མཚོ་སྔོན་གྱི་བཟོ་བའི་བསམ་བློ་ཆབ་སྲིད་སློབ་ཁྲིད་ཆེན་མོ་འཚོགས།

ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་དང་ཞིང་ཆེན་ཏང་ཨུའི་སྐབས་བཅུ་བཞི་པའི་ཚང་འཛོམས་གྲོས་ཚོགས་ཐེངས་བདུན་པའི་དགོངས་དོན་ལག་བསྟར་དོན་འཁྱོལ་བྱེད་པ་དང་། ཀྲུང་ཧྭའི་རྒྱལ་ཡོངས་སྤྱིའི་བཟོ་ཚོགས་ཀྱི་བྱ་བའི་བླང་བྱ་ལག་བསྟར་དོན་འཁྱོལ་བྱེད་ཅིང་། ལས་བཟོ་པའི་བསམ་བློ་ཆབ་སྲིད་ཁྲིད་སྟོན་ལ་ཤུགས་སྣོན་པའི་ཚོང་རྟགས་ལེགས་པོ་བསྐྲུན་ཆེད། ཟླ11པའི་ཚེས25ཉིན། ཞིང་ཆེན་ཏང་ཨུའི་དྲིལ་སྒྲོག་པུའུ་དང་ཞིང་ཆེན་སྤྱིའི་བཟོ་ཚོགས། ཞིང་ཆེན་སློབ་གསོ་ཐིན་བཅས་ཀྱིས་གཙོ་སྒྲུབ་བྱས་ཤིང་། ཞིང་ཆེན་ཏང་ཨུའི་ཏང་གི་ཏང་གི་སློབ་གྲྭས་རོགས་སྒྲུབ་བྱས་པའི་རྒྱལ་ཁབ་སྟོབས་ལྡན་དང་མི་རིགས་བསྐྱར་དར་གཏོང་བར་ང་ཚོས་མཉམ་དུ་འབད་པ་བྱེད་ཅེས་པའི་མཚོ་སྔོན་གྱི་བཟོ་བའི་བསམ་བློ་ཆབ་སྲིད་སློབ་ཁྲིད་ཆེན་མོ་དངོས་སུ་སྤེལ་བ་དང་། ཞིང་ཆེན་ཡོངས་ཀྱི་ལས་རིགས་སོ་སོའི་ལས་ཡུལ་དང་པོའི་ལས་བཟོ་པའི་འཐུས་ཚབ350ཉེ་བས་ཡུལ་དངོས་ནས་སྒྲོག་འགྲེལ་ལ་ཉན་ཞིང་། དྲ་ལམ་ཐད་གཏོང་ལ་ལྟ་མཁན་དང་མཐེབ་གནོན་བྱེད་མཁན་མི་ཐེངས་འབུམ་གཅིག་དང་ཁྲི་བཞིར་སླེབས།

མཚོ་སྔོན་གྱི་བཟོ་བའི་བསམ་བློ་ཆབ་སྲིད་སློབ་ཁྲིད་ཆེན་མོ་དངོས་སུ་སྤེལ་བ་དང་། དེས་མཚོ་སྔོན་བཟོ་ཚོགས་ཀྱི་བསམ་བློ་ཆབ་སྲིད་སློབ་ཁྲིད་ཆེན་མོ་ཕྱོགས་ཡོངས་ནས་སྤེལ་འགོ་བརྩམས་པ་མཚོན་ཞིང་། ཐོན་ལས་བཟོ་པའི་རུ་ཁག་འཛུགས་སྐྲུན་དང་བཅོས་སྒྱུར་ཟབ་སྤེལ་བྱེད་པ་དང་། བཟོ་ཚོགས་ཀྱི་སློབ་གྲྭ་ཆེན་མོའི་ནུས་པ་འདོན་སྤེལ་བྱེད་པ། ལས་བཟོ་པའི་བསམ་བློ་ཆབ་སྲིད་ཆུ་ཚད་ཕྱོགས་ཡོངས་ནས་མཐོར་འདེགས་གཏོང་བཅས་བྱས་ནས། བློ་རྩ་བརྟན་ཞིང་ཀུན་སྤྱོད་གཙང་བ། ལས་གནས་ལ་དགའ་ཞིང་བརྩི་བཀུར་ཡོད་པ། རང་སྟོབས་རང་སྤེལ་བཅས་ཀྱི་ཁྱད་ཆོས་ལྡན་པའི་དུས་རབས་གསར་བའི་ལས་བཟོ་པའི་རུ་ཁག་ཅིག་འཛུགས་པར་དོན་སྙིང་གལ་ཆེན་ལྡན།

སློབ་ཁྲིད་སྔོན་ལ། ཞིང་ཆེན་སྤྱིའི་བཟོ་ཚོགས་ཀྱིས་མཚོ་སྔོན་གྱི་བཟོ་པའི་བསམ་བློ་ཆབ་སྲིད་སློབ་ཁྲིད་ཆེན་མོའི་སྒྲོག་འགྲེལ་ཚོགས་པའི་འཐུས་ཚབ་པ་བཅོ་བརྒྱད་ལ་གདན་ཞུའི་ཡི་གེ་སྤྲད། རྒྱལ་ཁབ་ཀྱི་ལག་ཤེས་པའི་ལོ་འཁོར་གྱི་མི་སྣ་གྲགས་ཅན་གྱི་མིང་འདོན་མི་སྣ་དང་། རྒྱལ་ཡོངས་ངལ་རྩོལ་དཔེ་སྟོན། རྒྱལ་ཡོངས་ལྔ་གཅིག་ངལ་རྩོལ་བྱ་དགའ་ཐོབ་མཁན་ཧྲི་ཁོན། རྒྱལ་ཡོངས་སྔོན་ཐོན་ལས་བྱེད་མི་སྣ། མཚོ་སྔོན་ཞིང་ཆེན་ཚན་རིག་ལག་རྩལ་ཐད་བྱས་རྗེས་གལ་ཆེན་བཞག་པའི་བྱ་དགའ་ཐོབ་མཁན་ཕཱན་ཐུང་། རྒྱལ་ཡོངས་ལྔ་གཅིག་ངལ་རྩོལ་བྱ་དགའ་ཐོབ་མཁན་ལྷ་མོ་གཡུ་སྒྲོན། རྒྱལ་ཡོངས་ལྔ་གཅིག་ངལ་རྩོལ་བྱ་དགའ་ཐོབ་མཁན་ལུའུ་ཁྲིན་དབྱིན། མཚོ་སྔོན་སློབ་ཆེན་མར་ཁེ་སི་རིང་ལུགས་སློབ་གླིང་གི་འཆད་ཁྲིད་དགེ་རྒན་ཁྲིན་ཞུས། ཟི་ལིང་གྲོང་ཁྱེར་ལྔ་གཅིག་རིག་གནས་ཁང་གི་ཀྲང་ཧའེ་ཧྭ་བཅས་སྒྲོག་འགྲེལ་ཚོགས་པའི་ཁོངས་མི་དྲུག་གིས་ཐོག་མར་སྒྲོག་འགྲེལ་བྱས།

ཡུལ་དངོས་སུ་སློབ་ཁྲིད་ལ་ཉན་བཞིན་པའི་ལས་ཡུལ་དང་པོའི་ལས་བཟོ་པས་བསྟན་དོན། སྒྲོག་འགྲེལ་ཚོགས་པའི་ཁོངས་མི་རྣམས་ཀྱིས་མི་སེམས་སྒུལ་བར་བྱེད་པའི་བསམ་བློ་ཆབ་སྲིད་སློབ་ཁྲིད་ཆེན་མོ་གྲ་སྒྲིག་བྱས་ཡོད་ལ། ངལ་རྩོལ་དཔེ་སྟོན་དང་ལག་ཤེས་མི་སྣ་མིག་དཔེར་བཟུང་ནས། ཏང་ལ་དགའ་ཞིང་རྒྱལ་ཁབ་ལ་དགའ་བའི་བློ་རྩ་བརྟན་པ་དང་། ལས་གནས་སུ་དངོས་གཉེར་འབད་འཐབ་དང་ངར་སེམས་ཆེར་སྐྱེད་བྱས་ཏེ། མཚོ་སྔོན་ལ་རྒྱུས་ལོན་པ་དང་། མཚོ་སྔོན་ལ་དགའ་ཞེན་བཅངས་པ། མཚོ་སྔོན་དར་རྒྱས་གཏོང་བ་བཅས་ཀྱི་ཁག་ཁུར་ལ་བརྟེན་ནས་ནུས་ཤུགས་ཡོད་རྒུས་ཀྲུང་གོའི་ལུགས་ཀྱི་དེང་རབས་ཅན་གྱི་མཚོ་སྔོན་ལག་ལེན་ལ་སྐུལ་འདེད་གཏོང་བར་བྱས་རྗེས་གལ་ཆེན་འཇོག་དགོས།