མཚོ་ལྷོ་ཁུལ་གྱིས་དགུན་དཔྱིད་དུས་ཀྱི་རིག་གནས་ཡུལ་སྐོར་ལུས་རྩལ་དམངས་ཕན་བྱ་འགུལ་སྤེལ།

མཚོ་ལྷོ་བོད་རིགས་རང་སྐྱོང་ཁུལ་གྱི2024ལོ་ནས2025ལོའི་དགུན་དཔྱིད་དུས་ཀྱི་རིག་གནས་ཡུལ་སྐོར་ལུས་རྩལ་དམངས་ཕན་བྱ་འགུལ་སྤེལ་བའི་མཛད་སྒོ་དང་རི་ཆུའི་འགོ་ཁུངས་དང་རབ་མཛེས་མཚོ་སྔོན། མཆོག་གཙང་མཚོ་ལྷོའི་རིག་གནས་ཐོན་ཁུངས་ཆེད་དོན་དྲིལ་སྒྲོག་ངོ་སྤྲོད་གྲོས་ཚོགས་ཟླ11པའི་ཚེས22ཉིན་གུང་ཧོ་ནས་བསྡུས།

བྱ་འགུལ་འགོ་རྩོམ་པའི་མཛད་སྒོའི་སྟེང་། མཚོ་ལྷོ་ཁུལ་རིག་གནས་ལུས་རྩལ་ཡུལ་སྐོར་རྒྱང་སྒྲོག་བརྙན་འཕྲིན་ཅུའུ་ཡིས་དགུན་དཔྱིད་དུས་ཀྱི་རིག་གནས་ཡུལ་སྐོར་ལུས་རྩལ་དམངས་ཕན་བྱ་འགུལ་ཉི་ཤུ་དང་གཟིགས་སྐྱོང་བྱེད་ཐབས་བཅུ་དགུ་སྒྲོག་སྤེལ་བྱས། ཁུལ་ཡོངས་ཀྱི་རྫོང་ལྔ་ནས་ཡོང་བའི་རིག་གནས་ཡུལ་སྐོར་ངོ་སྤྲོད་མི་སྣས་རིམ་པ་བཞིན་དགུན་དཔྱིད་དུས་ཀྱི་ཁྱད་ལྡན་ཡུལ་སྐོར་ཐོན་ཁུངས་ཀྱི་བརྗོད་དོན་ངོ་སྤྲོད་བྱས་པ་དང་། ཀྲུང་གོའི་ཆེས་མཛེས་པའི་ཨིནྡྲི་ནཱི་ལ་དང་འཛམ་གླིང་གི་ཆེས་ཆེ་བའི་ཉི་འོད་ནུས་པའི་གློག་འདོན་གླིང་ཁུལ་སོགས་ནས་རྨ་ཆུ་དང་ཆོས་རྒྱལ་ལྷ་ཁང་གི་གནའ་བོའི་བཟོ་སྐྲུན་ཚོགས། སུམ་པ་བོད་ཁྱིམ། རྫོང་རི་རིག་གནས་གནའ་ཤུལ། འབའ་ཐང་། ཨ་མྱེས་བྲག་དཀར། སྤྲེལ་རྫོང་བཅས་ངོ་སྤྲོད་བྱེད་པ་བརྒྱུད་དེ་མཚོ་ལྷོ་ཁུལ་གྱི་ཁྱད་དུ་འཕགས་པའི་མི་གཞུང་མཛེས་ལྗོངས་དང་མཛེས་སྡུག་ལྡན་པའི་རང་བྱུང་མཛེས་ལྗོངས་ཕྱོགས་ཡོངས་ནས་འགྲེམ་སྟོན་བྱས།

ད་ལོར། མཚོ་ལྷོ་ཁུལ་གྱིས་རིག་གནས་ལ་བརྟེན་ནས་ཡུལ་སྐོར་འཕེལ་རྒྱས་སུ་གཏོང་བ་དང་ཡུལ་སྐོར་ལ་བརྟེན་ནས་རིག་གནས་འགྲེམ་སྟོན་བྱེད་པ་རྒྱུན་འཁྱོངས་བྱས་པ་དང་། ཁྱད་ཆོས་ཅན་དང་བར་ཁྱད་རང་བཞིན། མྱོང་ཚོར་རང་བཞིན་གྱི་ཐོན་རྫས་མྱུར་དུ་སྐྱེད་སྲིང་བྱས་ལ། རིག་གནས་ལུས་རྩལ་ཡུལ་སྐོར་ཐོན་ལས་མཉམ་བསྲེས་སྒོས་འཕེལ་རྒྱས་སུ་བཏང་བ་དང་། རྒྱ་ཁྱབ་རང་བཞིན་དང་མང་ཚོགས་རང་བཞིན། གསར་གཏོད་རང་བཞིན་གྱི་རིག་གནས་ལུས་རྩལ་གནས་སྐོར་བྱ་འགུལ་སྤེལ་ལ། ཡུལ་སྐོར་འཕེལ་རྒྱས་སུ་གཏོང་བ་དང་ཚོང་ར་འཕེལ་རྒྱས་སུ་གཏོང་བར་སྐུལ་འདེད་བཏང་ནས། ཁུལ་ཡོངས་ཀྱི་དཔལ་འབྱོར་སྤྱི་ཚོགས་སྤུས་ཚད་མཐོ་བའི་ངང་འཕེལ་རྒྱས་སུ་གཏོང་བར་སྐུལ་འདེད་ཤུགས་ཆེན་བཏང་།