ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གིས2025ལོའི་རྒྱལ་དམངས་དཔལ་འབྱོར་དང་སྤྱི་ཚོགས་འཕེལ་རྒྱས་འཆར་གཞི་དང་སྔོན་རྩིས་ལ་ཐོག་མའི་ཞིབ་བཤེར་དང་རྟོག་ཞིབ་བྱས།

ཉེ་ཆར། ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་རྟོག་ཞིབ་ཚན་ཆུང་ཟི་ལིང་གྲོང་ཁྱེར་དང་མཚོ་ཤར་གྲོང་ཁྱེར་དུ་སོང་ནས། 2024ལོའི་འཆར་གཞི་དང་སྔོན་རྩིས་ལག་བསྟར་གནས་ཚུལ་དང་། 2025ལོའི་འཆར་གཞི་དང་སྔོན་རྩིས་འཆར་ཟིན་ལ་ཐོག་མའི་ཞིབ་བཤེར་དང་རྟོག་ཞིབ་བྱས།

རྟོག་ཞིབ་ཚན་ཆུང་གིས་ཡུལ་དངོས་སུ་ཟི་ལིང་གྲོང་ཁྱེར་དང་མཚོ་ཤར་གྲོང་ཁྱེར་གྱི་ཁེ་ལས་དང་ལས་གཞི་གཙོ་བོ་ཁ་ཤས་ལ་ལྟ་ཞིབ་བྱས་ཏེ། ལས་གཞི་འཛུགས་སྐྲུན་གྱི་མྱུར་ཚད་དང་མ་དངུལ་འགྲོ་སོང་ཚད། ཁེ་ལས་ཀྱི་ཐོན་སྐྱེད་ཚོང་གཉེར་སོགས་ཀྱི་གནས་ཚུལ་ལ་རྒྱུས་ལོན་ཞིབ་མོ་བྱས་པར་མ་ཟད་བཞུགས་མོལ་ཚོགས་འདུ་བསྡུས་ནས་འབྲེལ་ཡོད་བྱ་བའི་གནས་ཚུལ་གྱི་སྙན་ཞུར་ཉན།

རྟོག་ཞིབ་ཚན་ཆུང་གིས་ནན་གྱིས་བསྟན་དོན། ལོ་མཇུག་གི་སྐབས་འདིར་དམིགས་འབེན་ལས་འགན་སོ་སོ་མཇུག་མཐའི་འགག་རྩའི་དུས་རིམ་དུ་སླེབས་ཡོད་ལ། དམིགས་ཚད་དང་ལས་རིགས། ས་ཁུལ་གཙོ་བོ་བཅས་ལ་དམིགས་པ་དང་། དཔལ་འབྱོར་གཙོ་བོའི་དམིགས་ཚད་ལ་དབྱེ་ཞིབ་བརྡར་གཅོད་བྱེད་པར་ཤུགས་བསྣན་ནས། རྩིས་གྲངས་རེ་རེ་ཞིབ་བསྡུར་བྱེད་པ་དང་མི་འདང་སར་ཁ་གསབ་བྱེད་དགོས། བཟོ་ལས་དཔལ་འབྱོར་བརྟན་པོའི་ངང་འཁོར་སྐྱོད་བྱེད་པར་ནུས་ཤུགས་ཡོད་རྒུས་སྐུལ་འདེད་གཏོང་བ་དང་། ཚོང་གཉེར་ཚོང་བའི་གསོན་ཤུགས་དང་ཁེ་ལས་རིམ་སྤོར་གྱི་སྒུལ་ཤུགས། ཚན་རྩལ་གསར་གཏོད་ནུས་པ་བཅས་སྐུལ་སྤེལ་བྱས་ཏེ། ངེས་ཤུགས་རྒྱུན་འཁྱོངས་བྱས་ནས་ཐོན་ལས་མགྱོགས་མྱུར་ངང་འཕེལ་རྒྱས་གཏོང་དགོས། ནུས་ལྡན་དགོས་མཁོ་དང་ནུས་ལྡན་དངུལ་གཏོང་ནུས་ཤུགས་ཡོད་རྒུས་རྒྱ་བསྐྱེད་པ་དང་། རིགས་སོ་སོའི་མ་དངུལ་བེད་སྤྱོད་ལེགས་པོ་བྱས་ནས། ཁྲོམ་རའི་སྒུལ་ཤུགས་དང་འཛད་སྤྱོད་ཀྱི་གསོན་ཤུགས་སྐུལ་སྤེལ་བྱེད་དགོས། ཕྱོགས་ཡོངས་ནས་བཅོས་སྒྱུར་སྔར་ལས་ཟབ་སྤེལ་བྱེད་པ་དང་། ཕྱོགས་ཡོངས་བཅོས་སྒྱུར་ཟབ་སྤེལ་གྱི་ལས་འགན་སོ་སོར་སྐུལ་འདེད་བཏང་སྟེ། ཆུ་ཚད་མཐོ་བའི་སྤྱི་ཚོགས་རིང་ལུགས་ཀྱི་ཁྲོམ་རའི་དཔལ་འབྱོར་ལམ་ལུགས་འཛུགས་སྐྲུན་བྱེད་དགོས། དམངས་ཚིས་འགན་སྲུང་ལེགས་པོར་བསྒྲུབ་པ་དང་། སྲིད་ཇུས་ཀྱི་རྒྱབ་སྐྱོར་ལ་ཤུགས་སྣོན་པ། ཡོང་འབབ་དམའ་བའི་མང་ཚོགས་ཀྱི་ལས་ཞུགས་དང་ཡོང་འབབ་འཕར་བར་སྐུལ་ཁྲིད་བྱས་ཏེ། གཞི་རྩའི་སྤྱི་བའི་ཞབས་ཞུ་དང་སྤྱི་ཚོགས་འགན་སྲུང་ལ་ཤུགས་སྣོན་དགོས། ནོར་སྲིད་སྔོན་རྩིས་དོ་དམ་ལ་ཤུགས་སྣོན་པ་དང་། ནོར་སྲིད་གཅིག་སྡུད་བྱས་ཏེ་འགྲོ་སོང་གཙོ་བོར་འགན་སྲུང་བྱེད་པ། ཁྲིམས་ལྟར་ས་གནས་སྲིད་གཞུང་གི་བུ་ལོན་བཅད་འབོར་ཁ་སྣོན་བྱས་ནས་གསོག་ཚད་བརྗེ་སྤོར་གྱི་བུ་ལོན་གྱིའབྲེལ་ཡོད་གོ་རིམ་དུས་ལྟར་ལག་བསྟར་བྱས་ཏེ། སྲིད་ཇུས་མགྱོགས་མྱུར་ངང་དོན་ཐོག་ཏུ་འཁྱོལ་བར་བྱེད་དགོས། ད་ལོ་དང་སང་ལོ་གཉིས་ལ་གཅིག་གྱུར་འཆར་འགོད་བྱེད་པ་དང་། མིག་མདུན་དང་རྒྱང་རིང་གཉིས་ལ་དམིགས་ནས། ལོ་ལྔའི་འཆར་འགོད་བཅོ་ལྔ་པའི་རྩ་གནད་དང་། 2025ལོའི་རྒྱལ་དམངས་དཔལ་འབྱོར་སྤྱི་ཚོགས་འཕེལ་རྒྱས་འཆར་གཞི་དང་ནོར་སྲིད་སྔོན་རྩིས་སྙན་ཞུ་དང་འཆར་ཟིན་བཅས་སྔོན་ལ་འཆར་འགོད་དང་སྒྲིག་བཟོ་ལེགས་པོ་བྱེད་དགོས།