ་བོར་བསྟན་དོན། ཉིས་སྟོང་ཉེར་དྲུག་ལོར།  གནས་ངེས་གཏན་མེད་པའི་བྱིས་པའི་འབྲེལ་ཡོད་སྲིད་ཇུས་སྔར་ལས་ཇེ་ལེགས་དང་འཐུས་ཚང་ཡིན་པ། ཐུགས་ཁུར་ཞབས་ཞུའི་བྱ་བ་སྔར་ལས་ལྷག་པའི་སྒོ་ནས་གནད་འཁེལ་ནུས་ལྡན་དང་། གཙོ་གནད་ཁྱབ་ཁོངས་ཀྱི་དམངས་ཕན་བྱེད་ཐབས་སྔར་བས་འདྲ་མཉམ་ཡིན་པ། བྱིས་པའི་ཆ་འཕྲིན་རྩིས་ཐོ་སྔར་བས་གནད་ལ་འཁེལ་བ་བཅས་དང་། གཞི་རིམ་གྱི་རྨང་གཞི་སྔར་བས་བརྟན་པོ་དང་། གནང་ངེས་གཏན་མེད་པའི་བྱིས་པའི་གཅེས་སྐྱོང་གི་སྤྱི་ཡོངས་ཀྱི་ཆུ་ཚད་མངོན་གསལ་དོད་པོས་ཇེ་མཐོར་གཏོང་དགོས། ཉིས་སྟོང་སོ་ལྔ་ལོར། གནས་ངེས་གཏན་མེད་པའི་བྱིས་པར་གཅེས་སྐྱོང་དང་སྲུང་སྐྱོབ་བྱེད་པའི་ལས་ཀར་གྲུབ་འབྲས་མངོན་གསལ་ལེན་དགོས་པ་དང་། བྱམས་སྐྱོང་སྲུང་སྐྱོང་མ་ལག་འཐུས་སྒོ་ཚང་བ། གཞི་རྩའི་སྤྱི་པའི་ཞབས་ཞུ་མཁོ་འདོན་སྔར་བས་ཆ་སྙོམས་དང་སྤུད་ལེགས་ཡིན་པ། གནས་ངེས་གཏན་མེད་པའི་བྱིས་པའི་ལུས་སེམས་བདེ་ཐང་ངང་འཕེལ་རྒྱས་གཏོང་བའི་ཁེ་དབང་ལ་ཕྱོགས་ཡོངས་ནས་འགན་སྲུང་བྱེད་དགོས།

ལག་བསྟར་ཇུས་གཞི་ལས་ས་གནས་སོ་སོའི་འབྲེལ་ཡོད་སྡེ་ཁག་གིས་རིམ་པ་སོ་སོའི་གནས་ངེས་གཏན་མེད་པའི་བྱིས་པ་དང་གཞིས་སྲུང་བྱིས་པའི་ཁེ་དབང་འགན་སྲུང་བྱ་བའི་མཐུན་སྦྱོར་ནང་རྐྱེན་གྱི་ནུས་པ་འདོན་སྤེལ་གང་ལེགས་བྱས་ཏེ། སྲིད་གཞུང་དང་། སློབ་གྲྭ  ཁྱིམ་ཚང་། སྡེ་ཁུལ། སྤྱི་ཚོགས་ཐོན་ཁུངས་སོགས་ཀྱིས་ལས་ཀ་དོན་འཁྱོལ་ཡོང་བར་སྐུལ་འདེད་གཏོང་བ་དང་། མཐིལ་རྟོགས་ཞིབ་བཤེར། རྩིས་ཐོ་འགོད་པ། ལག་ལེན་དངོས་ཀྱི་འཚོལ་ཞིབ། ཕྱོགས་གཅིག་ནས་ཉམས་མྱོང་ཕྱོགས་བསྡོམས་བཅས་བྱ་རྒྱུ་རྒྱུན་འཁྱོངས་བྱས་ཏེ། ཐུགས་ཁུར་དང་སྲུང་སྐྱོང་གི་སྤུད་ཚད་རྒྱུན་མཐུད་ངང་མཐོ་རུ་གཏོང་དགོས། གནས་ངེས་གཏན་མེད་པའི་བྱིས་པར་སེམས་ཁུར་དང་སྲུང་སྐྱོང་བྱེད་པའི་ལད་དོན་དེ་དུས་བདེ་མཚོ་སྔོན་འཛུགས་སྐྲུན་དང་། བྱིས་པའི་མཛའ་མཐུན་གྲོང་ཁྱེར་འཛུགས་སྐྲུན། གཞོན་ནུ་དང་ལོ་ཆུང་གི་ཁེ་དབང་སྲུང་སྐྱོང་བྱེད་པའི་ལས་གནས་གསར་འཛུགས་སོགས་གཅིག་གྱུར་འཆར་འགོད་ལ་སྐུལ་འདེད་གཏོང་དགོས། དང་བླངས་པ་དང་། གཅེས་སེམས་མི་སྣ། གཅེས་སེམས་ལྡན་པའི་ཁེ་ལས་བཅས་གནས་ངེས་གཏན་མེད་པའི་བྱིས་པར་ཐུགས་ཁུར་དང་ཞབས་ཞུ་བྱེད་པའི་ཁྲོད་ཞུགས་ཏེ། སྤྱི་ཚོགས་ཡོངས་ཀྱིས་གནས་ངེས་གཏན་མེད་པའི་བྱིས་པར་སེམས་ཁུར་དང་གཅེས་སྐྱོང་བྱེད་པའི་རྣམ་པ་བཟང་པོ་ཞིག་གཏོད་དགོས།